عمي ابو زوجي كرهني بعيشتي

السلام عليكم و الرحمه
شلونكم يا الطيبات
انا من زمان اتابع المنتدى بس من بره بس اليوم قررت اسوي اكاونت لان اول مره احس اني بروحي جد محتاجه وقفه معنويه معاي تكفون و مابي اقول حق اهلي عشان لا اضيق خلق امي و ابوي بمشاكلي اسفه الموضوع طويل و يمكن البعض بقول مشكله تافهه بس استحملوا معاي والله بالنسبه لي هم الله يفرج همومكم يا رب و محتاجه اي احد افضفضله لاني ماقدر افضفض حق اهلي اخاف تصير مشكله

علاقتي مع اهل ريلي اعتبرها يعني اوكي - صراحه بمجهودي و لا اهما من النوع اللي شوي جامدين و قاسين و ما يبين بعينهم مهما سويت لهم من خير بس الحمدلله على كل حال احسن من وايد غيري - بس عمي ابو ريلي صاير له فتره كل يقط علي قطات كل قطة اكبر من الثانيه... اهوا دايما من اول ما عرفته كل شينه في بنتي يقول انها مني انا و كل زينه في بنتي (مثلا علمتها تعد من 1 -5 ) يقول ان منهم اهما مع ان عمره ما قعدوا معاها و علموها اي شي كل انا اعلمها ... مثلا من شهر تقريبا بنتي الله يحفظها عمرها سنه عصبت على شغله عادي حالها حال اليهال و قامت تصارخ مو راضيه تسكت و ما سكتت لا عندي جان يقول اووف بنتج عسره البنات بعايلتنا (مع العلم ان اصغر بنت بعايلتهم عمرها يمكن 16 سنه) مالهم صوت و بنتج تلعلع هذي اكيد طالعه على اهل امها مو طالعه علينا علينا .. انا قلت هذا ريال كبير لا ارد عليه و سكتت و سويت نفسي ما سمعت... بعدها بفتره نفس الشي بنتي تبجي من شغله و لا يقول لي بنتج اخلاقها عسره و عصبيه هذي اكيد طالعه على عايلتكم بنات عايلتنا هاديات و رقيقات ... و بعد بلعت موس و سكت مابي مشاكل... و ذاك اليوم اهوا عطى حق بنتي قلم و شخبطت عالطوفه (كل اليهال سووها شالمشكله ) جان يقولها هذي اكيد امج اللي معلمتهج هالحركات البايخه ... و هم بعد سكتت (انقهر بس طبعي اسكت ما ارد خصوصا و انا متضايقه عشان لا اندم على كلامي) و من جم يوم بس فجر القنبله اللي سببت مشكله بيني و بينه... كنت اييب بنتي من الحضانه و انا انزلها من السياره جان يشوفني وياها و اهيا كانت تضحك.. جان يقول فطوم تضحك الحين بس اذا عصبت مشكله و انا من باب المجامله قلت له اي والله عمي اذا بجت لا يحوشك جان يقول اي طالعه عليج شكلج انتي عصبيه جان اقوله عمي شكو؟؟ قال لان ابوها كان هادي و اهو صغير قلت له و اهلي يقولون كنت هاديه و انا صغيره و قعد يشرحلي ان الجينات مكتسبه و جيناتهم احسن جينات و ان اكيد هذي جينات اهلي..مع العلم ان عمها اخو ريلي عصبي موت بس انا ما يبت طاريه عشان لا اعقد السالفه بس انا انبطيت حدي و قلت داخلي خلاص ردي عليه و قمت احاول ابي اكلمه جان يطنشني و يجعمني و يمشي و صعدت شقتي و قعدت ابجي.. مادري اشفيه علي مع ان والله انا احسبه مثل ابوي بس اهوا ماحسه يحترمني او يحبني يقول اني مثل بنته بس يعاملني عكسهم و اذا حاولت اتفاهم وياه يقعد يتحسب علي او يجعمني و يطنشني و مرات ما يسلم علي لما يشوفني و رغم اني مشغوله حيل مع بنتي و بيتي و دوامي و انزل اقعد ويا خالتي كل كل قدرت يتهمني ان انا مانزل كلش و انا و لا مره لقاني قاعدة تحت مع ان هالكلام جذب بس مادري ليش يقول جذي... قلت حق ريلي و ريلي قال بكلمه بس انا قلت له لا لا تكلمه اخاف يقول هذي تشتكي عند ريلها علي و تكبر السالفه خصوصا ان اهوا و على كلام ريلي ان من زمان دايما يشوف ان اهوه الصح و بس. رحت له بنفسي كلمته جان يقلب السالفه علي و يحسسني ان الغلط مني... و الحين ما يكلمني و لااكلمه و هونت انزل لهم... احس تعبت من كلامه و تجريحه مو عارفه شسوي ودي نسكم بروحنا بس صعبه شوي ريلي يقول نطري مو الحين.. بس انا تعبت من حركاته و خالتي لو اقولها تقول مالي شغل عندج ابو ريلج انتي كلميه... الله يخليكم شوروا علي شسوي؟؟!!


و سامحووووووووني عالاطاله