يا إدارة .. و يا إدارة .. ويا إدارة .. الله يعين الإدارة

السلام عليكم ورحمة الله وبركاته ..

حاب اليوم اناقش موضوع مهم وتردد كثير في الفترة الأخيرة من خلال مطالعة سريعة لبعض المواضيع في المنتدى

ويمكن الكل ملاحظ ..

للأسف بعض الجماهير صار يتهم الإدارة في الطالعة والنازلة ..

على سبيل المثال لا الحصر ... تلاقي البعض يقول .

يا إدارة ما نبي اللاعب فلان كفاية فشل يا إدارة طفشنا

وفي المقابل نلاقي ناس تقول

يا إدارة إلى متى سياسية التفريط في النجوم


:s5s: بصراحة احس هالشيء يشوشر على الإدارة كثير ..
لأنها لو اتخذت عقوبات احترافية بحق لاعب معين نلاقي الجمهور يعترض
ولو تغاضت عن سلوكياته تلاقي الجمهور يلوم الإدارة ..

من ضمن المواضيع المضحكة

يا إدارة ترى لاعبين الهلال يسمرون في استراحة مع لاعب نصراوي ؟!!

يا إدارة وينكم عن اللإعلاميين اللي يسبون فلان في الفضائيات ؟!!

يا إدارة ما نبي مانقان يا عالم فاشل ما نبيه خلوه يروح

الإدارة بس تفكر في الفلوس والاستثمار ليش تفرط في مانقان في هذا الوقت

يا إدارة ما نبي ذا المدرب ذا المدرب سباك ما عنده سالفة ..

يا إدارة وش سياسية تغيير المدربين هذي اللاعبين مو قادرين ينسجمون مع خطة

يا إدارة ليش إلين الحين ما حسمتوا ملف التعاقدات بتقفل فترة الانتقالات

يا إدارة كيف يروح اللاعب فلان ويوقع مع فريق ثاني بدون مردود مالي للهلال

يا إدارة هو كل ما قال لاعب ابي اروح تخلونه يروح وتبيعون عقده

الإدارة شكلها ما تفكر إلا في المادة فقط

يا إدارة يا إدارة يا إدارة يا إدارة يا إدارة


مع احترامي لجميع الآراء وعارف مدى حبهم للزعيم ودايم حابين يشوفونه في القمة
هذا طموحنا
هذا آملنا

لكن ممكن نكون أكثر عقلانية ونترك الإدارة تعمل بهدوء زي الفترة الأولى :yes:
كلكم تتذكرون الانتقادات اللي طالت ويلي
الموسم الأول
في الموسم الثاني ومع الاستقرار قدم مستويات خيالية

كلكم تتذكرون الانتقادات بسبب التخلي عن طارق التايب والتعاقد مع نيفيز


حتى الأمير عبدالرحمن او ما أستلم الإدارة انتقد كثيراً من إعلاميين هلالين كبار ..
قال بالحرف الواحد لا تستعجلون النتائج عطونا وقت ..

وشفنا فريق بعد ما كان يفوز بطلوع الروح في آخر الدقايق
صار يجندل الخصوم بالخمسة والستة


ممكن نتحلى بالصبر أكثر ونترك الإدارة موسم واحد فقط تعمل بهودء ؟ بعيد عن ضغوط الجماهير الكبيرة ؟
الإستقرار الفني والإستقرار الإداري
حول الفتح من فريق عادي إلى المركز الأول
حول لاعبيين بإمكانيات بسيطة
إلى نجوم في الملعب

الهلال ما راح يحتاج 5 سنين زي الفتح

الهلال يحتاج بس صبر سنة وحده
موسم واحد

ندعم فيه الفريق ونشجع اللاعبين ونثق في قرارات الإدارة ونحترم رأي المدرب
بس موسم واحد

قدم الدعم لناديك بكل الطرق المتاحة
شراء تذاكر + اشتراك في باقات موبايلي + شراء منتجات الهلال وغيرها من الطرق


لا تستعجل وتحكم على النادي بالفشل بعد مباراة وحدة فقط ..

لا نصير عاطفيين


وعشان تعمل الإدارة بكل طاقتها تحتاج منا الصبر وعدم إطلاق الأحكام المسبقة ..
دعم اي قرار تقوم به الإدارة .. وعدم التعاطف مع بعض الأسماء
لأننا اصبحنا في زمن (( الاحتراف ))

المدرب عنده اسلوب معين ونهج المعين المفروض نحترم قرارات المدرب
لأن احترام الجمهور للمدرب يفرض على اللاعبين إحترامه

لكن اللاعب اذا شاف الجمهور يسب المدرب ما راح يكون مثل لما يشوف كل الجمهور يشيد بقراراته


اما اللاعبين جميعهم اي لاعب يرتدي شعار الهلال يحتاج منا الدعم والتشجيع
يحتاج منا المساندة
يحتاج منا نزرع فيه الروح ليقاتل عن اللونين الابيض والأزرق
يحتاج منا التصفيق له وقت الإبداع
وتذكيره بالإنجازات في حال هبوط المستوى كتعزيز له على العطاء



ما راح اطول في الكلام بس والله انا كـ مشجع زرت المنتدى بصراحة ضاق صدري من الكلام الموجود ..
وسألت نفسي كيف تكون معنويات اللاعبين وهذي ردود الجمهور

ما راح اقول ليش ما نصير زي جماهير الفريق الفلاني او العلاني

لا لا لا

راح اقول متى نرجع زي أول متى نرجع ( الرقم الصعب ) متى نرجع الجمهور اللي ينضرب فيه المثل
متى متى ؟

متى يرجع (( اللاعب الخفي ))




تحياتي لكم
ابو المعاريف