ابشركم ولدت وهذي قصه ولادتي،،،،،

السلام عليكم
شلونكم بنات؟
الحمدلله انا ولدت امس الساعه 11 بالليل بمستشفى لندن
طبعا حطيت موضوع امس عن اني شربت دارسين يوم الاربعاء
وشربت مره ثانيه يوم السبت وصار جماع السبت بالليل وبعد
الجماع شربت خروع وكل هذا علشان ابي اولد وطبعا بعد ماشربت
الخروع بنص ساعه بلش الطلق عالساعه 4 الفجر كانت وعالساعه 6 الصبح
خلاص مااقدر اتحمل قعدت بعلي العزيز ورحت للعدان اشيك طلع تقريبا 3 سانتي
وسويت تخطيط مابين الطلق الا اخر التخطيط رديت البيت وريحت ورحت للندن
الساعه12 الظهر علشان ابيه يفتح وايد الرحم رحت فحصتني دكتورتي قالت
4 سانتي سوي دخول بس ماراح اوديج الولاده الا العصر قلت دام السالفه جذي
بروح البيت وارد العصر قالت كيفج بس اذا زاد العوار تعالي قالت لان انتي والده
مره قصيريه ومره طبيعي فماابي نستعجل عليج ابيج تولدين ان شاءالله طبيعي
رديت البيت تغديت مع ان مالي نفس للعلم الصبح الطللق حااار ومن 8 خف الطلق صار عادي
وبعدين نمت شوي لاني مانمت بالليل وقبل انام شربت دارسين قلت عالاقل يحمي الطلق ويفتح
الرحم اكثر عالساعه 4 العصر صليت العصر وبلشت امشي بغرفتي واقرا سوره مريم والزلزله وشربت
شوي خروع علشان ينظف بطني لاني ماابي حقنه شرجيه وبعدها صليت المغرب وطلعت من البيت
رحت للمستشفى دشيت عالدكتوره فحصتني قالت 5 سانتي الحين سوي دخول وبنبط الماي اذا ماحما
الطلق وتبطل الرحم بعطيج شوي طلق صناعي قلت ماابي طلق صناعي ولاتحميله توسعه قالت التوسعه
انا سويت لج بس بايدي وقت الفحص بس ماحسيت فيها كان الم بسيط قلت خلاص يسهل الله دشيت
غرفه الولاده الساعه7 بالليل جاتني دكتوره ثانيه فحصتني وبطت الماي قلت كم قالت نفسه 5 سانتي
شوي الا بلشت الطلوق صح قلت يالله فال زين دكتورتي جاتتني عالساعه 8 وربع بعد ماخلصت من العياده
قالت زين طلوقج زينه انا بروح وبردلج جاتني بعدها عالساعه 9 الدكتوره اللي بطت الماي لقته للحين 5 سانتي
وعالساعه 9 ونص فحصتني السستر قالت للحين 5 راح احط لج طلق صناعي لان الدكتوره قالت لهم طبعا
طول الوقت يقولون اخذي كمام اقولهم لا ماابيه بس قالت بحط لج طلق صناعي قلت دامج بتحطينه عطيني الكمام
شوي الا بلشت الطلوق تصير قويه وطبعا الكمام خلاني نفس المدمنين ماادري عن شي بس بوقت الطلق احس بالطلق
يعني بس ضيع عقلي والعوار احس فيه لانهم مومعلين عليه حاطينه بس 5 درجات وصرت اهلوس لما يجيني الطلق احذفه لان مامنه فايده واقعد اصارخ وانا من النوع اللي مايصارخ الا حزه طلعت الراس يعني اخر دقيقتين بس من الكمام
هالمره قمت اصارخ كل ماجاني الطلق وبعدها كنت احس بزوجي لما دش ويكلمني وانا ماارد عليه سمعني اصارخ تخرع
وانا احذف الكمام وهو يقولي حطيه علشان يخف الالم طبعا حسباله هذا اكسجين مايدري انه كمام ولما صارخت مره ثاني دشت السستر قالها وين الدكتوره قالت راح تجي بعد شوي قال خليها تجي حرام ماما واجد يعور حسباله انه اذا جات الدكتوره راح يروح العوار وبعدها صرت اصارخ اكثر يقعد يمسح على شعري قال شنو يعورج ويالله رديت عليه قلت الطلق
قال يسهل عليج ربي بعدها جات الدكتوره اللي بطت الماي فحصت قالت كويس لانها مصريه
قلت كم قالت قريب من 7 سانتي تمنيت اموت ولا اسمعها لان توقعت اني وصلت لل9 سانتي المهم انا احط الكمام اواسي
نفسي فيه بس اذا جا الطلق اصارخ باعلى صوتي عالساعه 11 جاتني دكتورتي الهنديه سوفيت فحصتني قالت 8 سانتي ويرفعون رجولي واحذف الكمام علشان ابي احس بالدكتوره لان لو بتقولي شدي وانا عالكمام ماراح اقدر
لانه خدرني من تحت فشوي الا اصارخ من الطلق قالت لاتصارخين اخذي نفس قوي ولما تحسين بعوار شدي
