كتاب يعلمكم ثقافة الحياة الزوجية الصح !!

السلام عليكم ورحمة الله وبركاته :eh_s(7):

شحالكم عساكم بخير وسعادة

توني سويت بحث عن الكتاب اللي بخبركم عنه بس ما لقيت اي موضوع عنه،
عشان موضوعي مايكون مكرر، هذا أول موضوع لي فالمنتدى وأصلا ماكنت
ناوية أحط مواضيع P: بس لأنه اللي بقولكم مهم لكل بنت مقبلة عالزواج، ولكل
متزوجة والكتاب أهم، قلت لازم أحط موضوع عشان تستفيدون وأفتح عيونكم
ع شي يمكن يكون يديد للبعض . .

بنات عندي كلام وايد اقوله وابا اقولكم كل شي أعرفه لكن الموضوع عن
الكتاب، ف أقولكم انسوا اللي تعلمتوه قبل، افتحي صفحة يديدة ف حياتج،
لأنج بتتعلمين الثقافة الزوجية الصح من خلال هالكتاب، وبتعيشين حياة زوجية
حلوة هادية، وانتي وريلج بترتاحون وتستانسون بإذن الله . .


http://ecx.images-amazon.com/images/...500_AA300_.jpg

Why Men Love Bitches
للكاتبة : Sherry Argov

الحين برمسكم عن هالكتاب :

صح العنوان فيه كلمة Bitch والكاتبة ما تقصد المعنى المعروف لهالكلمة
تقصد الحرمة اللي تكون قوية الشخصية ( مب يعني طويلة لسان لأ القصد
هو مؤدبة وهادية وف نفس الوقت ماترضى الغلط ع نفسها وتتصرف بطريقة
ذكية انثوية لو انحطت ف موقف ) تعتمد ع نفسها، و تقدر تعيش بسعادة و
رضى مع أو بدون رجل ف حياتها . .
الكاتبة أجنبية ولحد الحين ماشي نسخة عربية منه، و هي تتكلم ع
أساس كيف تتصرفين ويا ال Boy Friend ف يعني في أشيا ما تنفع ما
نقدر نسويها ويا الزوج، غير جذي بتتعلمين كيف تتصرفين ويا ريلج وكيف
تردين عليه ف بعض المواقف وكيف تغيرينه بدون مايحس انج تغيرينه
وكيف يتعلق فيج ويتم معجب فيج بعد مرور فترة ع زواجكم، يعني هو
كتاب تعليمي لكن جدا ممتع . .

الحين بسأل كم من سؤال للمتزوجة :

* ريلج أيام الملجة حنون، رومانسي، محب وعقب العرس يعني بعدما سكنتوا ويا بعض استوى غير؟؟
* طلعات ريلج اكثر من يلساتكم ويا بعض؟ أو ريلج وايد يطلع ويا ربعه؟ يرد البيت متأخر؟
* تحسين انج وايد زينة وياه وماتقصرين ف حقوقه وتضحين عشان علاقتكم
لكن هو مايقدر، مايضحي بالمقابل، يتصرف كأنه من وااااجبج تضحين، ما يسعدج كثر ما انتي تسعدينه؟
* ومع كل اللي سويته عشانه وعشان رضاه ريلي يخوني!! ليش ؟!
* امووووت واعرف ليش الريال يموت فالعشيقة ويلبي كل طلباتها !!!


الأسئلة ما تخلص لكن هذا واقع والكثيرات يعاااانوون منه، شي منتديات
ومواقع تعطي معلومات غلط عن الحياة الزوجية مثل كوني له الأم والأخت
والحبيبة والشغالة والدريول :D ثم البسي فستان قصير شفاف دانتيل
انثري ورود و اضيئي شموع ثم سيصبح خاتما في اصبعك ... الخ وكأنه
خلاص هذي هي الحياة الزوجية :eh_s(10): ولما البنت تتزوج تكتشف
انه النصايح المعروفة فمجتمعنا أو اللي تعلمته بصوب والحياة الفعلية ف صوب
:eh_s(16):

بتلقين أجوبة كل أسئلتج ف هالكتاب وشي كتاب ثاني كتبته عن الزواج
بالتحديد، لكن من نظري هالكتاب هو الأساس، يعني لازم أول شي تقرين
هالكتاب عقب لو حبيتي اقري الكتاب الثاني . .

كلمة للبنات والمقبلات عالزواج :

الزواج مب كله رومانسية وحب، بتكون عليج مسؤولية وواجبات تأدينها
انسي المسلسلات والأفلام كله جذب وتمثيل، الواقع غير واللي فالتلفزيون
والنت غير ( اسألوا المتزوجات :) ) لا تتحبطون، شي محبة بين الزوجين
وهي أحلى عن الخداع اللي تشوفونه، عيشي حياتج وعمرج لا تزعلين
لانه ربيعاتج او اللي ف عمرج تزوجوا وانتي بعدج، إذا مكتوب لج تعرسين
بتعرسين غصبا عن الكل، ف لا تشيلين هم الزواج، خليج مرتاحة من هالناحية
حبيبتي استانسي،وجربي أشيا يديدة دلعي عمرج سوي كل شيء يسعدج :eh_s(21):
طبعا بالحلال . .


بنات فديتكم كل شيء سهل وبيتيسر بالتقرب والتوكل على الله، اعطي الله اللي يحبه
بيعطيج اللي انتي تحبينه، صلي واذكري الله وصومي وسوي العبادات بأفضل ماعندج
تذكري إنه لا ريلج ولا خطيبج ولا اي مخلوق يتحكم فسعادتج، سعادتج تي من أدائج
لعباداتج، سعادتج من مسؤوليتج، انتي اسعدي نفسج لا تترين مبادرة من حد . .
اقري نصايح الدكتورة ناعمة الهاشمي، لا يهمج الكلام اللي يقولونه عنها، اللي يهمج
تستفيدين من خبراتها، تعلمي وطبقي، واقري هالكتاب وخلااااص أمورج تمااام التماام
بإذن الله . .


ربي يسعدكم ويوفقكم ويرزقكم بأزواج صالحين حلوين، وأنا أحب هالمنتدى وأحب
رمستكم واللي تبا تنقل تكتب نكي واسم المنتدى و Thanks for the attention :eh_s: