حب بلا حدود( 5)

طبعا بتستغربون ليش نزلت الجزء الخامس ورى الرابع على طول كل السالفه اني ماودي اتأخر عليكم لأني يمكن مادخل نت هالايام لان موعد ملكتي قرب وعقبالكم انشالله ( ادعولي بالتوفيق) بس لاتفرحون بالجزء الأخير الحين ههههههههههههه ... منب مطوله عليكم واخليكم مع القصه.


الموظف : مو مشكلة أنا دوامي بيخلص الآن وبأعلمك الطريقة اللي توديك للرياض بأسرع طريقة ..وأنتظر لين الموظف خلص شغله ..وبعدين ركبت معه في السيارة ..وقال لي أنت تبي توصل الرياض قبل الفجر مو جذيه

أنا : ايه الله يخليك طلبتك مسألة حياة أو موت بس كيف وما في طيارات بتوديني يعني بطيارة عسكرية

الموظف : لا الله يهديك أنا أبوي عنده محل تموينات على قدنا ونجيب عصاير وألبان من السعودية من شركة البقرة الحلوب ..والسواق مال الشركة باكستاني بس يعجبك يدوس في الطريق دوس شكله راعي حبوب تصدق لو في عفش ضايع ولا ناسين نحطه في الطيارة نعطيه اياه وهو يوصلها مجرب لا يهمك ..

أنا : يعني أنت ضامنه أخاف يهبد بنا في الطريق ويصدم بنا في عمود ولا شي ونروح ملح

الموظف : ما عليك أقول لك ضامنه يبه هذا يسوق من الدوحة للرياض وهو مغمض عينه شبلاك أنت

وبالفعل ركبت مع الباكستاني .ماشالله أزين ما فيه يعطيك انطباع انك في طيارة كونكورد مو سيارات نقل عصيرات وألبان وكلها نص ساعة وصلنا الحدود القطرية السعودية ..ولما وصلنا الجوازات السعودية ...

الضابط : أنت ياللي راكب جنب السواق ..سعودي

أنا : ايه نعم طال عمرك ومن الرياض بعد في شي طال عمرك .

الضابط : رفيق وقف السيارة على جنب وأنت تعال معي للمكتب .... أقول أنت رايح دبي من قريب

أنا : وش دراك ماشالله عليك أكيد قريت الجواز اليوم الصباح توني واصل من دبي ..

الضابط : زين قوارير ولا حبوب أخلص ..ولا من بقايا أفغانستان .. يالله على مهلك تكلم

أنا : الله يهديك ليه كذا بس لا قوارير ولا حبوب ولا عمري تعديت الخليج من يم الشرق أبد .. ناوي تجيب أجلي هالليلة

الضابط : أقول هالاشكال مارة علي من قبل أنا أبي أساعدك صدقني بس أنت قل لي الصدق .مو منطق في آخر الليل وراكب مع باكستاني في سيارة نقل عسا ما شر ..مطير فلوسك على روسية يعني

أنا : لا والله لا روسية ولا شي ثاني يا طويل العمر السالفة وما فيها وعندها يرن التليفون ...وأرد عليه ..الو ( والضابط ملصق أذنه معي في الجوال )

العنود : هلا وينك يا أخي هاه بشر عسا الأمور تمام لازم توصل للرياض في الفجر علشان ما تخرب الخطة ما صدقنا على الله تضبط الأمور وكل يمشي زي ما تمنينا ..

الضابط : يا عساكر بسرعة جيبوا الكلبشات وكلبشوه وفتشوا السيارة وأنتبهوا السيارة مليانة بالمتفجرات وبلغوا العمليات في الرياض فورا .....ليتك راعي حبوب ولا قوراير كان أهون

أنا : يا حضرة الضابط تراك فاهم السالفة غلط والله العظيم

العنود : من عندك شنو ضابطه وش صار بعد وأنا كل ما أخليك تطيح في مصيبة

الضابط : أنتي من هاه أنتي من .. ووش الخطة وش كنتم ناوين عليه في الرياض ولازم قبل الفجر تكلمي بسرعة

العنود : يمه من أنت شكلي غلطانة يالله باي ...وقفلت جوالها

الضابط : هيّن على بالها إذا قفلت جوالها ما راح نقدر نجيبها بس دواها عندي ..الحين بتجي طيارة مروحية تأخذك للرياض رأسا علشان نباشر معك التحقيق هناك

أنا : الحين يوم تدبرت روحة الرياض جت مصيبة لا تنهضم ولا تنبلع ... يا حضرة الضابط والله العظيم أنك فاهم السالفة غلط مو زي ما أنت متصور قسما بالله أنا وين واللي في رأسك وين يمين بالله ..

