سيبوا كامل الموسي في حاله

كل واحد عنده كيبورد كتبلوا كلمتين عن كامل تقيل , يكسر التسلل مادري أيش. نسيوا إنوا شلهم الفريق لمن كانوا يعانوا من جفين , نسيوا كيف الدفاع كان شوارع وكيف كان كامل أسد في الدوري . ميزه كامل إنوا هادي وعنده مخ يمكن التسلل مشكلة بس هادي مع الإنظباط و التمرين تتحسن . أهم شي مانكون جمهور ناكر جميل , يعني بالعربي نستحي شويه. مو موسم نطلع اللاعب السما ومع أول غلطة ننزلوا أسفل سافلين .

والله عيب إلا ينكتب في المنتدي بعدين كيف تربي عند اللاعب حب الفريق والإنتماء ليه إذا إنت وأنا و كلنا مانوقف معاه. كيف يحس اللاعب إنوا هذا فريقه وهذا الجمهور خلفه وفي ظهره وإنوه راح يشد منه وقت الإنكسار. للأسف الجمهور يبغي اللاعب دايما يسجل ودايما يقطع ودايما يباصي بس تري مافي أحد كامل إلا سبحانه وتعالي.

وترا أي لاعب تجيبوه راح تنكبوا إذا قاعدين تستنوا غلطاته بدل ما تساعدوه يتخلص منها. بالله كيف يحس اللاعب وهو عارف إنوا نفس الناس الي مدحه أمس راح يبهدلوه اليوم وينسولوا كل شي عشان ماشات الكوره في الباب.

بصريح العباره مافي لاعب راح يقتل نفسوا عشاننا أو عشان الفريق لأنوا عارف إنه بالنسبه للجمهور اللاعب كشخص كإنسان عنده ظروف عندوا مشاكل عندوا إرهاق عندوا تعب مايهمني المهم أبغاك تنتحر في الملعب. وإذا ماسويت كدا فإنت فاشل وتعبان و أرمو برا النادي . بس مين لاعب في العالم من ميسي لي كريستيانوا يكون مستواهم طول عمره ثابت.

كلمه أخيره حسس اللاعب إنك أخوه وإنك تخاف عليه وعلي مصلحتوا وأوقف معاه يعطيك أكتر