خطأ طبي كاد يودي حياتي للتهلكة (قصتي بعد الولادة )

طبعا ترددت اني اكتب موضوعي لاني مو من النوع اللي يكتب مواضيع بالمنتديات
لكني قلت لازم أكتب علشان أفيد بنات ديرتي وانبهكم على بعض أخطاء المستشفيات

انا ولدت بالسلامة الحمدلله من شهر 12 بمستشفى خاص مشهور والدكتورة كانت من المستشفى ولكن بعدما خلصت فتره نزول دم النفاس واهو مدته عندي 10أيام بدت تنزل علي افرازات سائلة مثل الماي لكن لونها بني مصاحبه مع رائحة كريهة جدا ، قلت يمكن هذا السائل عادي عقب الولادة
وسكت وقمت اخذ الأدوية الشعبية المتعارف عليها مثل اللهوم والحسو علشان ينظف الرحم
لكن ماكو فايدة ، صاحبتني اعراض سخونه داخلية خفيفة + آلام خفيفة بالرحم وقلت عادي مال الولادة

بعد شهر من الولادة راجعت نفس المستشفى وشرحت للدكتورة الحالة اللي اعاني منها ، اقالتلي يمكن التهاب عندج ، المهم كشفت علي وشافت الافرازات بعينها واكتفت باخذ مسحة مهبلية يعني ( من بره ليه بره فقط ) وعطتني مضادين غير التحميلة
كملت علاجي والمضاد أثر على حليب صدري والمشكلة ماراحت ، دقيت على الدكتورة قالتلي نتيجة التحليل سليمة ماعندج الهاب ولاشي ، قلتلها دكتورة ترى العلاج مافاد معاي
بااختصار جان تقولي تشطفي بماي وملح ( طبعا هالحجي مادش عقلي ولا اقتنعت فيه )

رحت حق عيادة حكومية وفحصتني الدكتورة جان تصرخ تقول شنووو هذا فيه شي داخل

انا قلبي طاح قلتلها شنو فيه ؟؟؟ يابت ملقط وطلعت من الرحم شاش كبير متلوث بدم فاااسد
ونزل من وراه دم النفاس كان محبوس

تقولي الدكتورة حمدي ربج انه هالدم الفاسد مااختلط مع باجي الدم بجسمج جان التهبت باجي اعضاء الجسم وصرتي بعداد الاموات خلااص

الله ستر حمدلله لكني رحت لادارة المستشفى واشتكيت ووريتهم صورة الشاش ودقت علي دكتورتي اللي ولدتني واعتذرت عن الخطأ الطبي اللي صار
لكني انا وزوجي قررنا نرفع قضية عليهم وقاعدين ندور محامي أو محامية زينة ماتاخذ وايد أتعاب ( ياليت اللي قرت الموضوع وعندها أحد ترشحه تبلغني وما تتأخر)
عموما ديرو بالكم من هالمستشفيات الخاصة لا تغركم سمعتهم الاخطاء الطبيه تصير عندهم أكثر من الحكومي
وحسبي الله ونعم الوكيل