شعر قصيــــــــــــدة.......وشاع

الطيب فرصه والجمايل توافيق=ومن لاتوفق ماكتب له جماله
ومن لارقى بالطيب روس الشواهيق=مازان له وقته على مابداله
ومادام لفعول الجمايل عشاشيق=كسب الجمايل مايجي بالسهاله
ولو إنها تشرب معَ فكة الريق=كلٍ خذا له كل ما أصبح بياله!
والطيب منوه للقلوب المشافيق=كلٍ يتوق ومنوته راس ماله
والمدح مايزهى على الرجل ويليق=ألاّ لاصارت وافياتٍ خصاله
يستاهله رجلٍ يفك المزانيق=اللي يقال ونعم لاجاء مجاله
ومن ساقته نفسه وهو مابعد سيق=لأجل الجميل يزيّن الله فاله
والمرجله ماهيب تحتاج تنسيق=من بين قلب اللي عشقها وباله
ومن عادة الدنيا تخون المواثيق=تفتر مكرتها سوات المحاله
ولولا اللوازم مافرقنا المخاليق=مايعرف الرجّال لين يعنا له
والكفو تظهر فزعته حزة الضيق=وينشاف فالشده بعين العداله
نسل الرجال متعّبين الملاحيق=متوسطٍ من بين عمّه وخاله
واللي يطيق ولا بغى قال ما أطيق=تحرم عليه المرجله والشكاله
والهيّنه تكبر على اللاّش والهيق=له فالرخاء قاله وفالضيق قاله
والطيب شاره والضمائر صناديق=واللاّش طيبه ماتعدّى ظلاله
وأنا أسبر قلوب الرجال المغاليق=والصامت أقطع غايته من مقاله
ومادام فالدنيا رجالٍ مطاليق=نصيتهم واللاّش مالي وماله

لـ الشاعر سعد بن مناحي بن شفلوت

rwdJJJJJJJJJJJJ]m>>>>>>>,ahuv