هيلــــــــه وماأدراك ما هيله
السلام عليكم ورحمه الله وبركاته
ملاحظه :::ترانا مطولـــــــــــــــــــــ ــــــــــين
اخباركم اعضاء ومشرفين منتديات غرابيل ان شالله طيبين عساكم مستعدين للاختبارات ان شالله
ابدخل بالسالفه على طول بدون مقدمات
يا سلام يالله من فضلك .. يالله الجنة البااارده .. ايه هذا الجو الزين وهذا الهوا اللي يرد الروح .. ماامداك تلتفت الا والمطر غاسلن حوشك مهب غبار الرياض اللي يمخش الشدوق ..
بهذه الكلمات كانت هيله تحدث نفسها وهي مضطجعه على بلكونة شقتها اللندنيه .. بالضبط الان تميت ثلاث ايام في لندن والحمد لله افتكيت من غثا الرياض وشوارع الرياض ولمبات الرياض وزحمه الرياض ومطاريس الرياض الله الله على دندن.. وشتاء دندن .. وهوا دندن .. وعيال دندن.. اخيرا ابـفـتك من السعوديين الشهبان اللهبان يالله يارب انك ترزقني بواحدن اشقر مملوح يعرس علي ويفكني من ذكريات عيال الحاره اللي اذا كشخوا وحبوا وحده قاموا تفلوا عليها يقالك اتفل عليتس وانتي افهمي عاد ان هالتفله هذي تعبر عن الاعجاب مالت عليكم الحمد لله اللي لحقت على عمري وجيت لندن قبل مايضيع شبابي وينطفئ رونق جمالي
من اول ماوصلت هيله لندن وهي تحاول تثبت بأي طريقه انها فري وكشخه وان بنات السعوديه كل شي عندهم مسموح يعني كانت رايحه وحاطه ببالها انها بتثبت للجميع انه مافيه فرق بين بنات السعوديه والبريطانيات الا الركب البيض .. لا وتبي تعلمهم ان الركب السود هي الموضه مهب الركب البيض اللي الوحده مايبان ساقها من فخذها استغفر الله بس
اول يوم داومت فيه كان بعز الشتاء طلعت الهلّي من شقتها وهي كاااشخه ولا بسة بلوزه حمرا وشورت .. بعز البرد لابستن شورت بس تبي تفهم العالم انها متحرره ومثل الانجليز ماتتحجب ولا شي .. وصلت للمعهد وكل العالم يناظرونها ووش عندها الاخت مفرّعه ووش فيها لابستن مزلط
وصلت قاعتها ودخلت على الاستاذ اللي وقتها كان يشرح .. اول ماوصلت قالت : هاااااي وجلست ورى بآخر كرسي <<< حركات بنات الثانوي .. اول ماجلست قال لها الاستاذ : اين ادواتك الموسيقيه .. قالت وشو وش ادواته .. قال اين الجيتار !! قالت جيتار ولا جدار .. قال الاستاذ : كفى ايتها الماصله وتتطنزين ايضاً .. هذي اخر مره تدخلين الصف بدون ادوات .. الهلي طارت عيونها وقالت فرقعين وش هالمعهد اللي انا مسجلتن به .. تذكرت هيله انها سوت بحث عن طريق النت وكانت تبي أي معهد يظفها ويسجلها بهالوقت ومالقت الا هالمعهد راسلتهم ووافقوا عليها .. بس هي ماكانت تدري انه معهد موسيقى ..
