بلا اتحاد .. بلا كلام فاضي !! مقال للكاتب اياد عبدالحي

بلا اتحاد.. بلا كلام فاضي !!!


- من حقك يا نايف ! ومن أبسط حقوقك يا نجم ! يا آسطورة !!

- هل قلت أسطورة ؟ أنا آسف !!

- فأنت الخرافة ذاتها ! والمستحيل (زاتو) ! والإعجاز الذي لن يتكرر ! والفلتة التي لا تشهدها البشرية إلا كل (ميتين) عام !!

- خذ راحتك يا عم ! يا عرييييس !! و عـ الآخر !!

- سيبك منهم !

- بلا اتحاد بلا كلام فاضي !!

- أصلاً الدوري ضاع ! والكأس فص ملح وذاب ! والآسيوية (مو باين) لها ملامح !!!

- بلا طفش !!!

- يعني فيها إيه لو سحبت ع الفريق كم يوم ورحت فيها ع الإمارات !!

- كم يوم بس.. استجمام ! و (شوبينج) ! و ..!!..

- ها !! فاهمني طبعًا !!

- والخانة مضمونة !!

- آساسي !!

- وقبل شهرين صارت !!

- آهم شي نفسيتك يا نجم ! أهم شي ترجع (فِـرِش) ! والباقي: مقدور عليه !

- الإدارة (طيبة) ! والرئيس (إبن حلال) !! وإن (كثروا أو قللوا) بينك وبينهم: الخصم !

- والخير واجد والحمد لله ! وفي النهاية: الفلوس وسخ دنيا !! والواحد لو ما اشترى راحته ! يشتري إيه بالله ؟؟؟ آلبوم مثلاً !! أقصد آلبوم (صور) طبعًا !!

- وعلى سيرة: (الصور) يا نجم.. بخصوص صورتك هناك ! بصراحة.. واسمح لي في العبارة: منظرك كان مرة بايخ ! ما أقصد (اللوك) ! بالعكس.. اللوك كان جووناان !!

- بس.. مو نايف اللي (يتحكحك) بنجوم الإمارات عشان عقد !!

- طيب قللي !! أبعت مسج ! هات سطر واتس آب !! وانت عارف علاقتي بـ (الإسبيشل ون) ! وعارف أكثر إنه (الريال) محتاج مهاجم مكان (بنزيما) !!

- على كلٍ.. خذ راحتك يا كبييير ! وارجع وقت ما ترجع !! وما عليك في أحد ! وخصوصًا ((الجمهور)) ! لإنك ببساطة: ما صرت تعني له شي !