[تحذير] طريقة نصب في بعض المحلات

السلام عليكم


بكتب لكم تجربة تعرضت لها اليوم حتى ما تتكرر مع غيري
أمس أستأجرت إضاءة من محل بالجبيل أخذ علي 500 ريال ( 100 ريال تأجير + 400 ريال تأمين )

اللي صار أني رحت طلبت أستأجر منهم إضاءة وصار كل عامل يصرفني يقول روحي للثاني بالأخير قال لي العامل اللبناني بأجرك إياها بـ 400 ريال قلت طيب

الإضاءة كانت شغالة بالمحل و ماتدور و مافيها صوت

لما جا صاحب المحل قال له أجرها بـ 500 ريال !!
قلت بعد طيب ماهمني التأمين لأني بحط بالي عليها أكيد

أول ما وصلت البيت حطيتها ع الأرض و شغلتها أشتغلت تمام بس لما بدأت تدور صارت تطلع صوت مزعج
أستغربت وقلت يمكن هي كذا
و طول الحفلة كانت ع الأرض بعيد عن الناس وكنت حريصة عليها

اليوم لما رجعتها قالوا لي أنها مكسورة و راح علي التأمين مع أن الإضاءة نفسها ماتجي قيمتها 150 ريال !!!

صار كلام طويل عريض و أصروا أني كاسرتها
بالأول قال لي اللبناني شغلتها و لقيت فيها صوت يمكن طاحت عندك
لما حلفت له و أكدت له أني طول الوقت حاطتها ع الارض لا يمكن تكون طاحت
كلمني صاحب المحل بعد فترة قال لي أساسا لما رجعتيها حاولنا نشغلها ما اشتغلت !!
كل واحد يقول لي كلام
قال يمكن بالسيارة طاحت قلت له أنا بنفسي اللي أخذتها و كانت بحضني طول الوقت
قال يمكن أطفالكم بالحفلة خربوها قلت كانت حفلة كبار مافيها أطفال

المهم أنهم مصرين أني كسرتها والله يشهد قد أيش كنت حريصة عليها وأنه من شغلتها كان هالصوت فيها

لو كنت أعرف أن هالصوت مو طبيعي كنت رجعتها على طول

بالأخير تركت عندهم المبلغ كامل و الإضاءة لكن بيني و بين نفسي ما أحللهم عند رب العالمين

العبرة من كتابتي للموضوع عشان الكل ينتبه
أنا لما أخذت الإضاءة كانت شغالة تمام عندهم
بس كانوا ضابطينها على حركة وحدة بحيث أنها ما تدور

غشوني و ماودي أحد ينغش بهالطريقة الخبيثة لأني من جد أنقهرت

ماكتبت أسم المحل لأن يمكن يكون ممنوع التشهير
لكن اللي تبي تعرف أسمه ع الخاص
هو محل كبير و معروف بالجبيل البلد

حسبي الله و نعم الوكيل