وش زودهم حتى علينا الانجليز
حنا وياهم ترانا تيز تيز
لى متى هذا التخلف يالعزيز
مسس تاتشر مثلها مثل ام ريم
كل يوم من المره نسمع عتاب
ليش مانسمح لها بالانتخاب
حلمهن اصبح سراب في سراب
وين راعي الفكر والرأي السليم
نبي الحرمه عضو بنت الحلال
ماعلينا من حكي قيل وقال
ليش مانعطي المره حنا مجال
ونلعن الشيطان وابليس الرجيم
خلو نص المجتمع نص الحياة
تدخل المجلس دخول الفاتحات
لجل تلبس بشت وتقط العبات
لى متى عقلك وتفكيرك قديم
يصبح المجلس مثل شاهي الضحى
والرجل يطبخ لنفسه لا صحى
دام لاتطبخ ولا تطحن رحى
لا ولا ترضع ولا تربي فطيم
لي متى هذا التخلف والجهل
ليش صارت مشكله حلها سهل
روح صوت انت وامك والاهل
خلها تمشي بخط مستقيم
ياجماعه مانبي الفرصه تفوت
افتحو بيبان ربات البيوت
ان تحقق حلمها والا تموت
ارحمو يرحمكم الرب الرحيم
ليش سببتو لهالمراة الم
السياسه حلمها منذ القدم
فيه مهم وفيه في الدنيا اهم
دين ناقص عقل ناقص يا غشيم
سلم الأطفال بيدين الخدم
وانت خلك بينهم مثل العلم
الغدى صمول مولازم لحم
يعني احسنلك اذا تسوى رجيم
ليش نهضم حق بدريه وسارة
ليش مانركض وراى ركب الحضارة
باكر تشوف المرة وسط الوزارة
تتوسط للمواطن والمقيم
واتصدى لكل مشروع خطير
وايضاً تدافع عن حقوق الفقير
مو بعيد العضوة تستجوب وزير
بس ماتستجوبه كانه وسيم
ولو فرضنا قسم الله ونجحت
وكل نسوان البلد معها فرحت
من يقول انها عقب هذا فلحت
حتى ولو كان كيدهم كيداً عظيم
طبعا معروف الانتخاب لأربع سنوات
عامها الاول قضى حمل وولادة
وحملت عقب النجاح من القرادة
المواطن مالقى منها استفادة
من سببها يصفق الكف ويهيم
وعامها الثاني اجازة للامومة
ما معاها وقت والورعان كومة
العضو يرتاح وترتاح الحكومة
عام ماتسمع لها سينن وجيم
وعامها الثالث قضى كله سواد
مات ابو العيال ودشت بالحداد
وش تسوي امر من رب العباد
عظم الله اجرها والله كريم
وعامها الرابع تبي تدور رجل
يومه المرحوم وافاه الاجل
توها صغيره وهو مات بعجل
يوم عنها مات عاشت في جحيم
خلو الحرمه تربي عيالها
بيتها هو شمسها وظلالها
المره بالبيت تلقى حالها
مالنا ومال انتخابات الحريم