الضابط : نصيحة مني توفر حكيك كله لين تروح الرياض فاهم ولا لا أصلا ما يخرب البلد إلا أمثالك كفروا الناس وحاربوهم معقتدين أنهم المسلمين والباقي كفرة والإسلام منكم براء ..

أنا : طال عمرك وراك قلبت خطبة جمعة .. والله العظيم أنت فاهم الموضوع غلط يا أخي هذا وجهي وجه تفجير ولا أفغانستان أنا عساني أصلي الفجر في المسجد قبل بعدين يحلها حلال

الضابط : أقول ولا كلمة الهليكوبتر اللي بتنقلك للرياض في الطريق وأحنا نعلمك شغلك زين ..

وتجي الهليكوبتر و تأخذني للرياض في ساعتين ومن الساعة 2 الفجر والتحقيق معي

المحقق : وش رأيك بابن لادن وتنظيم القاعدة ..هاه

أنا : والله يا طويل العمر ابن لادن الله يهديه بس مدري من لعب في رأسه يعني لو يبي المصلحة صدق كأن قضب أرضه وشغل فليساته في شي ينفع ديرته ولا المسلمين مو ذبح وذبيح ما بقى أحد على وجه الأرض إلا كفره حتى المشايخ جاهم نصيبهم .. أما اللي معه يا مبزرة يا ناس ما لقوا لهم شغل يا ناس من راعين حبوب وقضوم طايرين في العجة ... زينة أجابتي طال عمرك

المحقق : ممكن أعرف وين كنت قبل دبي وهل عندك أسامي ثانيه

أنا : كنت في الدوحة وبعدين رحت دبي وبعدين رجعت الدوحة وكنت طالع الرياض ..بالنسبة للأسامي عد واغلط عبدالعزيز ..عزوزي , العزي ..وعندك أمي إذا عصبت علي تقول عزيز ووجع .وأبوي الله يرحمه يقول لي يا ضيراط . بس

المحقق : مو ملاحظ تنقلاتك وسفراتك في المدة البسيطة شي غريب مرة ما تلاحظ ...

أنا : شف يا طويل العمر القصة وما فيها القصة كيت وكيت بدت من حوالي أسبوعين في لندن ..وسردت له الحكاية كلها من أولها ...وفي هالوقت في جدة في فندق الهيلتون على الكورنيش ..تليفون ريم يرن

ريم : الو مين

عدنان : أهلين والله أنا عدنان موظف الخطوط السعودية حبيت بس أذكرك بموعد رحلتكم و أقول لكم خلاص الحجز تأكد مع أحنا ودنا تنورينا في جدة وقت أطول تأمريني حاجة تانية

ريم : مشكور تسلم والله ما قصرت ..مع السلامة ..عنود لو أنتي محلي ما تحسين بالقهر شوفي الفرق بين عدنان ذيه وهاللي يقول يحبني ويموت فيني و ما صدق على الله ينحاش

العنود : ( في نفسها ) والله شكله يقص علي جالس في دبي مع شلة سكارى و مسوي روحه في الشرطة ..أنا حاولت أساعده بس الواحد يعرف مصلحته بروحه ...

ريم : وش فيك ساكتة ردي علي وش رأيك بالفرق هاه

العنود : والله تعبت ويّأكم سووا اللي يجوز لكم ابتلشت معاكم والله ...

وفي الرياض كان التحقيق ما زال مستمر وبعد أربع ساعات وبعد ما خلصت كل القصة من طقطق لسلامو عليكو من يوم لندن إلى اليوم

المحقق: شف يا عبدالعزيز علشان نتكلم بصراحة أنا ما صدقت ولا كلمة من كلامك وفي نفس الوقت ما في شي نقدر نمسكه عليك شف راح نطلق سراحك الآن بس خل في بالك بنراقبك عن قرب لو تسافر الصين بيكون واحد من عيوننا يراقبك فاهم ولا لا

أنا : الله يخلي لكم عيونكم ..آمين يارب يعني أقدر أطلع خلاص بذمتك خلاص ...

