صباح الخير يا بنات
شلونكم انشالله بخير :*
هذي نصايح سريعة مني لكم قلت اشاركم فيها دامها فادتني
نبدأ بسم الله :ggdw:
اولا: الشــــعر
1. لازم تعرفين نوع شعرج . . هل اهو جاف ؟ دهني ؟ عادي ؟
فيه تقصف او لاء ؟ عندج قشرة ؟ مصبوغ ؟ . . جواب هذا السؤال اهو يحدد لج نوع الشامبو اللي لازم تستعملينه , ضروري تستعملين شامبو يناسب نوع شعرج عشان يقدر يستفيد منه
2. استعملي بلسم دااااايماً !
والله بنات انا مستحييييييييييييل مستحيل اغسل شعري و ما احط فيه بلسم :/ الشعر مع جونا "الجميل" و الشمس و السسشوار اكيد يتعب مسكين !
اذا شعرج دهني و تحسين البلسم يخليه مدهن , حطي بالاطراف بس بعد ما تغسلينه من الشامبو
و خليه 5 دقايق و بعدين تغسلينه .. جذي توفرين على نفسانج تقصين اطرافه كل فترة لانها مراح تتقصف بسهولة و مرة بالاسبوع حطي بشعرج كله بلسم و خليه طول ما انتي بالشاور و عشان تخلين الوقت يطول : سوي سنفرة لجسمج او ترسي البانيو و استرخي شوية P;
3. عطي شعرج بريك من السشوار و الفير و و و . . لازم يرتاح شعرج و لا تتعبينه وايد عشان ما يحترق ! بعد ما تسبحين حطي leave in conditioner هذا صاير نفس البلسم او الكريم ينحط بالشعر بعد الشاور بس ما تغسلينه .. تخلينه عادي و اذا نشف مراح يصير كشة بالعكس بيخليه طبيعي و يريحه بنفس الوقت p:
4.لا تغسلين شعرج كل يوم لانه رح يتكسر و يتقصف بسهولة
و بنفس الوقت لا تخلينه يصير مدهن ووصخ لان هم جذي يضره
غسليه يوم و خليه يوم . . هذي احسن طريقة ^.^
5. قبل لا تطلعين من الشاور , غسلي شعرج بماي باااارد . . راح يعطيه لمعه ماااادري شلون لا تسألوني بس صج صج تحسين شعرج ردت فيه رووووح !!
عموما الماي الحااار وايد يضر الشعر , احسن شي الدافي المايل للبرودة شوووي و بعد ما تخلصين شوية بس بالماي البارد
6. بعد الشاور , لا تنشفين شعرج بالسشوار على طووول !!
اول شي حطي الفوطة على شعرج و ضغطي جنج تعصرين الماي منه ((( لا تفركينه بقوووة لانه يضر الشعر)) و خليه ينشفه الهوا عشر دقايق بعدين تقدرين تسوينه براحتج ^.~
و يفضل قبل السشوار تحطين سبراي خاص يحمي الشعر من الحرارة
ثانياً: العيــــون + العدســــات
1. اهم نصيحة في الحياااة ! لا تشاركين احد باي ميك اب للعيون !