ياويلييييه وش اسوي الحين لا رجعت للديره وش اقول لأبوي اقول له اني رايحـتن لندن ادق عود ولا احمي طيران اكتئبت هيله وانزوت بطرف القاعه .. طلعوا الطلاب كلهم الا طالب انجليزي شعره اشقر ووسيم وماله شنب يعني امرد وشكله يااي اقترب منها رويدا رويداً ..و قال لها : لماذا انتي حزينه هل ممكن ان تعرفيني بأسمك .. التفتت هيله وهي حايمتن تسبدها تبي تهاوش وكالعاده بتقول له ياللي ماتستحي ماعندك خوات ترى انا بنت حموله ولكن ..... ما ان التفتت هيله وشافت الشاب البريطاني حتى صعقت بوسامته الشارخه وطارت عيونها وشوي ويطبن على خدودها من زود الانبهار وقالت له : هيــلا هيــلا اسمي هيــلا ويدلعوني هيلاهـوب
قال لها : اسمك جميل انا اسمي دارتينيان من كاردف ولكني اقيم في لندن قالت: هلا والله بس اسمك غبص شوي وراك ماتختصره .. ممكن تعيده لي مره ثانيه .. قال: اسمي دارتينيان قالت ماش عجزت احفظه وش رايك ادلعك دودي ولا دودهـ قال دودهـ دودهـ اهم شي ان تعود اليك الابتسامه هيا بنا نخرج لنتناول طعام الافطار قبل ان يحين موعد محاضرة العزف على البيانو ..قالت وتسبديه بيانو بعد .. هيا بنا قوه نفطر قبل ان يحين الموعد بس ترى اهم شي ابقط معك انت عليك الشاهي وانا علي السندويش .. صح انا فري بس اعرف الاصول
طلعت هيله مع دودهـ صديقها ومن يومها والصداقه البريئه تجمعهم .. وطيور السعاده ترفرف حولهم كل شي كان يوحي بعلاقه حب صادقه تجمع بين الاثنين .. ومره من المرات في ليلة رأس السنه طلعوا كل العالم يحتفلون الا هيله ماطلعت تقول ماعندنا الاعيدين بالسنه عيد رمضان وعيد الضحيه << صح صايعه بس عندها مبادئ
ولكن تفاجأت بصديقها دودهـ يحلف عليها ويقول علي الطلاق مااحضر العيد الا وانتي معي ومع اصرار صديقها طلعت هيله رغماً عن انفها وهي تقول استغفر الله يارب لاتخسف بي بسبب فسقهم ..
وصلوا للمقهى اللي حاجزين فيه والعالم رقص وردح وكلن يفغص الثاني من زود الزحمه .. واااو زحمه زحمه وبينما العالم مستنزله على انغام الموسيقى الصاخبه .. اتى احد الخوال وبدأ يتغزل بهيله ويقول كم انتي جميله كم انتي جرح ايتها الملعونه .. هل ترافقينني الى المرقص .. مارأيك لو نردح قليلاً .. جت هيله قبصت صديقها وقالت : عندك اياوهـ شف وش يقول هالزول يبين ارقص بعد .. قال لها صديقها لا تقلقي لاعليك منه انه ثمل .. قالت ثمل ولا قمل فرد ممازحاً وقال: قمل ولا صيبان .. وفجأه نزلت دمعه من عين هيله لأنها تذكرت بنات الحاره وكيف ان القمل يعثي بشعورهن وكيف انك ماتقدر تشوف مفرق الجديله من كثر الصيبان وبدأ الحنين الى الوطن يدب في قلبها وبدأ الحزن يعتري عينيها السوداوين .. يا الهي كم هي الغربه مؤلمه .. وقامت هيله وهمت بالخروج من المقهى الا ان صديقها مد رجله و خطرف لها وطاحت بالارض على خشتها و قال: ماذا بك لماذا انتي مستعجله .. قالت له كل تبن وشوله تخطرف لي ..قال: انها مجرد دعابه لايكون زعلتي بس ياخلفهم .. قالت له : اوهـ لا عليك مهب انا اللي ازعل من خطرفه ..
