ياخوان افزعوا لنا تكفون مع هالوكيل - الفروقات حقنا وهدفنا

السلام عليكم ورحمة الله
أخواني أنا رابع سنة لي في التدريس ووالله لو استقبلت من أمري ماستدبرت ما أخترت أكون مدرس ولكن وش نسوي لقمة العيش
بس هالذل إللي أعانيه كل يوم من الوكيل والمدير واقف في صفه بسكوته على أفعاله والله المستعان
وأنا والله منضبط ولله الحمد مع إني أداوم ساعة ونص رايح ومثلها جاي وبقية المعلمين ساكنين جنب المدرسة إلا إنهم صكوني بسوابع وسوادس وبلعتها ولا سويت مشاكل احتراما لذاتي كمعلم
والجدول حق المدرسة غير معلق في غرفة المدرسين من الأساس ولا أقدر أعدل شي منه ولا حتى هم مخليني أطلع عليه ؟

معليش طولت بالمقدمة وأرجع لسالفة الوكيل
هو كل شوي ناط لي في الحصة وداخل علي من غير استئذان وإذا خرج يخرج ساكت ولا كأنه مسوي شي ؟
أنا صراحة ما أدري أحيانا أكون منشغل بالدرس وماني من النوع اللي كثير كلام بالحصة ولا رفع صوت والطلاب الحمد لله ممتازين معي ومشاركين والأخ يدخل يفتش في اوراقي اللي احضرها والقصاصات اللي أجلبها معي للاستعانة بها وقت الدرس ويفتش كتب الطلاب وملفاتهم .. يعني بالعربي مسوي للطلاب شوي ربكة في الحصة وشتت أذهانهم .. وأنا كذلك ..؟


ما أدري هي صلاحيات ولا فرد عضلات ولا وش بالضبط ؟

أحاول أتشغل بحصتي ولا أختلط بأحد لا من بعيد ولا من قريب وأؤدي عملي على أكمل وجه في غرفة المدرسين من تصحيح ومتابعة ومن إلى ويجي يستفز بسؤاله ( ماعندك حصه ) ؟
هذا الرجل غريب الأطوار مدري شلون أتعامل معه صراحه ياليت تفيدوني وأعذروني على التطويل والله من قهرتي والله العالم بالحال