حتى لو امج اختج رفيجتج اي احد !! حتى لو مافيهم شي , خصوصا مسكرا و كحل و هالسوالف و بالاخص عدسااات ,, كلش كلش لا تخلين احد يلبس عدساتج
يمكن بدون قصد تنتقل لج بكتيريا منهم و تأذي عينج .. و مافيها زعل هذي نظافة شخصية و وقاية
و اذا بتحطين ميك اب بالصالون تأكدي تروحين عند وحدة ثقه و تنظف فراشيها دايما
و اذا عندج فراشي ميك اب وديهم احسن , مافيها شي ولا احراج قولي لها انا عيني حساسة و ماقدر استعمل شي مشاركة مع احد
2. اذا حسيتي بالم او احمرار بعينج او اي شي يزعجج .. على طووووووووول للدكتور
لا تقولين عادي و ماتستاهل السالفه و ماكو الا العافية و بعدين تروحين تاخذين قطرة او مرهم من البيت و تحطينه , هذا اكبر غلط لانج ماتدرين شفيها من الاساس عشان تعالجين نفسج
ولا تروحين الصيدلية تطلبين منه مرهم او قطور لان الصيدلي مع خبرته ما يقدر يكون طبيب و يمكن يعطيج شي ما يناسبج
3. غسلي ايدج عدل قبل لا تلبسين العدسات عشان لا تدش بكتيريا بعينج , و شغلة مهمة ثانية:
لا تنامين بالعدسات ابداً . . ادري كلنا مرات نتعيز نشيلها قبل لا ننام و اخرتها ننام بعدساتنا بس اكبر غلط , العين هم تحتاج تتنفس و اذا لبستي العدسات اكثر من 12 ساعه راح تنشف عيونج و تبدأ تعورج
مابي اخرعكم بس انا قبل كنت مهملة انام بعدساتي و اخليها طول اليوم و اخرتها شصاار ؟ انجرحت قرنيتي ;( و ترا يعور و شي مزعج حيل و اذية بس رحت دكتورة شاطره و الحمدلله ربي ستر و صارت زينه بس وراها انقرصت و حرمت انام بعدسة مستحيل
4. شفتي علبة العدسات اللي بالصورة ؟ الـ case
حطي كل عدسه بروحها , ديري بالج تحطين ثنتين مع بعض !! غلط غلط غلط
و العلبة يفضل تغيرينها كل شهر او كل ما بدلتي عدساتج و شريتي يديدة
و ترا بكل علبة محلول عدسات تييج case يديدة , او تقدرين تشتريها من محلات النظارات و سعرها رخيص ترا
5. لا تلبسين عدسة بعد الفترة اللي تنتهي فيها صلاحيتها ! و اذا انتي من النوع اللي تنسين سجلي عندج التاريخ اللي شريتيها فيه عشان تعرفين متى تقطينها
6. مع احترامي لكل وحدة تبيع عدسات كورية اللي تكبر العين , بس لااا تشترون منهم يا بنات !!
العدسات هذي من شركات مو معروفة ولا مرخصه , ولا اهي طبية ولا معروف مصدرها !!
و برنامج the doctors حذروا منها و قالو انها تضر العين
و تسوي حساسية و التهابات و يمكن مضاعفاتها تكون خطرة حيل
و اصلا بامريكا مو مرخص لهم نهم يبيعونها عشان جذي قام يسوونها اوردر بالنت
انا معاكم ان شكلها حلو بس شفايدت الحلو اللي يضرني ؟
انا اشتري صحتي قبل لا اشتري وناستي و العدسة بدالها الف عدسة و ترس المحلات
عالاقل تشترين شي عارفته و نوعية معروفة
اتمنى محد يزعل مني بس الشي اللي ما ارضاه على نفسي ما ارضاه لغيري
ثالثا: الـــــبشــرة
1. البشرة الحلوة يبيلها عناية من الداخل قبل العناية من الخارج
و هالشي يبيله اكل صحي متوازن , نفسية حلوة , تشربين ماي وااايد و ان ما يكون عندج مشاكل هرمونية
اعتقاد خاطئ : الككاو يطلع حبوب
الجواب الصح: الاكل المو صحي اللي مشبع بدهون مو بس يزيد الوزن , يعفس اليشرة حيل
الدهون الزايدة بالبشرة اهي اللي تسد المسام و تطلع حبوب
بس الاكل الصحي له اثر حيل حيل كبير عالبشرة , مثل ما له تأثير عالكرشة :D
و الفيتامينات احسن انج تاخذينها من مصادر طبيعية يعني من الاكل , مو من الحبوب اللي تنباع بالصيدليات و اذا حبيتي تاخذين حبوب فيتامين او مكمل غذائي و غيره .. استشيري دكتور لان اذا ما عندج نقص بهالفيتامين و خذيتيه بحبوب راح تصير نسبته مرتفعه بالجسم
2. اذا عندج مشاكل ببشرتج , لازم تعالجينها بدال لا تغطينها و بس
روحي لدكتور جلدية شاطر و عالجي اي شي يضايقج , خاصه اللي عندها حبوب و اثار و حفر بالبشرة .. الحين فيه علاجات تسوي الويه جنه ورده
احسن من تصبغينها بالميك اب الثقيل و تتعبينها زيادة
3. احمي بشرتج من الشمس , حتى في فصل الشتاء و حتى لو كنتي بمكان فيه ثلج
على فكرة الثلج يعكس الاشعه بقوة , و يخلي البشرة تحترق بسرعه
و اللي عايشة برا او مسافرة بلدان بارده اكيد لاحظت ان حتى بالثلج , الاجانب يستعملون واقي شمس , علاقل يكون SPF 15 و اذا رحتي البحر او تتعرضين للشمس مباشرة هني تستعملين شي اقوى , و استعملي مرطب شفايف بعد يكون واقي
4. لا تدخنين !!