المحقق : ايه يالله طس وفارق وأتمنى أني ما أشوفك هنا مرة ثانية لأني لو شفتك صدقني بتشوف شي ما عمرك شفته في حياتك فاهم ولا لا

أنا : ابشر طال عمرك وكثر الله خيرك ..وانطلق من المباحث و أنصى أقرب ليموزين وأدق على أخوي ... اسمع تآخذ أمي وتطمر بها لكل مستشفيات الرياض ..ترى خالي في الإسعاف وما أدري في أي مستشفى

أخوي : وش القصة وش صار وش تخربط أنت ووش دراك وأنت برى المملكة

أنا : توهم عيال خالي داقين علي بس ما قالوا بأي مستشفى

أخوي : ليه ما دقوا علينا احنا وليه أنت بالذات ..على العموم أدق عليهم الآن وأشوفهم وين هم بأي مستشفى

أنا : صدق ما عندك سالفة يعني هم أبوهم بين الحياة والموت وأنت تدقدق عليهم بالجوال صدق ما تستحي على وجهك تأخذ أمي الآن وتلفلف بها على كل مستشفيات الرياض حتى المستوصفات فاهم ولا لا لين تلقونهم على ما احي ..قصدي على ما ارجع من السفر فاهم ولا لا

وأنتظرهم بالليموزين عند الباب ولما طلع أخوي وأمي من البيت طمرت للبيت ودخلت وارتحت من التعب اللي تعبته وشوي إلا يرن الجرس وافتح الباب وألقى ريم

أنا : ومابيّه ومابيّه وخلوه يروح لأهله وجاية تلحقني صدق الحب يذبح

ريم : روح زين حبك برص وعشرة خرص وين أمك وين اهلك بسرعة نادهم لي هني أبى أفضحك عندهم يا مغازلجي بتناديهم ولا وشلون أدخل أنا لهم بنفسي ...

أنا : أدخلي بس الناس صراحة بيقولون وش هالبنت اللي تدخل بيت ولد ما فيه ألا هو يا بيطلع عليك حكي ولو يدرون بعد أنك كنتي تلفين بي نص أسواق الدوحة وأنتي ماسكة يدي بيقولون وش هاللي ذابة وجهها عليه

ريم : شوف أنت بتجنني أنت وهالويه وين أمك هاه وين أهلك ترى والله لأصارخ الحين وأخلي الناس كلها تتفرج عليك

أنا : صارخي أنا أهلي مو فيه مسافرين ..وأن سألوني عنك بأقول واحدة مجنونة فيني وجالسة تلاحقني من شافتني في مطار هيثرو كل ما رحت ديرة لقيتها وراي ناشبة فيني

ريم : نشبوا فيك أن شاء الله عشرة عفاريت أنا ألاحقك من زينك عاد ولا كرم أخلاقك تدري وشلون

جرس الباب يرن وأروح أفتح الباب وألقى جارنا الشايب أبو عبدالله

الشايب : عسا ما شر يا وليدي وش هالصياح والصراخ وش فيكم عسا الوالدة ما فيها شيء

أنا : تراك غثيتنا يا الشيبة أنت ملصق أذنك ثانيا قلت لك ألف مرة اترك أمي في حالها وقابل مرتك أحسن لك ترى الفياجرا مو لك صدقني الفياجرا تعتبر خطر عليك أداة قتل بالنسبة لك والله العظيم ولو سمحت توكل يالله لبيتكم قبل لا تموت علينا ...وأسكر الباب والتفت على ريم .. ايوة وش كنا نقول

ريم : ما نقول شي على العموم تدري أنا جيت أقول لك انك جبان وماصل وشين وما فيك خصلة واحدة زينة ..يالله يا عنود نمشي علشان نلحق طيارة الدوحة لو بقيت هني دقيقة بعد بطق بنفجر من بعض الناس

العنود : ( همس ) أنت وشلون وش سويت كيف أمداك تلحق على كل ذي

أنا : بعدين أعلمك ..بسرعة ألحقيها لا تسوي بنفسها شي أنا بلحقكم للدوحة بس بالسيارة بس ارتاح شوي

ريم : عنود تعالي بسرعة ترى والله واصلة معي من ذي ...


وراحت ريم مع العنود للمطار بالليموزين و أنا ارتحت ساعة وطلعت بالسيارة قبل ما أخوي وأمي يجون ويلعنون خيري إذا اكتشفوا أني كنت ألعب عليهم ووصلت للفندق في الدوحة على الساعة 6 الفجر وتعبان وهالك من الطريق والمشاوير ...وأول ما وصلت للفندق رحت لموظف الاستقبال ..

