طريقه الشوربه اللي نزلت عليها 6كيلو بشهر ولله الحمد
بسم الله الرحمن الرحيم
بقولكم رجيمي الحلو بالشوربه الحارقه للدهون
نزلت عليه 6 كيلو بشهر واحد
ولله الحمد
(( القصه ))
وزني ثاااااااابت من سنين
يصعد كيلوين
وينزل كيلوين
مهما خففت ومهما كليت
نفس الوزن
بالصدفه وحده معاي بالدوام قالت انها
تراجع عند دكتور رجيم ومافادها
ومع السوالف طرى على بالي شوربة التخسيس
المهم
دشيت على قووووووقل
وعرفت مقادير الشوربه
وطبعاً من شخص لشخص تتغير بعض الأنواع
المهم خذيت المقادير اللي احبهم بس
وسويتهم وتوكلت على الله ثم على هالطبق في رجيمي
مكونات شوربتي هي*:
كرنب ( ملفوف أخضر ) وسط
بروكلي 1
سالاري ( الكرفس ) 1
بصله كبيره 1
5 ملاعق شوفان ( العلالي
ملعقتين زيت عافيه
مكعبتين مرقة ماجي
نص ملعقه صغيره فلفل أسود
ماي طبعاً
الطريقه
*تقصصين الخضروات حجم صغير حيل
تحمسين البصله المفرومه بالزيت
وتضيفين مكعبات الماجي والفلفل الأسود
وتصبين ماي على حسب كمية الخضروات
وتحطين الخضراوات المفرومه
وتخلينهم على نار هادئه لمدة 45 دقيقه
لين تذوب الخضروات
وبعدها تضيفون الشوفان لمدة ربع ساعه ( 15دقيقه )
ترا مايحتاج تخلطينها بالخلاط
وطعمها حلو
حطوها بالثلاجه وتكفي من 4 الى 5 ايام
تنشرب مرتين أو 3 مرات باليوم
كل مره اخذي كميه وسخنيها وبالعافيه
انا اشربها للغدا وقبل العشا
الصبح : أشرب كوب حليب أو كابتشينو
والريوق بالدوام خفايف
الغدا : الشوربه وبس
المغرب : شاي / قهوه و تمر او ككاو
الساعه 8م : الشوربه
العشا الساعه 10م : خفايف
أو
أي وجبه بأي مطعم
ومرات مااتعشى لأن الشوربه حيل تشبع
والحمدلله على النعمه
بنااااات أنا بين علي نزول الوزن من بعد أسبوع وانا اشرب الشوربه
لأني كنت بوقفها ماشفت اي نتيجه بس بعد الاسبوع الاول الحمدلله بين
نزول وزني
وأتمنى من اللي تجرب هالشوربه تدعيلي ولعيالي
وأي سؤال أنا حاضره