ويييع ويييع ويييع , ياااا كره الزقارة بحلج البنت اصلا شكلها مقزز و تسوي ريحة بالايد و الفم
و تسوي الاسنان صفرررة و تسوٌد اللثة و الشفايف و تسبب تجاعيد حول الفم
و يأثر عالكولاجين اللي حيل مهم للبشرة , يعني بكل ناحية تضرج
شتبين فيها وعوووووه ؟؟ !!
اللي تدخن زقاير راح اطقهااا جذي :eh_s(4):
لوووول اتغشمر لا تزفون :eh_s(22): بس هم لا تدخنون ^^ عفيه عالجميلات الشطورات :*
5. خلج رقيقة بتعاملج مع بشرتج .. بكل ناحية
بالتنظيف او السنفرة , بهداوة و حركة خفييييفة بشكل دائري و بدون لا تضغطين عليها حيل
و استعملي مستحضرات خفيفة عالبشرة عشان ما تتعب , لا تفركينها بدفاشة موو زين
و اذا بتنشفينها نشفيها خفيييف مجرد تحطين الفوطة او الكلينكس عليها و على قولتهم pat dry يعني باللغة العربية تربيت خفيف P: سوري والله الترجمه جنها طلعت معاي غلط :$ صححولي انتو :*
بس فاهمين قصدي بنات ؟ يعني بس ضغط خفيف عشان ينشف الماي ^^
6. التــــرطــيـــــــــــــ ب
الترطيب اهو اللي يعطي البشرة مظهر فريش و مرتاح و نااعم
و يخلي الميك اب يطلع احلى بدون لا يتقشر و يطلع فيه خطوط .. بنفس الوقت : الترطيب يحافظ على بشرتج اللي كل ما رطبتيها زياده تقل فيها التجاعيد مستقبلا
اعتقاد خاطئ: انا بشرتي دهنية يعني ما احتاج ترطيب راح تدهن زيادة
هذا اكبر غلط !! بالعكس البشرة الدهنية حالها حال اي بشرة و لازم ترطبينها
بس استعملي مرطب خفيف و بدون زيوت و خاص للبشرة الدهنية
7. لا تغسلين ويهج بالصابون زياده عن اللزوم !
لان ينشف البشرة من الزيوت الطبيعية اللي فيها , و الزيوت الطبيعية تفيدها ما تضرها
البشرة العادية و الجافة و حتى المختلطة .. كافي مرتين باليوم بس
الدهنية ممكن 3 مرات باليوم بس مووو اكثر !
8. الـ scrub
مرتين بالاسبوع كافي , و في بعض المتستحضرات يقول لج غسول مقشر يومي
لا تستعملينه كل يوم حتى لو عندج حبوب , لان بعد ما يشيل طبقة الجلد الميته من بشرتج راح ياذي بشرتج جنج قاعده تحكينهاا بشي يقشرها كل يوم !
اشتري غسول ثاني يكون يومي و المقشر خليه مرة او مرتين بالاسبوع بس
9. معلومة غريبة شوي , بس اذا نوعج بالبيت ما تبدلين كفر السرير وايد
عالاقل غسلي كفر المخده مرة بالاسبوع :)
لانها تعلق فيها الزيوت من البشرة و البكتيريا و السعابيل لووووول :krkrkr:
سوري لوعت جبودكم :$ بس هذا الصج p;
انا عن نفسي , ببيتنا لاااازم كفر السرير اسبوعيا ينغسل و يتبدل ^_^
10. و من الاشياء المهمة لا تتعبثين بالحبوب او تحاولين تبطينها
اولا لانها راح تخلي اثر .. ثانيا لان البكتيريا اللي فيها راح تطلع و تنتشر بالمنطقة اللي حوالينها بويهج و احتمال تلتهب
11. عطي نفسج بريك من الميك اب !
