موضوع للنقاش حول فحل نجدي نرجو مشاركة الجميع
اغنام - ابل - دواجن - طيور
السلام عليكم
يالربع ودي اناقشكم في موضوع طلي فحل نجدي للنقاش للفائده لي ولغيري
عندي طلي نجدي جذع ما كمل سنه الطلي شاريه بكامل قناعتي وهو صغير سن وراعيه قالي بالحرف الواحد سر الطلي كله ينسف ولم يشرط القريع والنسف ودوبه فاكه مع الغنم له شهر ونص بالظبط ويداحم الطليان
الطلي جرم ما شاء الله لكن من يوم فكيته مع الغنم يطرد ويحم ويطلع فوق الغنم ويحرث بيده تحت الشاه لكنه يطلع وما يرفع السبله
عندي عدد من الاسئله ابغى مشاركتكم وتفاعلكم
1/ متى يقدر الطلي ينسف ؟؟؟؟؟
2/ انا عجزت اخليه مع الطلي الفحل الكبير الصغير ينهبل اذا شافه وقام يشيل ويحط وينطحه وخفت على الكبير ورديته قلت خل الصغير مع الغنم لحاله يمكن يتعلم وياخذ راحته شهر ثم ارده وافك الكبير لحاله علشان الغنم ما تحيل
اثنينهم مع بعض يروح المراح غبرتن واقفه ويمكن يكسر رقبة العود
انا كنت ناوي افك الصغير مع الكبير علشان يتعلم لكم صار مستحيل يبقون الثنين مع بعض هل الطريقه صحيحه ؟
3/ ما ودي اتدخل ابدا مع الطلي الصغير يعني امسك له واميل له سبلة الشاه تمييل ودي يتعلم هو من نفسه هل التصرف صحيح ؟
4/ كم يستغرق علشان يتعلم ؟؟؟؟
5/ وش العلامات اللي تدل على انه قرع غير شوفته وهو ينسف ؟
الطلي يقف ورى الشاه يمين او يسار ويدخل يده بين رجلين الشاه ويحرث بيده ويثني يده بعض الاحيان لكن اذا طلع يطلع بدون سبلة الشاه
ملاحظه الغنم كلها خفاف غنم انتاج تلد وتدفع
ارجو ان يكون الموضوع للنقاش الهادف المفيد والكل يدلي بتجربته للفائده او حتى مجرد رأيه
l,q,u ggkrha p,g tpg k[]d kv[, lahv;m hg[ldu