أنا : صباح الخير لو سمحت ألاقى عندكم خرقة

الاستقبال : شو شو خرقة لو سمحت يا سيد أحنا هون اوتيل محترم ما عندنا الشغالات هيدي(خربوه عيال الدوحة )

أنا : يابن الحلال الحين فندق طويل عريض وخمس نجوم ومدري ايش وما عندكم خرقة ألاقيها في الشوارع لو أدور بس مالي خلق والله

الاستقبال : شوف يا سيد بتجيبا من الشارع بتجيبا من أي زفت على كيفك بس ما تفوتها لهون في الاوتيل فاهم عليي .. ما بنفوتون عندنا في الاوتيل

أنا : يابن الحلال خرقة بيضا وش فيك أنت

الاستقبال : شوف بيضا سمرا قمحية ما بيفوتوا عنّا وبس هيدني ئلت لك

أنا : أبيها بأكتب عليها شي أبى خرقة أكتب عليها شي افهم مو اللي في بالك يا وصخ

الاستقبال : والله شو بدي ائول لك بس ما عندنا من هي اللي بتئول عنّا سوري كان بدي أساعدك

وأرقى لغرفتي وأدور وألقى فوطة ( فوطة = منشفة ) وأكتب عليها ... ريم تراني أموت فيك ولا أقدر على فراقك صدقيني .. يا ريم والله أحبك واسفط الفوطة وأطلع من الفندق على الساعة 9 ونص وأخذ تاكسي وأروح لمدخل كلية ريم القهر جلسنا في التاكسي وأنا أقول له لف لف لف أدور مدخل البنات من كثر الشباب اللي يدورون عند الكلية نسيت أنها كلية للبنات بس المهم نزلت من التاكسي عند مدخل كلية البنات و أجلس شوي واجلس على الأرض و أعلق لوحتي على شجرتين قدام مدخل الكلية وأجلس تحتها ... وكلها خمس دقائق وتختفي سيارات الشباب وبعد عشر دقائق إلا أشوف شباب الدوحة وعلى المناطق المحيطة بها مراعاة فارق التوقيت كل واحد نازل من سيارته واللي شايل قطعة قماش طولها عشرين متر واللي معه قطعة فلين واللي جايب صحيفة كل كاتب أحبج يا ريم أموت فيك واللي كاتب ريم ما أقدر على فرقاج ..واللي يقول فديت ريم وكل بنات الدوحة ... طبعا أنا ماني فاهم وش السالفة وش هم يبون المهم جالس نص ساعة على ذا الحال بنات الكلية بدوا يتجمعون ويطلون من الدرايش والظاهر في أحد بلغ أن في مظاهرة أو شي زي كذا كلها نص ساعة ألا سيارات الشرطة جايه وتحاصر المكان و الشباب من سمعوا صوت الدوريات كلا ركب سيارته وانحاش بقيت أنا ما معي سيارة لا ومن زين الطابيع أسفط في الفوطة علشان أرجعها للفندق أخاف لو ضاعت يحاسبوني عليها .. ويمسكوني الشرطي ويودون لمركز الشرطة ومن قرادة الحظ يحقق معي نفس الضابط اللي مسكني يوم أطلع لبر العديد يوم يحسبوني أهرب مخدرات وخمور وحشيش

الضابط : وأنا كل ما تطيح في يدي قضية عودة ألقاك بويهي أنت وشو جاي تنشر الجريمة في قطر وش تبي منها

أنا : طال عمرك أنا اللي ودي أسألك قطر كلها ما فيها ضابط ألا أنت بصراحة صرت أتشاءم منك لا تزعل بس هذا شعوري و انطباعي الأول

الضابط : الحين ياللي ما تستحي على ويهم هاد بنات السعودية وش كثرهم ووش زينهم فديتهم والله وجاي حاط عينك على هالكم بنت اللي عندنا في قطر بس أبي أفهم وجاي تبتكر طرق في المغازل عاد احنا عندنا شباب أبد ما يحتاي واحد يسوي شي ألف واحد يسوون مثله

أنا : والله يا طويل العمر أنا مثلك تفاجئت كلهم بسرعة جابوا لوحاتهم وكلهم نفس الشي أحبك يا ريم وأموت فيك ..طيب أفرضوا أني العب عليكم ولا سكران الله يهديهم بس شباب طائش متهور