حقاً لا اعلم مالذي اصابني احس ان صدري ضائق قليلاً انه الحنين الى الوطن مااذا افعل .. فأسرع اليها صديقها وقال : اشربي هذا الكأس وقسم بالله ان تمخمخين اخر مخمخه .. قالت : وتسبديه ماهذا هل هذا خمر !! اعوذ بالله صحيح انني داشرتن قليلاً لكن ماوصلت للشرب اهم شي الاخلاق ايها الفتى .. قال اوهـ لا عليك انه عصير تفاح مركز تذوقي منه ولو قرطوع وماجاتس علي تناولت هيله الكأس وبدأت تشفط منه قليلاً ومالبثت الا ان قالت لصديقها: اقول ماعندهم جيك من هالعصير .. ياخزياه لقد ابلشت الساقي كل شوي صابن لي كاس فقال لها صديقها : يا الهي كم انتي قرويه ان هذه هي وظيفته يصب للناس .. فقالت: ههههه يلعن شكلك لقد فشلتني عند العالم كان قصرت صوتك حتى لايسمعك الاخرون ( ترى اللعن اللي صاير هنا عادي لأن هيله سكرانه واصلا هي جالسه تلعن على واحد كافر .)
وماهي لحظات حتى قامت الاخت هيله وتوجهت الى اقصى المرقص وبينما الناس يتراقصون على انغام الموسيقى الغربيه السريعه حتى طبت بينهم وقالت : شدوا ويمتهم جنوبــن عن الديره .. واقفوا وانا قلبي من الهم حيراني .. وماهي دقائق حتى قام الجميع بتقليدها وبدأوا يرقصون سامري وكلن حط بلوزته على راسه وبدا يغطي نصف وجهه ويسوون نفس حركات السامري ويتمايلون على انغام صوت هيله الشجي .. وبعد ان انتهى الاحتفال بالعيد خرج الجميع ومن بينهم هيله وصديقها دودي وتوجهوا للسياره ولكن هيله اصرت ان تقود بنفسها وان توصل نفسها للبيت وبعدين ترجع وتجدع صديقها على بيته << سكرانه وش ترجون منها
ركبت هيله السياره وبدت تعشق الدركسون وبدت تضغط على الشكمان << لااحد يدقق ترى هيله سكرانه يعني ماتدري وشو الشكمان
المهم بدت هيله تضغط وتدوس على البانزين والسياره تصرخ وتقول .. جـقن جـقن عععععن ععععن ععععععن نجــقن نجــقن
كل هالاصوات والسياره واقفه ماتتحرك .. فنظر اليها صديقها وقال: ماذا دهاك يابنت الكلب لماذا تريدين ان تحرقي الماكينه هيا حركي السياره لماذا انتي واقفه تبي تخربين الشسمه .. فألتفتت اليه هيله وقالت : خخخخخخخخخ الم اخبرك عن شيئ مهم اننا في السعوديه ممنوع نسوق يعني خخخخخخ لا اجيد القياده لعنة الله عليك ماتفهم انت .. صعق صديقها دودي وقال : تعقبـين !! هل حقاً انتن لا تقدن السياره .. قالت: سياره ولا طياره .. فرد عليها ممازحاً وقال: طياره ولا بيـاره .. قالت : كل تبن الله يحوم تسبدك .. الزبده انني لااعرف كيف اقود السياره يالها من مصيبه .. ولكنني سأجرب .. وفعلا بدأت هيله بأدارة المحرك ودعست على البانزين وشخطت شخطه كبيره ومافتحت عينها الا وهم في منتصف الغابه وقالت يا الهي كم هي السياقه ممتعه مالت علينا بالسعوديه ماغير نركب ورى ان شاءالله عندما اعود سأقود حمله تحرير المرأه وسوف تسوق النساء السعوديات على يدي .. وانبسطت هيله وبدأت تفحط بالولد وتقول له سأعلمك مهارات السعوديين في ركوب السيارات .. ان لنا طرق معنيه في قياده السياره وبدت تخمس بالولد وتسوي خمسات ودويرات وقالت هذا الحركه اسمها تخميس .. قال: يالكم من مبدعون انها حركه تجعل الرأس يدوخ بشده .. قالت : اصبر ماشفت شي سأوريك الان حركه اسمها العقده وبدت تدخل بين الاشجار بالغابه وقالت هذي الحركه نسميها العقده خخخخخ نصبت عليه لأنها ماعرفت تسوي حركه العقده لأنها صعبه عليها وقامت تسوي خمسات على الشجر .. قال ياالهي كم انتم ماهرون قالت اصبر بعد ابوريك حركه ثانيه .. قال : لاثانيه ولا ثالثه يا بنت الكلفس لقد بدأت احس بالدوار لقد بدأت تسبدي تقلب .. اوصليني الى منزلنا بسرعه .. قالت : حاضر حاضر يابعدهم كلهم.. ولكن بما ان هيله كانت سكرانه فهي لم تستطع الصمود ومايمديكم الا لخت اقرب جدار ومن بعدها أتت الشرطه وقبضوا عليها بتهمة القياده تحت تأثير ام الكبائر وقادوها للسجن وتوسطوا لها السفاره وطلعوا لها تأشيره خروج ورجعوها للديره ..
