ابي شوركم يالمتزوجات

قوه بنات شلونكم ان شاء الله بخير

انا مملجه ع واحد من العايله ونكلم بعض
وانا وايد خايفه لان صايرين بس هوشه بهوشه ومشكله بمشكله

اول شي يبيني البس عبايه قلت له اوكي موافقه وبروح افصل سواها لي مشكله متي ومتي تروحين
ولي متي تطلعين ببدل ؟

للعلم انا صغيره عمري 18 سنه بس وخاصه لما اشوف اللي حولي خواتي وبنات خالاتي كلهم بدل يعني شوي تحسين ان ماودج ورفيجاتي كلهم نفس الطريقه بدل وشعر يعني حتي انا بنت و ابي اكشخ والبس
ماودي البس اللحين العبايه :(

وحتي خواتي لما قلت لهم ابي اللبس عبايه مالقيت اللي يشجعني كلهم يقولون لا وليش وصاروا يقولون لي ااي عشانه من اللحين ممشيج جذي لا تخلينه يغصبج مو بكيفه وليش وشحقه تضايقت حيل


وعشان ما اظلمه ترا اول ما بدا يفاتحني بموضوع العبايه كان اسلوبه حلو وان انا اخاف عليج واغار عليج والعبايه ستر للبنت ولا تغرج الدنيا وحتي بعبايه تقدرين تكشخين بين اهلج وببيتج وباماكن الحريم :( بس مع الايام لاني طنشت بدا يعصب

وثاني شي انا اكبر وحده بالبيت وانا اللي اودي خواتي احيانا المستوصف او الجمعيه وهالسوالف
اطلع دايم السوق مع اختي اللي اصغر مني بسنه او رفيجاتي متعوده طلعات وروحات وردات بروحي مع رفيجاتي او اختي وامي وابوي راضين وامي مرا كبيره وتلهي مع خواتي اللي بالابتدايي وجدتي فما تقدر كل شوي تطلع وتروح معاي

يقولي مافيه طلعه مع رفيجاتج تطلعين مع امج او اخوج او احد كبير :(
زين انت تدري بحياتي ونظام حياتي قبل لا تاخذني ليش تاخذني دام كل شي بتمنعه :(

بنات انا احبه و ابيه بس ابي حل ابي ارتاح من هالمشاكل ورفيجاتي مابي اخسرهم شلون اقولهم لا من اليوم ورايح ماقدر اطلع معاكم :(
انا علاقتي ضعيفه معا بنات خالاتي مو حيل معاهم بالمره رفيجاتي هم خواتي وكل شي بالنسبه لي وصارلنا مع بعض 8 سنوات من الابتدايي من شويه يا بنات ومن المتوسط نطلع مع بعض ونروح مع بعض نتسوق مع بعض وكل اسرارنا مع بعضنا شلون ابعد عنهم جذي

بديت احس اني ندمت علي اني كلمت خطيبي وودي اقوله خلاص لا نكلم بعض بس ادري بيفسرها غلط ويقول ليش عشان قلت لج لا تطلعين معاهم ولبسي عبايه تبين تقعدين براحتج
والله مدري شسوي ومابي اقول لامي لان مابيها تتدخل وهذي حياتي مابي خواتي وامي يدرون عشان خواتي ما يقعدون يسكرون فيني ويكسرون فيه قدامي
احس حياتي كلها باديه تتغير مدري انا قد هالتغير ولا لا كل شي بحياتي القديمه يبي يغيره :(