طبعا صراخ بصراخ وهي تهاوشني لاتصارخين ماراح يفيدج الصراخ بشي اخذي نفس احسن لج
وصرت مرات اصارخ ومره تخذ نفس السستر اللي على راسي فلبينيه بس خوش وحده لما كنت اشد
كانت ترفع راسي صدري شوي علشان اضغط عالبيبي من فوق وينزل وطلع البيبي الساعه 11 وربع بالليل
قالت ماراح اخيطج الحين راح انطر دكتور التخدير لان يعطون ابره منومه طبعا انا طالبه خياط تجميلي
بالورقه اللي وقعت عليها مكتوب خياط تحميلي وتضييق ولما جاتني دكتورتي وانا بالولاده
قلت ابي بس تجميلي ماابي تضييق شوي الا دش الدكتور كان هندي قال مبروك وانا كلش مومعاه
طقني الابره بالوريد قبل لايجي قلت للدكتوره خلاص شيلي الدرب لان فيه الطلق الصناعي قالت
لا مايصير خليه يخلص علشان الرحم اي ونسيت اقول لما كانت تبي الراس يوصل لاني كنت اشد
وللحين الراس ماوصل حده كانت تخلي السستر تعلي عالدرب مال الطلق الصناعي يعني مثل اللي
تزيد الجرعه وخلاص لما وصل الراس علت عليه حيل علشان حتى لو ماساعدتها الطلق يطلعه
المهم عاد نمت بعد الابره ولاوعيت الا عالسستر تبي تخليني اروح على سرير ثاني علشان يودوني
غرفتي طبعا عندنا مانسوي استقبال ولاده فاخترت الغرفه العاديه وودوني غرفتي كانت الساعه 1 وشي
دقيت على زوجي علشان ابي شنطتي مالت المستشفى عند اهلي حاطتها وعالساعه 2 هو عندي دش يبتسم
وهو وجهه صاير اسود من الخرعه اول مره يسمع صراخي بالولاده عالساعه 5 الفجر صرت احس بالم الخياط
الساعه 7 ونص قلت للسستر ابي مسكن قالت اوكي جات الدكتوره المصريه شافتني وراحت شوي الا السستر
داشه علي وعطتني وصفه الدوا من مضاد لي مسكن لي غسول لي كريم يعني كل ادويتي بس بعلي العزيز
ماجاني الا عالساعه 11 الظهر هو وعيالي بس دش قلت لاتقعد روح جيب الدوا ابي مسكن ذبحني العوار
راح واكلت كل الادويه ولاخف الالم اضحك على عيالي يقولون اول مادشوا ماما وين اخوج قلت مو اخوي
اخوكم كلمت الدكتوره عالساعه2 الظهر لان مافادني المسكن والمضاد قالت عادي لازم تحسين بألم لان
انتي مسويه تجميلي لو خياط عادي ماراح تحسين بألم نفسه قالت بس حطي ادويتج واستخدمي
الغسول الطبي ومع الايام بيخف الالم حاليا الساعه 5 المغرب مااحس بالالم الحمدلله وبطلع الحين علشان
ابي اطهر الولد عندالدكتور كاظم معرفي لانه مطهرعيالي الاثنين وطهارته حلوه
طبعا انا الغلط اللي سويته اني حبيت اني اولد وشربت دارسين وخروع
وكانت غلطه كبيره لان الرحم وقف عال5 سانتي موراضي يفتح زياده وحطولي طلق صناعي
يعني لو اني قاعده ليما تجيني الولده بوقتها كان احسن وكان مااخذت الطلق الصناعي
بس انا خبله والحين توبه اسوي شي مره ثانيه بخليهاعلى ربي متى ماراد ان الولد يطلع
بيطلع فنصيحتي لحد يسوي نفسي ويشرب على كيفه خلوها ومتى ما الله راد راح تجي الولاده
الدكتوره سوفيت حبوبه وتهدي الواحد صج اني اذيتها بصراخي بس عادي عندها اتذكر اقولها
وانا اصارخ دكتوره ساعديني قالت انا كاني اساعدج انتي اللي ساعديني المستشفى نظيف وهادي
مافي ازعاج وبس اطقين الجرس السستر على راسج مايخلونج دقيقه والحمدلله على كل حال
بس ابي اسال اللي جربت الخياط التجميلي كم يوم ويخف الالم ولاعاد تحس فيه ؟
لان اول ولد كان عمليه والثاني طبيعي بالعدان وخياط عادي كان وهذا لله الحمد الثالث وطلبت
تجميلي طبعا كنت ابي بنت وميته عالبنات بس الحمدلله دام الطفل صاحي وبعافيته هذا كل اللي ابيه
بنت او ولد نعمه من ربي،،،،،،
وهذي قصتي بالتفصيل ....
وعسا ربي يهون على كل وحده ويرزق اللي ماحملوا بالذريه الصالحه
طبعا الولاده ب 185 والجراحه التجميليه ب 105 وعاد باقي الفحوصات وهالسوالف
بس اتاكد كم السعر الاجمالي راح احطه
اي استفسار انا موجوده
طبعا من الزهق قلت اكتب لكم قصه ولادتي خخخخخخخ
*