وانتشر خبرها في ارجاء العائله وقرر والدها تزويجها ولد عمها صويلح.. منها انه يفتك من الهلّي والاهم انه يحافظ على حوش النخل ومايطلع من ورث العائله .. تزوجت هيله صويلح وقلبها معلق بصديقها دودي .. كل ماتحاول تنساه الا انه يرجع لها وكان حبها فاضحها لأنها كل ماتجلس تهوجس فيه يطلع فوق راسها قلوب حمر فيسألها صالح ويقول : خخخخ قلوب قلوب شوفي فوق راستس قلوب !!.. فتنظر اليه بسخريه وتقول اقلب وجهك قسم بالله بالنعله .. فيضحك ساخراً ويقول نعله ولا نمله .. فتقول قسم بالله بالكعب الحين افلقك فلقة ماتقوم منها الا تحت القبر .. حتى ذباتك ماصله ..كل شيئ مختلف بين دارتينيان وبين صويلح اللي اذا كشخ لبس صروال سنه مع فنيله علاقي يقالك اغراء هو وخشته ..
بعد ان عادت هيله للرياض بدأت تتذكر حياة اهل الرياض التافهه وسألت صويلح : اقول صويلح الى الحين انتم تستهبلون و ترقمون عند التحليه .. قال: لا يابنت الحلال وش تحليته الحين خلاص ركبنا مطق كهرب يعني نسقي النخل من مياه السيل على طول .. يأست هيله من صويلح وقالت : مطق يطق جبهتك يالماصل
وقامت وحجزت ورجعت لندن بدون مااحد يدري عنها وماصدقت متى بس توصل .. واول ماحطت رجولها على الارض طارت تركض حتى ماامدها تفصخ عبايتها وتركض وتركض لين وصلت بيت دودي ويوم فتحت الباب تفاجأت وانهبلت .. كان دودي مع وحده ثانيه شقرا وركبيها بييييض يااااهـ مسكينه الهلّي مالها حظ .. انصدمت هيله انصدام مو طبيعي وأثرت عليها الخيانه بشكل كبير ووقفت اول تاكسي وصفقته وطلعته من السيارة وسرقت سيارته وبدت تفحط فيها وماخلت شارع او حديقه او غابه الا وقامت تسوي فيها خمسات ودويرات .. ومن يومها وهيله على رأس المطلوبين في القضاء البريطاني .. عجزوا يمسكونها كل ماحاولوا يصيدونها الشرطه كانت تفلت منهم بسبب تسحيبها لهم ومهاراتها التفحيطيه
حتى ان الشرطه البريطانيه استأجروا قمر صناعي خاص لمراقبه هيله لمحاوله القبض عليها بأي طريقه .. وصارت تتسرب اشرطه فيديو لتفحيط هيله وصارت كل يوم تطلّع حركه جديده
مره حركه( هيل1 ) و( هيل2 )وحركه بنات السعوديه وحركه الحب و الخيانه
وصارت هيله ملهمة النساء في كل العالم وكل بنات السعوديه تعاطفن معها وصارن يسرقن سيارات ابوانهن ويطلعن يفحطن ويقولون هيله في قلوبنا .. عودي الينا ياخلفهم
.. بأختصار .. بسبب الخيانه هيله صارت اسطوره
تحياتي واشواقي :سيبويه
اتمنى ان الموضوع اعجبكم