شي حييييل ضروري لازم البشرة تتنفس ! او راح تنسد مساماتها و تظلع فيها حبوب و تبقع
حطي بباج ان الميك اب مهما كان غالي و نوعيته زينة , كثرة استعماله راح تتعب بشرتج
و تحسين ما تقدرين تطلعين بدونه ! اذا عندج مشاكل بشر عالجيها
و اخذي راحتج بالايام العادية خاصه بالنهار لا تحطين شي غير مرطب شفايف و مسكرا اذا تبين
اصلا شكلج يطلع كيوت و فريش ^^
12. الثلج من احسن الاشياء للبشرة
يبرد و يريح و يشد و يخفف المسام المفتوحة و يفرفش و ينعنش لووول
بعد ما تغسلين ويهج اخذي ثلجة و مرريها عليه كلللله
اذا بشرتج حيل حساسة لا تكثرين منه وايد , مسحة خفيفة بكل الويه
اذا قدرتي تتحملين حاولي تخلصين نص الثلجة بويهج و بعدين نشفيه و
مسحيه بقطنة فيها ماي ورد و شوفي النتيجة شلون حلوة
خاصة بعد ما تشيلين الميك اب
رابعاً: المنطقة الحساسة
1. لا تشيلين المنطقة بموس , خليج عالشيرة
عشان ما تسود البشرة و يطلع الشعر خشن و قاسي حيل
و لا تستعملين كريم ازالة شعر هني كلش ملش !
2. لا تستعملين خلطات اعشاب بكيفج حق هالمنطقة
اسمها حساسة يعني اقل شي يأثر فيها و دكاترة النساء و الولادة حذرو من
بعض الاعشاب و الاشياء اللي يستعلمونها البنات عشان يغسلون فيها
خاصه اللي يسوونها دوش مهبلي حق المتزوجات
هذا اكبررررر غلط !
الدوش المهبلي لازم تستعملينه نفس ما مكتوب على علبته
و الاقضل انج تسألين دكتورتج عنه قبل لا تسوينه
3. الغسول حق هالمنطقة له انواع
في انواع عادية بالصيدليات و الجمعيات مكتوب عليه غسول يومي
لطيف و متوازن فيه الـ ph
هذا عاااااادي تستعملينه كل يوم لانها حق استعمال خارجي بس
سوري عالوصف بس يعني اذا وحدة متزوجة و بتستعمله ما يصير
تستعمل هالغسول حق داااااااخل المنطقة فاهمين قصدي ;$
بس من برا
في انواع ثانية اللي يصير تستعملينها لغسيل داخلي
بس اغلبها لازم تخففينها بمااي
و بس وقت الـ .. عيب سوالف متزوجات و انا مالي شغل لوول
اما البنوتات خليكم هالنوع اليومي عادي و وقت الدورة بيحسسكم بنظافه
مووو طبيعية
اذا حسيتيه يحرق او ما ارتحتي له , قطيه و جربي نوع ثاني
4. لا تستعملين شي معطر فيه كحول بهالمنطقة
لانها مغطية طول الوقت و فيها رطوبة و دافية فا احتمال يسبب لج تغير لون الجلد
اكتفي بالغسول و تقدرين تستعملين wipes
من جونسن ملوت اليهال ريحتهم حلوة
او بودرة . .
بس تاكدي انج تنشفين بعدها
5.بعدي عن المابس الداخلية اللي مصنوعه من النايلون
و استبدليها بقطنية
جونا حاااار مو كافي احنا ميتين حر عيل شلون هناك ؟ P:
عشان تمتص العرق و تقلل البكتيريا اللي ممكن تنمو بهالمنطقة
6. المتزوجات: وخرررري عن الصابون الفلبيني مادري اندونيسي
اللي يضيج و مادري شنو
ماعندي خبرة بصراحه بهالموضوع بس سمعت وااايد ان الصابونات هذي
ممكن تضر او تسوي التهابات
و حتى التحاميل بعد لا تاخذينها الا بوصفه دكتورة
خامساً:
Beauty products - مستحضرات التجميل
1. لا تشترين شي بس لانج سمعتي عنه او لان وحدة مدحته لج !
كل بشرة و كل جسم يختلف عن الثاني , و كل جسم يتفاعل مع اي شي بطريقة ثانية
مو شرط اللي يناسب بشرة رفيجتي يناسب بشرتي !
و مو شرط الميك اب اللي يطلع حلو علي يطلع حلو على غيري .. نفس الشي الكريمات و الشامبو و اي نوع غسول و غيرها
عشان جذي لا تتوقعين نتيجة نفس اللي صارت لغيرج و ممكن شي غيرج يذمه بس انتي يعجبج
2. لا تجربين اكثر من مستحضر يديد بنفس الوقت !
