مرت حماي!!!!! أحس اني بنفجر !!!!!
مرحبا بالبنات
بدخل بالموضوع على طول لني احس من كثر ما أنه معصبه و مضايقه أحس الكيبورد بينكسر
الله يسلمكم مرت حماي ساكنه معانا في بيت حمولتي و لها قسمها الخاص و أنه هم لي قسمي الخاص أنيي للمشكله و أهيه عيالها الله يسلمكم عندها ولدين و بنت وأهيه الحين عقب هل العمر طرى على عبالها تكمل تعليمها المهم الولدين الكبار يروحون المدرسه الصبح لكن البنت بحكم أنه عمرها سنتين و نص شنو تسوي تخليها في البيت و طبعا ماكو خدامه و أهل زوجي عندهم قاعده كلكم راعن و كلكم مسؤول عن رعيته يعني ما يمسكون عيال أحد حتى لو مرت أخوهم بتموت يقولون أحنا مالنا شغل في عيالكم
الله يسلمكم الام تركب مع السايق كل يوم الصبح تروح الجامعه و الابو يركب سيارته و يروح الدوام و عيالهم الاولاد بحكم أنهم يروحون المدرسه و يمر عليهم الباص و أنه هم ولدي يروح الروضه و يمر عليه الباص الله وكيلكم الصبح أيننوني من شطانتهم لو أقول لكم شنو الشطانه الي يسونها يعني حتى العفريت الي تحت الارض ما يعرف هل الشطانه أنزين قمت أشوف أنه باص الاولاد ايي مبجر و آنه ولدي يمر عليه الباص 7 و نص و فوق قمت شسوي ما انزل ولدي إلا عقب ما يمشون يعني قمنا ننزل متاخرين شوي يعني أنزل قبل يية باص ولدي بعشر دقايق أنزين هاذي اول مشكله و حليناها ...
أنيي للمشكله ألي سببت لي هوشه عوده مع ريلي وما قلت غير حسبي الله و نعم الوكيل بس
زوجي يداوم شفتات يعني طول الليل مداوم و ينزل من دوامه الفجر الساعه 5 يعني حده يكون تعبان و يبي ينام ... أنزين عقب ما يركب ولدي الباص أرجع فوق أكون لاهيه مع الخدامه في التنظيف و الغسيل و الترتيب لني ما أحب اعتمد عليها وايد فأكون لاهيه معاها الله يسلمكم البنت الصغيره ألي عمرها سنتين و نص بنت حماي طبعا تقوم من النوم ما تلقى أهلها على طول وين أتيي عندي و تبجي بجي كأنه احد قاعد يطقها و طبعا منو كبش الفدا في الهواش أنه أحاول أسكتها ما كو البجي كل ماله يزيد أعطيها حلاو شي أسكتها أييب لها من ألعاب ولدي عشان تسكت يعني الام مو موجوده و لا أفتكرت في بنتها أنه شلون أتصرف معاها !!!
و طلع زوجي من الغرفه مثل الأسد اليوعان معصب حده وقعد يزفني و يصارخ علي و يقولي يعني الواحد ما يقدر ينام بهل البيت !!! من هل الصيحه على الصبح قلت له و أنه شنو ذنبي أمها وابوها مو موجودين قلت له أحاول أسكتها لكن كل ماله تبجي زود تبي أمها شنو الصرفه معاها !!
و قعد زوجي يهاوشني و يزفني و يقولي ما تعرفين تقفلين باب القسم ذلفيها برع و قفلي الباب !!
قلت أنه بس رديت فوق لقيتها موجوده عندي أحاول أقومها عشان اطلعها برع ما كو منسدحه بالقاع و مو راضيه تقوم مو قادره عليها ماكو البنت عنيده و ذابحه روحها من البجي !!
المهم شالها عمها بقوه و ودها برع و دش داخل و قفل الباب ... آنه ما قلت شي لكن آنه حزة بخاطري أنه وحده مالي ذنب بالموضوع أذا الأم تاركه بنتها و ذابحه روحها من البجي المفروض أهيه عارفه أنه بنتها ما تسكت إلا عندها , و الي أكبر من جذي العيال الاولاد يردون من المدرسه قبل الأم وهم نفس القصه على طول عندي أهوه بالبدايه ما كنت أقول لهم شي لكن الصراحه عقبها ما تحملتهم قمت على طول أقفل باب القسم ما يتبطل الباب لهم...
الله وكيلكم العيال حالتهم حاله ريحتهم عطنه لا تنظيف لا أهتمام يروحون المدرسه هدومهم معفسه على أبو أنه امهم تدرس بالجامعه و ما عندها وقت تجابل عيالها ...
قلنا بهل الشي مالنا شغل عيالهم و ينيازون معاهم لكن ما توصل أني أهمل عيالي و أنه ألام اكمل تعليمي على أبو أني مشغوله بدارستي بالعكس العيال أهمه القدوه
والله يكسرون الخاطر أحيانا حالتهم حاله هدومهم وصخه و ريحتهم عطنه أقول والله حرام عيال و جذي أشكالهم...
لكن المشكله العوده ألحين صارت الهوشه بيني و بين زوجي و بسبة بنت حماي
والله بجيت مساعه من كثر ما عصبت ... و وايد ضغطني بالحجي
بس رديت عليه و قلت أرفع السماعه و كلم أخوك و قوله أنه بنتكم تبجي و شفيها لو قلت له !!
أبيكم تقولون لي منو فينا الغلطان
و أبي الحل !!
لأني زعلانه حيييل و مضايقه حيييل
