إلى جمهور نادي الإتحاد , مع التحيه ..

بسم الله الرحمن الرحيم

كيف حالكم يا جمهور العميد ..

هذا أعتقد أول موضوع لي من أول ماسجلت ف المنتدى . حاب أقول بعض اللي في خاطري , و ان شاء الله ما أكون ثقيل عليكم ..

( التعاقدات ف الفتره الشتويه )

خلونا عقلانيين في طلباتنا , هاليومين من كثر مواضيع اللاعبين حسيت ان اللي بكتبون سماسرة و وكلاء لاعبين مو جماهير نادينا الحبيب .. كل واحد حاط لاعب وكل لاعب مختلف عن الثاني بعضهم أساساً مرتبطين مع عقود مع أنديتهم والبعض منهم أسعارهم نار ! ( إذا أردت أن تطاع ف اطلب المستطاع )

بمعنى انه لو قدرنا نتعاقد مع أجانب مثل ديبا ألونقا كـ مهاجم , والحاج عيسى كـ صانع لعب بدلاء عن فوزي عبدالغني و سوزا , والابقاء على الشربيني و امبامي
ومحلياً الحمدلله تعاقدنا مع الفريدي و تركي الخضير ,, ف نحتاج قلب دفاع مثل بدر النخلي ( الفتح ) .. ظهير أيسر مثل عكاش ( الاتفاق ) أو ماجد عسيري ( القادسيه ) أو أضعف الايمان تصعيد محمد العمري من الأولمبي ..

( ظروف النادي والاداره )

الحين الواحد يكتب موضوعين مختلفين
الأول ( الإدارة مفلسه ولازم تمشي و و وإلخ )
الثاني ( نبغى الإدارة تتعاقد مع فلان وعلان ) ..
طيب ياخي مو انت على كلامك الإدارة مفلسه , إذاً من وين تجيب فلوس للتعاقد مع اللاعبين !!؟

الاداره عليها ديون لازم تجدولها + رواتب متأخره للعاملين قبل اللاعبين .. كيف نطلب من لاعب يعطينا كل ماعنده وهو راتبه مايستلمه وعليه التزامات وظروف الله يعلم بها .. الأولى ياجماعة الخير اعطاء اللاعبين رواتبهم ومستحقاتهم .. رسولنا الكريم عليه الصلاة والسلام قال ( أعط الأجير أجره ، قبل أن يجف عرقه ) , لاتقولون ف الآخر بياخذ متأخراته كلها , طيب راتب على راتب على راتب مو كثير على واحد عنده التزامات ماليه ؟؟ والله لو الواحد فينا أنقطع راتبه شهر واحد راح مكتب العمل والعمال مباشره يشتكي خصوصاً اللي عليهم التزامات مادية .

( بعض الحلول )

عقد الرعايه ثم عقد الرعايه ثم عقد الرعايه يا ادارتنا الموقره ..
ولازم ايجاد طرق لتوفير سيوله ماليه لتسديد التزامات وديون النادي وتسليم اللاعبين رواتبهم وحقوقهم .. مثلاً :

1- تنسيق عدد من اللاعبين المنتهين أو عرضهم على لائحة الانتقال مثل ( مبروك زايد , المزيدي , المنتشري , عبدالمطلب الطريدي , مشعل السعيد , رضا تكر , علي الزبيدي )
2- إعارة نايف هزازي إذا ما وُجد العرض المناسب لأنه ( صاحب بالين كذاب ) اللاعب قبل خطبته كان شبه كويس وفجأه أنتكس الحال .
3- إيجاد الدعم من أعضاء الشرف .
4- متجر النادي يجب أن يرى النور في أقرب وقت .
5- الأهمممم مننا كـ جمهور .. عن طريق الإشتراك في بطاقة ( عامل ) و الإشتراك في ( جوال النادي )

( أعضاء الشرف )

أما عن أعضاء الشرف .. ف أشوف يا أخوان انه مانضغط عليهم ونتركهم يحبون النادي اللي نحبه بطريقتهم بدون مانجبرهم يدفعون , اللي حاب يدفع جزاه الله خير واللي مو حاب أقل شي يكفينا من الثرثره في وسائل الإعلام .. وترى الإنسان يتعب ويجتهد عشان يجمع قرش على قرش لين يحصل على ثروة و في الآخر نجي بكل سذاجة ونقول له أصرف اللي وراك وقدامك ع النادي ! كيف نقول للواحد أدفع للنادي عشانك تحبه وترى ما راح يرجع لك ريال .. هذول تجار جمعوا فلوسهم ( الله يغنيهم ويغنينا ) ولو ما في عوائد ماليه لهم ماراح يدفعون .. والحل أعتقد انه موجود في ( الخصخصه ) ..

( الإعلاميين )

أما الإعلاميين الأعزاء .. ف أعتقد إن الجمهور أصبح الآن يفرق بين الغث والسمين , صرنا نعرف المنتفع من المحب , اللي يدور على مصلحة النادي واللي يدور على مصلحته الشخصيه , إحنا كجمهور رفعناهم وبرضوا احنا كجمهور نقدر نلفضهم خارج النادي ونقاطعهم لو ماعدلوا الحال وأتحدوا وخلوا كلمتهم وحده في وجه ( مصالحهم الشخصيه أولاً ) و أعداء الاتحاد ثانياً .

..

ظروف الاتحاد الصعبه ماراح تستمر , والأيام الحلوه راجعه بإذن الله ..
من أهم ايجابيات الاداره هي عودة الاستاذ حامد البلوي الشخصيه القوية في إدارة الفريق واللي قال في تغريدة ع تويتر ( جماهير الاتحاد والله لن اجامل اي لاعب سواء صغير او كبير وسوف اعمل لمصلحة نادي الاتحاد وفي الدرجه الاولي الناحيه الانضباطيه التي يحتاجها الكل ) وهذا الكلام مريح من رجل المرحله ..

وآخر شي لازم نفكر بعقل ولازم نعرف ان الظروف اللي تكالبت ع النادي لو حصلت مع فريق ثاني كان أنهار .. في الاتحاد روح لازم ماتموت بسبب مشاكلنا خارج النادي . الجميع صار يختلف ف الرآي , الجميع صار يشوف نفسه الصح , ( الإتحاد ) يعني نتحد مع بعضنا ف الحلوه والمره , ف الضيق و الفرج .. الجمهور مو مقصر في الحضور ماشاء الله , ولكن لازم نترك الاداره تشتغل ونعطيها المساحه ونبعد عن التجريح والتشكيك والدخول في الذمم , خصوصاً في موضوع ( عقد الرعايه ) . لازم نوقف مع اللاعبين الصغار ونزرع حب الاتحاد داخلهم مثل ماهو مزروع فينا , دام إحنا نطالب بالإحلال إذاً لازم نصبر ع اللاعبين الصغار ونشجعهم , واللاعبين الكبار اللي خدموا النادي سنين نقول لهم شكراً .

( إعتذار )

بسبب نزيف النقاط كتبت برودكاست ع البي بي قبل كم يوم وندمت :
( مدرب جبان , دفاع سيء , وسط ضايع , هجوم الله بالخير , ثقافة فوز أنعدمت , هيبه راحت , فلوس مافيه , يناير تأخر , آسيا 2014 نحلم )

أعتذر عنه لأنه أنرسل كثير , و أتمنى أكون أخطأت ف محتوى البرودكاست ..

عشان أفوز . لازم أكون متفائل

ربنا يوفق إتحادنا