اذا شريتي اكثر من شغلة يديدة , جربي وحده منها مع الاشياء اللي تعودتي تستعملينها عشان تعرفين مفعولها على بشرتج و هل تناسبج او لاء
و هل سببت لج حساسية ؟ و عجبتج او مو ذاك الزود
اذا خلطتيها كلها بنفس الوقت شلون تعرفين ايهي زينه و ايهي لاء p;
3. اذا تحسستي من شغلة , شوفي مكوناتها و عرفيها
كل مستحضر مكتوبة عليها المكونات .. و المرة الياية اذا بتشترين شي يديد تأكدي ان مكوناته مو نفس المكونات اللي سببت لج حساسية بالاول و اذا ما عرفتي سألي اللي بالمحل و اهما راح يخبرونج بس خلج فطينه لا يقصون عليج -__-
4. لا تكودين ميك اب !! ادري كلنا نحب الميك اب و نستخف لمن نشوفه و ودنا كله يكون عندنا و اذا شفتيه جذي تحسين انج بصالون مو ببيتج لوووول
بس دامج مو خبيرة تجميل و ماعندج صالون ليش تكودين هالكثر ؟
الميك اب يبيله تخزين خاص , لازم ما تحوشه حرارة ولا شمس مباشرة ولا رطوبة و بكل الحالات له وقت معين بعدين يخرب , غير جذي .. كل منتج لمن نبطله يكون له وقت صلاحية
و تلقينها برسمه صايرة جذي
شوفي الرقم اللي عليها , هذي عدد الاشهر اللي يكون المنتج صالح للاستعمال فيها بعد الفتح , 6 يعني ست اشهر , 12 يعني سنه .. 24 يعني سنتين .. 36 يعني سنتين و نص و جذي
و لا تستعملينه فترة اطول من جذي لان راح اييبلج نتيجه عكسية
و احتمال المواد اللي فيه تفسد !
لا تنسين : المواد الكيماوية تتفاعل مع الهوا و بعد وقت معين تتغير تركيبتها
اشتري كمية و اذا خلص بعضها ردي اشتري مرة ثانية
5. اسفنجات الميك اب و الفرش ضروري تتنظف
عشان الميك اب المتراكم فيها و اي غبار او بكتيريا ما يروح ببشرتج و يسد المسام
الفرش لها طريقة تنظيف خاصه سئلو خبيرات التجميل عنها و مراح يقصرون وياكم
الاسفنجات نفس الشي هم تتنظف بس ما تطول كثر الفرش
لان الاسفنجة مع كثره الاستعمال تحسينها تتفتت حتى لو كانت من ماركة معروفة و زينه
و اذا بدت تتفتت , حتى مع التنظيف مراح تصير نظيفة لان الوصخ يدش الحفر الصغيرة اللي فيها و اصلا حتى و انتي تستعملينها راح تشوفينها ما توزع الميك اب بطريقة حلوة نفس لما كانت يديدة
6. مو اي خلطة تشوفينها بالنت او تسمعين عنها تروحين تسوينها على طول !
انا شفت خلطات غريبة عجيبة :/ اللي حاطه زبده و مايونيز بشعرها و اللي مسوية خلطة تبييض بكريمات متروسة كورتيزون "راح اتكلم عن هالشي بنقطة ثانية" .. و اللي تفرك عينها بزيت خروع و اللي تشطف تحت تكرمون بخلطة اعشاب و مرة و لسته شطولها !!
بنات لازم تعرفين ان هالخلطات احتمال تضرج , تسبب لج حساسية , تغيير بلون الجلد , تهيج الجلد و اذا بالشعر احتمال تسويلج تساقط و العين بالذات لاااا تتعبثون فيها واايد خطر !
