أركدوا شوي يالربع

بسم الله الرحمن الرحيم

صراحه جماهير الهلال عاطفيه لأبعد الحدود
مثل ماقال شبيه الريح من شوط واحد سيء تنسف كل شي قامت به الاداره

يعني مثلا :

1- بن مساعد حقق رغبات الجماهير الهلاليه واللي يحتاجه الهلال في فترة الانتقالات الشتويه , وهو ابعاد مانقان وجلب مدافع اخر , وابعاد هرماش وجلب محور دفاعي اخر
مو هذا اللي كنتوا تطالبوا فيه ؟ اوكي طالبتوا فيه وحققه لكم وش تبون بعد ؟
تبونه يطير المدرب ؟؟
سلامات !!!!! مدرب يبعد في نصف الموسم معناه انتكاسه اكبر للفريق + مو معقول يالربع كل ما جا مدرب شبيتوا نيرانكم عليه لين يشوتوه !
متى راح نستقر ونثبت فنيا !!!
شوفوا الفتح ما وصل للي وصل له وهو فريق مغمور سابقا الا بسبب الثبات على الجهاز الفني , فتح الجبال 5 سنوات يدرب الفتح , وتبون تفهمون معنى كلامي شوفوا سنواته الاولى مع الفتح ونتايجها وراح تعرفوا وتفهموا قصدي
طولوا بالكم واركدوا شوي يالربع

2- الهلال امس يلعب بمحور جديد توه اول مباراه له اكيد ما بيكون منسجم مع اللاعبين سواء الوسط او الدفاع ,
الهلال امس يلعب بدون قلب دفاع مميز , مانقان مشي والبديل للحين ما وصل والمدرب لعب حسب الامكانيات الموجوده
ماعنده الا يحط الزوري قلب والمرشدي معه في ظل ضعف مستوى بقية القلوب الحاليين مثل المسلم وغيره
لوموا المدرب لو عنده قلوب مميزه وخلاها احتياط او حطها في مراكز مختلفه
الدفاع امس هو اللي نكب الفريق مو المدرب , الهدف الاول غلطة واضحه من المرشدي , تاخر في تشتيت الكوره وجا الهدف , والثاني غلطة من الزوري , بدل ما يبعدها صح صلحها للمهاجم وبرضو يعذر نوعا ما لانه حاول ابعادها وجات كذا للاسف
طيب القلوب الحاليه للفريق مستواها كذا والمدرب ما عنده غيرها واضطر يلعبها تلوموه ليه !!!!!!!
كان الهلال عنده هوساوي بس ما يبي الهلال , غصب يقعد مثلا !! بسلامته ,
والرئيس ما قصر جاب مدافع محترف بدله ولما انتقدتوه ابعده وجاب غيره وش تبون بعد !!

بس اصبروا يجي المدافع الاجنبي وينسجم المحور الجديد وان شاء الله الامور تكون ممتازه

3- الهلال امس يلعب اول مباراة له بالدور الثاني بعد توقف الدوري مده طويله , وغالبا اول مباراة بعد انقطاع طويل يكون المستوى مو ذاك الزود

4- الهلال امس يلعب بملعب الاتفاق على ارضه وبين جماهيره واي فريق يكون شرس في ارضه بالتأكيد

5- الاتفاق مو فريق ضعيف او مهدد بالهبوط , الاتفاق فريق ترتيبه السادس تقريبا , فريق جيد برضو مو سيء او ضعيف حتى تشبوا لا تعادل معنا بهذه الطريقه المستفزه وخصوصا انه يلعب وسط ارضه وجماهيره

6- الهلال امس سجل هدفين وخلق فرص كثير لكن ما وفق الله واتسجلت , يعني هجوميا ما قصر الفريق وقدم مستوى جيد
المشكله كانت بالدفاع واسبابها ذكرتها في النقطه 2 , وهو امر خارج عن يد الرئيس او المدرب حتى ,

7- الهلال حاليا المركز الثاني بالدوري وينافس عليه بقوه , وواصل لدور الاربعه بمسابقة ولي العهد , يعني الحمد لله الاوضاع لازالت في السليم , والآمال كبيره ان شاء الله اننا نحقق البطولتين كلها ,
ولا تنسوا تقارنوا بين وضع فريقنا وبين الفرق الكبيره مثل الاتحاد والاهلي والشباب
كلها متخبطه بالدوري + طلعت من كأس ولي العهد , يعني الحمد لله الهلال لا زال الافضل والاحسن وان شاء الله دوم
بس شجعوا بعقلانيه وأوقفوا مع الفريق وساندوه واتركوا عنكم التشجيع العاطفي اللي يدمر وما يبني ابد

وسلامتكم ,,,