الضابط : إذا هم متهورين أنت وش ينقال عنك هاه فهمني الحين ممكن بالضبط تفهمني وش أسوى بك احنا هني في قطر عقوبة المغازل جلد وتعهد بعدم التكرار ونفضحه عند مجلس أهله بس أنت مب قطري أولا وثانيا راعي سوابق وثالثا أنا بديت أشك في عقلك

أنا : قولوا لي ترى اللي تسويه عيب واعقل ولا عاد تكررها مرة ثانية وبس تبون تعهد ما عندي مانع

الضابط : المرة ذيك ريم أنقذتك من التهمة ولا كنت بتروح فيها ملح بس هالمرة فهمني من بيساعدك بأجلدك بيدي

أنا : ممكن أعرف ليه أنت حاقد علي طال عمرك والله ماني راعي خرابيط ولا راعي مغازل بس حبيت ....

العسكري : سيدي الضابط في واحدة عند الباب تقول أنها ريم وتقول إن المتهم ذي يصير خطيبها وجاي يثبت لها أنه يموت فيها صج وتبي تقابلك ضروري أخليها تدش ولا لا

الضابط : أبي أفهم بس أنت وش مسوي لريم ساحرها ولا وش القصة بالضبط ..يا عسكري خلها تدش

وتدخل بنت أول مرة أشوفها

البنت : قوة شلونكم عساكم بخير ..هلا حبيبي وحشتني وحشتني كثير

الضابط : الحين أنتي ريم .طيب وريم اللي في المحكمة وش تصير وش السالفة ..أنت خطبت ريم ثانية غير ريم ألاولانية

أنا : والله يا حضرة الضابط الكذب خيبة بس تبي الصدق عاد أنا نفسي ما صرت أدري وش السالفة

العسكري : سيدي الضابط في واحدة تقول أنها ريم خطيبة المتهم وتبي تدخل تشوفه وش أقول لها

الضابط : أنت أعمى ما تشوف وهذي وش تصير مو هذي ريم خطيبته يا عسكري أنت ماكل شي

العسكري : والله العظيم يا سيدي الضابط أني شايفها وصاحي بس في واحدة ثانية تقول أنها ريم وخطيبته وتبي تدخل تشوفه وتتطمأن عليه

الضابط : عبدالعزيز وش القصة فهمني كم واحدة أنت خاطب وكلهم أسمهم ريم أنت مريض نفسي

أنا : والله العظيم طال عمرك أني ما عندي أدنى فكرة بس وش ورانا خلها تدخل نشوف بس عسى ما تطلع توهيقة وشيفة ترى هالأيام بيني وبينك كاثره المقالب

الضابط : خلها تدش يا عسكري نشوف وش تاليتها

وتدخل بنت ثانية علينا وتقول

البنت 2 : اشحالكم وش مسوين هلا قلبي فديتك والله ليت أبو ظبي كلها هنا بدالك والله ما تسوى عليك هالوقفة

الضابط : ممكن يا أختي أعرف من أنتي

البنت 2: أنا ريم من أبو ظبي أدرس هني في كلية فيرجينا وعبدالعزيز روحي وحياتي وكل عمري

الضابط :وأنتي من وشنو قصتج أنتي بعد

البنت 1 : أنا ريم من الكويت أصلا ما جيت هني الدوحة إلا علشان عبدالعزيز هو اللي وعدني بيزورني في الدوحة بعد قلبي حياتي عزوووزي

الضابط : أنت جالس تواعد بنات الناس في ديرتنا قالبها شنو أنت ..

أنا : أقسم بالله العظيم أني صدق صدق ماني فاهم شي بس ما أخبي عليك مبسوط متشقق من الفرحة يذكرني بالسوبرماركت اشتر واحدة واحصل على واحدة مجانا

العسكري : سيدي الضابط في واحدة تقول أنها خطيبة المتهم واسمها ريم

الضابط : يلعن أبوها شغلة خلها تدش نشوف وش سالفتها بعد

البنت 3: خلف طوايفي بعد حلوى الرهش كلها يا أحلى من عين عذاري ..يا بعد الدان والمحار عبدالعزيز والله حرام وحشتنا يا بعد المنامة والمحرق و علىالمقيمين خارجها مراعاة فارق التوقيت .عسا ما جاسوك أو اذوك تحج (تكلم)

الضابط : أنتي من ومن وين ووش قصتج

البنت 3 : أنا ريم من المحرق تبي حلوى,, خطيبته بعد قلبي هو صج كاشت فيني بس ما أقوى أبد على فراقه

