مقال للكاتب الصحفي فتحي حلواني الملقب بأبو فتو ...انا اخوكم احمد حلواني

بالبلدي الفصيح

المعلمون والمعلمات ودربيل الأمانة

فتحي حلواني

دحين انت مشتري هادي الدرابيل كلها لمين؟ هادي الدرابيل اشتريتها لسكان العمارة لأنه بعد شوية حنطلع السطوح وحنشوف بالدرابيل كل الحفر والمطبات اللي موجودة في جدة وبعد كده حكتب تقرير وأرسله على أمانة جدة، حضرتك جالس تتريق؟! أنا برضو اللي بالتريق والا أمانة جدة يعني ما يكفيها الخبر اللي كان منشور في شهر رمضان سنة 1429 واللي قالت فيه بالبنط العريض «ساهم معنا في القضاء على الحفر الوعائية والهبوطات في شوارع جدة» وإلى اليوم ما حصل شي من كلامهم، تجي تكمل الناقص بخبر يفقع المرارة ويجيب الهم والغم والنكد.. وايش هوه ده الخبر اللي قالت عليه أمانة جدة يا سيدي؟ بتقول يا ستي انها (حتستخدم الأقمار الصناعية لتحديد مواقع الحفر في الشوارع) أنا أبغى أفهم هادول حقون الأمانة بيضحكوا على مين؟!! الحفر والمطبات في الشوارع يا كترها في جدة وباينة للأعمى وما يحتاج لها لا أقمار صناعية ولا غيرو إلا إذا كان حتستخدم الأقمار الصناعية عشان الحفر الصغيرة اللي ما تنشاف بعيوننا هدا شي تاني، وبعدين لا تتعبوا نفسكم الأقمار الصناعية اللي حتستخدموها حيجيها تشويش من كتر الحفر والمطبات اللي في جدة، الحفر والمطبات محتاج لها أمانة يا أمانة، الحفر والمطبات يحتاج لها ناس تتلحلح من مكاتبها وهمّ حيشوفوا العجب العجاب من آلاف المطبات والحفر اللي تسر الناظرين والماشين والراكبين وبعدين السؤال البسيط اللي ابغى إجابته من حبايبنا اللي في الأمانة شوارعكم غير شوارعنا اللي نمشي عليها والا إيش الحكاية يا بشوات..
• تراجعت وزارة التربية والتعليم عن قرارها بخصوص اجازة المعلمين والمعلمات بس اللي ابغى افهموا ليش وعشان ايش كده بس عشان يطقوا حنك ونكادة بس، طب ليه كده يا وزارة التربية والتعليم تحطي نفسك في مواقف بايخة على قولة حبايبنا المصريين، ايش الفايدة من قرار بتنشريه وبعد كده بتلغيه وانتي عارفة انه حيلاقي اعتراضات كبيرة من كل المعلمين والمعلمات، يا وزارة التربية والتعليم لا تزرعي الغل والزعل بينك وبين المعلمين والمعلمات يكفيهم القرارات اللي جاتهم قبل كده وبهدلتهم آخر بهدلة، الاجازة الاضطرارية كانت عشرة أيام وبقرار منكم صارت خمسة ايام وغير كده حرمتيهم من مكافأة نهاية الخدمة المدنية وغير كده تطبيق المادة (118أ) على 204 آلاف معلم ومعلمة وحرمتيهم من رواتبهم وحقوقهم المالية وغيرو من القرارات اللي ساكتين عنها المعلمين والمعلمات، يا وزارة التربية والتعليم يكفي المعلم والمعلمة انهم بيوقفوا على رجولهم بالساعات وصوتهم بينشقر من كتر شرح الدروس ولو تعرفي انهم بيداوموا في مدارسهم وحبوب وادوية تسليك الحلق في جيوبهم، يا وزارة التربية والتعليم لا تحرقي دم المعلمين والمعلمات اكتر من كده اللي فيهم كافيهم، يا وزارة التربية والتعليم احترمي وقدري المعلمين والمعلمات وافهمي انهم بيقوموا برسالة عظيمة للاجيال والا نسيتي ايش بيقول الشاعر أحمد شوقي في قصيدته «قم للمعلم وفه التبجيلا *** كاد المعلم ان يكون رسولا»، وعيشوا كتيييييير تشوفوا كتييييير.
هرجة
إلى كل الدكاترة والمستشارين في وزارة التربية والتعليم دخيلكم ابوس راسكم اعتمدوا تدريس اللغة الانجليزية من الصف الاول الابتدائي ترى الحال لا يسر لا عدو ولا حبيب وانتو أدرى وأبخص وسلامتكم.