ماسر العلاقة الحميمة بين جماهير الاتحاد وجماهير الوحدة... الرجاء الدخول للأهمية

كيفكم يامجانين ... وألف مبروك الفوز للملكي ...

حبايبي أنا من زمان أتساءل سؤال مش لاقيله إجابة ... وهو :

ليش جماهير الاتحاد ممكن تحضر للوحدة في الملعب ؟ والعكس .. ليش جماهير الوحدة تحضر وتؤازر وبقوة للاتحاد في الملعب ... خصوصا لمن يلعب الاتحاد ضد الأهلي ؟؟

بالله ما تلاحظو هذا الشي ... أنا أعطيكم مثالين... واحد حصل أمامي ... والآخر حصل أمام خالي :

الأول : أنا شخصيا يوم الجمعة الي راحت (يوم المباراة) ... رحت لمنطقة عندنا في مكة اسمها (النكاسة) أكيد الأغلب يعرفها... منطقة لبيع مواد البناء أو ما شابه ذلك ... والمنطقة هذي يسكن بها أعداد كبيرة البرماويين (من دولة بورما) .. والمعروف عن أغلب البرماويين إنهم وحداوية بحكم إنهم من مكة .. المهم إلي حصل وأنا أمام محل مواد البناء .. وإلا ألاقي ونيت غمارتين طالع من الحارة ... ياجماعة كان ودي أصوره ,, لأنه بدون مبالغة راكب على الونيت ما يقارب 20 برماوي ورأيت من ضمنهم كم أفريقي ... المهم إلأي لفت انتباهي أكثر انهم رابطين شعار الاتحاد والوحدة مع بعض وعاملينه بحركة معينة فوق السقف... جالسين يصفقون من قلبهم..بصراحة أنا استغربت ... لأنه من زمان أسمع ان الوحداويين يميلون للاتحاد ... ويوم شفت الموقف قلت ثبتت النظرية ...

الثاني : حصل أمام أعين خالي وأيضا في مكة .. خالي ساكن في منطقة اسمها (ملقية) .. المهم يوجد في حارته جماهير أهلاوية واتحادية وقليل من الوحداويين ... المهم يقلي إنه في نهائي كأس الملك قبل سنتين يوم لعب الأهلي مع الاتحاد ... يقول وهو جالس بعد العصرية في الحارة .. إلا ويلاقي ما يقارب أربعة وحداويين من عيال الحارة طالعين من الحارة سألهم على وين ياهووو (بالمكاوي) قالوله طالعين جدة نحضر المباراة ... قلهم انتو وحداوية ايش دخلكم تحضرون ... قالوله حاضرين للاتحاد .. وانشالله يدكوكم المرة هذي ...

هذي مجرد موقفين حصلت ... وبالتأكيد انو هناك مليون موقف مشابه (أقصد ان الوحدايين يميلوا للاتحاد وخصوصا قدام الأهلي)

طيب هل معنى هذا الكلام انو يوم الجمعة كان على الأقل 30 % من مدرج الاتحاد وحداوي مثلا ... كل شي جائز ...
أسف طولت عليكم .

وأتمنى إلي يعرف سر هذه العلاقة .. لا يبخل علينا

أحبكم يامجانين