الا عينج لا تسوين فيها شي يضرها ترا اذا راحت لا سمح الله
ولا احسن دكتور يقدر يعالجها !! اتمنى تديرون بالكم من هالشي
تاكدي من الخلطات و لا تسوين شي الا قبل لا تسألين عنه دكتور او عالاقل خبيرة بشرة و تجميل
اعتقاد خاطئ: الاعشاب اذا ما نفعت , ما تضر
الصح: امبلااااااا تقدر تضرج و نص !! ترا اساس المواد الكيماوية ماخدينها من اشياء طبيعية اللي اهي فواكه و خصار و اعشاب او حيوانات تكرمون
الاعشاب ما تصلح لكل شي و اذا خلطتي انواع وايد احتمال انها تتفاعل مع بعضها
شنو تتوقعين يصير اذا دشت جسمج اشياء متفاعله بشكل مضر ؟
صح يمكن ما يبين اثرها بنفس الوقت بس على المدى البعيد بتشوفين انج انضريتي منها و بدون لا تدرين لانج بتتوقعين ان اللي صار من كريم او اي شي ثاني استعملتيه
في خبراء دارسين هالسوالف , اهما يقدرون يفيدونج بسوالف الاعشاب بليز سئليهم قبل لا تسوين خلطة او تستعملين اي شي
7. كريمات التبييض اللي فيها كورتيزون .. هذي قطيهااا الحين الحين الحين
مكانها بالزبالة وانتي بكرامه
لا تحطين على جسمج اي شي فيه كورتيزون , صح ممكن اول جم يوم تشوفين اللون فتح بس هذا لانه قاعد يقشر بشرتج و يطلع طبقة البشرة اللي تحتها و عادي جدا بعد اسبوع تشوفينها ردت سوده اكثر من قبل بعد ما صارت حمرة
اصلا المادة بكبرها حيل ضارة وخري عنها و حتى اذا وصفلج اياها الدكتور طلبي شي بديل اذا ممكن و اذا تبين تعرفين اكثر عن اضرار الكورتيزون , قوقل ما يقصر
راح تشوفين معلومات تخرع !
شوفي هذي بعضها . .
اقتباس:
اضرار الكورتيزون- الأعراض الجانبية للكورتيزون
حدوث ضعف فى طبقة الجلد
ظهور شعيرات دموية وبخاصة فى مناطق الوجه
خطوط حمراء وبيضاء بالجلد
تقرحات وسهولة التجريح فى مناطق كثرة استخدامه
حب الشباب نتيجة استخدامه
وردية الوجه نتيجة استخدامه بالوجه
حبوب حول الفم
اسمرار مناطق الجلد
بياض مناطق الجلد
ظهور شعر خفيف فى بعض المناطق
حساسية شديدة للضوء
ادري ماله شغل بمستحظرات التجميل بس بحطه وياهم لانه ما لقيت له مكان
8. اعتقاد خاطئ: لا تاخذين شاور وقت الدورة !!
سوري بنات , بس جد جد ويييييييييييييييييييييع !
معلومة قريتها بالمنتدى و لاعت جبدي بصراحه ;s
معقولة طول وقت الدورة ما تاخذون شاور ؟؟ اصلا بالعكس الشاور
نظافة و راحة و تنشيط للدورة الدموية و تحسين انج فريش
اصلا بهذا الوق من الشهر هرمونات الجسم تكون غير
عن باجي الايام و افرازات الجسم غير
اذا اقل وقت دورة 3 ايام
معقولة 3 ايام ما تتسبحين ؟ ولا 4 ولا 5 ؟؟!
هذا وانتي تداومين و تروحين و تيين و تعرقين
اصلا الوصاخه المتراكمة فوق ما اهي تسبب ريحة ,
مو زين تبقى عالجسم !
الصح انج تاخذين شاور بس يكون داااااااافي مو بارد
و تدفين بطنج و ريولج و تتلحفين زين
مو تحاربين الشاور لين تخلصين و بتغتسلين !
صج صج قلبي الصغير لا يتحمل ;(
معلومة صدمتني بصراحة
9. وخروووو عن المنتجات الاسيوية مالت التبييض خاصه اللي تنباع
رخيصه و اي مكان و شركات مو معروفة
او عاملات الصالون يبيعونها او حتى الخدم اييبونها معاهم
لان مكوناتها مو معروفة و مايصير تستعملين شي انتي
ماتدرين شنو فيييه :/
10. كل منتاجتج اللي تشترينها سواء كانت كريمات عطور ميك اب صابون
اي شي من هالنوع
لاا تقطينها بالشمس ! لا تخلينها بالسيارة كلش كلش حتى لو الجو زين
حفظيها بالبيت عندج بمكان درجة حرارته مناسبة و ما توصله الشمس
عشان تحافظين عليها و ما تخرب
و بس جذي خلصنا :$
الموضوع كتبته باسلوبي
من بنات و عيال افكاري لووول p;
سوري اذا طولت عليكم بالحجي و اتمنى اني اكون افدتكم بشي :*
