(( فهــدتششش .. وجــزا الوالدين الجنـّــه ))
(( فهــدتششش .. وجــزا الوالدين الجنـّــه ))
صبحكـــم ألله بالخيـــر ..
ومن العـــــايدين
تجاوبا ً مع الحمله اللي شنتها المملوحه على الغبـــار بمنتدى الصرقعه والغربله
ومع مسابفة الأخت المشرفه المتألقه ورد الجوري
حبيت أورد لكم هالقصــه الواقعيــه ..
من عنوااان القصه واضح اسم البطل وهو فهدتششش .. وهو سعودي ماهو لاصربي ولاشيشاني لوجود التششش بآخر اسمه اللي هو فهد لكن هالتششش لها قصه وهي محور السااااالفه كلها ..
هذا فهد ألله يطول بأعمااااركم من الشـــله وكان الوقت مثل الأيام اللي راااحت عيد وكل واحد طاااق له يم ديره .. اللي راااح لأهله واللي طلع برا يتعرف على معااالم الدول الشقيقه والصديقه ويزور المتاااحف والآثاار <====== ايييه كثّر منها .. واحد يقال له طلال ضرب الرقم القياسي لروحاته لمصر وتفاجأ في المره الثمانطعش ان النيل في القااااهره مايصحى الا عقب المغرب ومن الشقه على النوادي الليليه الى الفجر ويرجع للشقه .. من وين يشوف النيل بالله .. المهم .. نرجع لفهد اللي سااافر لأهله في قريه من قرااايا الرياض .. يقول فهد :
وصلت عند الأهل وهات يا استقبااال وسلامات واموااااه كل واحد اقاااابله اللي اعرفه واللي ما اعرفه .. والمشكله كلهم يعرفوني من وين مدري .. وانا ابتلشت فيهم مااا اعرفهم وتبدا عاد الاحراااجات " شكلك نسيتنا يالحبيب " " الله لنا كل من راااح جده نسى جماعته " ومن هالكلام اللي يسم البدن .. وراحت اول يومين من العيد عزايم ومن بيت فلان لبيت فلان وطفشت من الوضع كتمه وجو ماتعودت عليه المهم ضاااق صدري ليله وطلعت لم المزرعه حقتنا بلحالي وقعدت اتأمل في مخلوقات الله ومشغل المسجل وخاش جو مع الطرب .. وتذكرت ان بشنطة السياره نص قارورة شراااب جايبها معي وناسيها .. وفرحت وانا اطلعها وافرش البساط واقعد اقربع منها وامزمز على فصفص مااالح وفستق نسوه البزارين بالسياره .. ساعة زمن والقزازه فاااضيه وانا خاااش جو غير وأقوم أدفن القزازه بعيد لايشوفها أحد وتصير فضيحه بجلاجل .. ومع الحركه والهوا البارد بآخر الليل سكرت وقمت احس نفسي ثقلت شوي قلت ياولد الحق رح لبيتكم ونااام بفراااشك قبل ماااتفقد صدق .. وركبت السياااره ومشيت للبيت ونوافذ السياره مفتوحه والهوا يهب من كل صوب وام كلثوم ترن بالمسجل " يامسكرني " قصدي " يامسهرني " ووصلت للبيت مع هالجو وأنا سكران فل وفاااقد الا رجل .. وقعدت نص سااااعه عند الباب ومخشت بويته كلها ادور خرم المفتاح لين سهـّل الله ولقيته وفتحت باب الحوش حق الفله ودخلت ويوم تناصفت الحوش وانا افقد بقووووه وانسدح بالحوش قريب من الخزان ولاعاد قدرت اتحرك والدنيا تدور فيني .. سكرااااان طينه .. وشوي الا اسمع صوت الشايب أبوي طالع من داخل البيت يسبّح ويهلّل بيروح للمسجد لصلاة الفجر .. لاحول وش هالحظ ما الله امرني امشي بعد خطوتين وادخل الملحق وأنستر فيه .. وحاولت أتحرك وماااافيه أمل ويوم شااافني الوالد ويجي يركض .. وجلس جنبي ويصيح فهد .. فهد .. وانا يالله ارد عليه وصوتي متغيّر وريحتي تعجعج من الشراب .. سم يبه .. وحس ان الوضع ماهوب طبيعي ويصيح على الوالده .. أم فهد أم فهد .. وجت الوالده " كملت " ويوم شافتني منسدح بالحوش وشماغي بديره والنعال بديره وعيوني كل وحده بديره قامت تصيح ياويلي ويلاااااه وابوي يسكتها بس مافيه الا العافيه بس الله العالم ان ولدنا مسكون أو خاااش فيه جنيّه وأنا والله