الضابط : طبعا أنت ما تعرف شي ولا عندك أدنى فكرة

أنا : أكثر شي يعجبني فيك يا حضرة الضابط أنك لماح وسريع البديهة

العسكري : سيدي الضابط في

الضابط : بنت تقول اسمها ريم وخطيبته خلها تدش يبه أي واحدة تبي تدخل على طول لا تشاور دخلها على طول شغالة منحاشة هم بعد دخلها واحدة ساحرة أي شي أحنا ما عندنا لا روميو ولا فالنتينو عندنا كيوبيد

البنت 4: عبدالعزيز حياتي ..ايش عملوا فيك لا يكونوا عملوا لك حاقة والله أموت قبل ما أوصل صلالة

الضابط : طال عمرك أبي أسألك سؤال يعني من واقع خبرتك ومعرفتك باقي كثير يعني إذا تتوقع عدد أكبر ممكن ننتقل لصالة أكبر علشان نكمل التحقيق معك طال عمرك

أنا : والله طال عمرك أني ما أدري بس أحتياطا أعمل حسابك يمكن يزيدون لو منك كنت أسوي كذا

الضابط : أنتم يا بنات صدق تعرفونه وتحبونه ولا بس جايين دفاعا عنه .ترى الولد راعي شبهه ومو أول مرة نمسكه

ريم الكويتية: بعد طوايفي والله أحبه ويحبني من يوم خزني في سوق شرق ما أجذب عليك هم أنا خزيته ومن يومها و حبه ساكن في وسط قلبي

ريم الأماراتية : هم أنا بعد أموت في زوله من يوم قابلني في دبي في مركز برجمان وهو يبتسم لي ذيج الابتسامة قلب حياتي فوق تحت وين ما أسير صورته وسط عيني فديته وفديت طوله والله

ريم البحرينية: ما أقدىر ( تراها تنكتب كذا علشان نطق البحرينين) والله ما أقدىر أعيش يوم بدونه صار بحياتي مثل حلوى الرهش مالي غناة عناه والله من يوم تقابلنا في سينما السيف وهو حياتاي كلها

ريم العمانية : ما تقول كيف حبيتيه واي حاجة ثانية ..أنت بس اسألني كيف كنت عايشة بدونه في مطار مسقط كان أول لقاء وبدأت حياتي من هناك

الضابط : طبعا أنت تذكر هالمواقف كلها صح يا فالنتينو عصرك وزمانك

أنا : والله الكذب خيبة يا حضرة الضابط بس يمكن تعرف أنا من النوع اللي حبه عنيف فمثلي ينسون ضحاياهم فيما الضحايا تعاني وتعاني الحين جالس أهيء نفسي علشان أتذكر البنت اللي بتجي من بيروت عاد كل شي إلا بيروت

الضابط: بس جب .ما أقدر أقول شي لو سجنتك بتقدر تطلع بكفالة ألفين ريال بعد نص ساعة ..وهذا برأيي مو كفاية تدري وش أحسن حل لك ولهم .. شوفوا لكم أسبوع ما أبيكم تفترقون كلكم ..وين ما تروح ألا وهم معاك والله لو أشوفك بجهة بروحك ولا واحدة منهم مو معك أقطك في السجن على الأقل عشرين سنة فاهمين أنت وياهم

أنا : بس طال عمرك يعني أنت فاهم يعني ما يصير وش تبي أنت

الضابط : يالله توكلوا على الله كلكم ما أبي أشوف ولا واحد منكم ولا تنسى يا عبدالعزيز لو أشوفك بروحك يا ويلك يا سواد ليلك يالله تقلعوا كلكم .

و طلعت ومعي هالأربع متمسكين فيني وتوني طالع وألقى ريم القطرية ومعها العنود بنت عمها

يا ترى لما ريم شافت عبدالعزيز طالع وبيده أربع بنات وش بتسوي له ووش بيصير

تبون تعرفون تابعوا معنا الجزءالسادس والاخير.




[/ALIGN][/SIZE][/ALIGN][/FONT][/COLOR]

شوقتيني للنهايه

يسلمووو شموخ

انتظر الجزء الاخير

تحياتي

وبعدين معك أخت شموخ

ترى قطعتي ظهري من القراءة صحيح اني مامليت

ولكن تعبت احولت عيوني

انسرق وقتي

مشكورة