لماذا النصر بالذات؟!

لما ينهزم عندما النصر أو يتعادل.. بل وأحياناً من غير ما يلعب أشوف كثير من الجماهير نازلة تهزيء في الفريق وأن ما عنده لاعبين صح! والنقد يتركز في ثلاث نقاط: اللي يقول ما فيه صانع لعب واللي يقول ما فيه دفاع واللي يقول ما فيه حراسة..

طيب خلوكم معي دقيقة بس..

الحين ليش النصر هو الفريق الوحيد اللي لازم تكون كل خاناته الـ 11 مضبوطة 100% حتى يقدر ينافس؟! كل الفرق المنافسة: فتح اهلي اتحاد شباب هلال عندها ثغرات واضحة ومع ذلك ينافسون وياخذون بطولات.. جت على النصر يعني؟!

بعدين صناعة اللعب والدفاع والحراسة خانات تعاني منها الكرة السعودية كلها من أندية ومنتخبات من سنين.. ومع ذلك فيه فرق تفوز بالبطولات برغم معاناتها الفنية..

يا شباب.. الله يرضى عليكم.. فريق فيه لاعبين دوليين مثل السهلاوي وحمود وغالب والغامدي وعيد وحسني وأيوفي وشوكت صحيح فيه نقص حاله حال غيره.. بس ماهوب ذاك النقص اللي يحرم من البطولات والمنافسة عليها.

النصر ما ينقصه الا توفيق الله ثم الخروج من السلبية النفسية.. الفريق ابتعد عن جو المنافسة وأحبط من الصحافة والجماهير..

فما العمل؟ هل تتوقعون الصحافة بتحاول ترفع معنويات الفريق؟؟ هيهات هيهات! الأمر بيد الله ثم أيديكم.. أنتم جماهير العالمي.. قفوا مع الفريق وامنحوه الثقة.. ونسأل الله أن يمنحه التوفيق..

عيدكم مبارك وكل عام وأنتم بخير.. وفالنا البطولات بدءاً من هذا الموسم بحول الله..