ناقد عليه من أول بس ألله جابها الحين .. وانا اقول يبه مافيني شيء .. قال اسمعيها تحتسي الكافره .. والله الا جيتي برجليك لابو فهد .. وامي سمعت صوتي متغير من هنا وتحسبها الجنيه صدق على كلام ابوي وهي تنط وتبرك على صدري وتلف يديها على رقبتي وهااات ياااخنق وهواش .. انتي وش تبين بجنيني يالكااافره علميني وش تبين فيه يالمخيسه إطلعي منه يالنجسه وتخنق فيني.. الخ من قاموس السب اللي على كيفكم ولافك حلقي منها الا ابوي يوم قال لها روحي هاتي المنقل والمسامير .. ويوم حسيت ان السالفه فيها كوي وانا اقول لابوي يايبه والله مافيني شيء بصوت تعباااان .. قال واللي مثلك يعرف الله ياكااافره " على باله الحين يحاكي الجنيّه " خخخخخخخخ ويقوم يربط يدي بالشماغ بماصورة الخزان وشوي الا الوااالده جااابت العدّه .. والوالد يقرا قرآن علي وماخلى جزء في القرآن ماقرا منه وكل ماجيت أتكلم لطشني على وجهي .. بس يالكااافره .. أن قاله الله إن تطلعين اليوم من ولدي .. وانا أطالع بالضو والوالد حاط المسامير فيها ينتظرها تحتمي زيييين وتصير حمراااا تسر الناظرين .. ويوم احتمت صح وياخذ واااحد منها وفي محاوله أخيره مني للمقاومه حركت يدي اللي ماهي مربوطه وهو يقول لامي : جوّديه يا أم فهد وتقوم الوالده الله يحييها وتجلس على يدي بركبها ويديها بكل ما اوتيت من قوه وخوف عل جنينها المنكوب خخخخخخخخ .. وهو يصكني باول مسماااار في الصدغ اليمين تشششششششششششششششش وحسيت الوجع بقلبي وريحة اللحم المحترق والشعر ماليه خشمي .. واخذ الثاني قلت الحق نفسك ياولد وبديت اصحصح وتفك شوي السكره قلت له : خلاص يا ابوفهد بطلع من ولدك وتووبه ماعاد ارجع له (( يعني اني الجنيّه )) كودي افتك من المسمار الثاني .. بس من تكلم ؟ .. الوالد اندمج بقوه مع الوضع وراسه وألف سيف الا يطلّع الجنيّه مني قال : هيّن ماعنك وعن الكويه وانا ابو فهد وتشششششششششششششش وصقعني بالثاني في الصدغ الشمال .. وعقبها هجدت وامتنعت عن أي مقااااومه .. والوالده تقول بشّر يابو فهد ؟ .. سكت الوااالد دقيقتين وهو يطالع فيني وانا هاجد ولا نفس .. قال أبشرك الله فكه منها الكافره وتقوم الوالده تنط وتحب راااسه وايديه وتدعي له " ياجعلها ماتعرض على النار " تقصد يدين الوالد .. خخخخخخخخ .. وهم يتشاقلوني ويوصلوني للملحق وينطلوني على أقرب طرّاحه .. وقال الوالد بطلع الحق الصلاة ضيعتها علينا هالكافره حسبي الله ونعم الوكيل .. وانا في نفسي أقول حسبي الله على الشراب وعلى ام كلثوم وعلى يامسهرني .. ومن عقبها تووووووووبه من الشراب للأبد وجزا الوالدين الجنّه اللي ببراءتهم وفطرتهم السليمه اللي ماتعرف سكر وسكار فكوني منه !!
طبعا ً قعدنا شهر وحنا كل ماشفنا فهد غشينا من الضحك عليه .. والكويات الحلوين زي الجنيهااات الذهب على صدوغه ومن يومها بطل فهد شراااب فعلا ً وتااب .. وبطل بعد ينسف الشماغ او الغتره على فوق دايم منزلها خخخخخخخخخخخخخخخخ !!
ومن يومها أيضا ً وحنّا نسميّه فهدتششش !!
:biggrin: :biggrin: :biggrin:
ههههههههههههههههههههههههه هههههههههههههههههه
ههههههههههههههههههههههههه هههههههههههههههههه
ومن جـــــد ..
(( جـــزا الوالــدين الجنــــّـه ))
أتمنى السالفه تكون نالت استحسانكم
وبصراااحه حاولت ازخرفها بالايقونات وبغيت أستعين بملكة الأيقونات كلي حلا لكن زي العاااده مالها أثر !! :biggrin:
تحياااااااتي للجميع !!
حقوق النشر محفوظه لسعود والمملوحه وورد بس !!
