طــلابي أمرضوني والتعليم كله أمرضني وش الحل.؟؟ - الفروقات حقنا وهدفنا
بسم الله الرحمن الرحيم
أنا قدّر الله عليّ وصرت معلم ..
ومن يوم تعينت وأنا ماسك صف ثاني ابتدائي..
العام كنت بمدرسة ووضعها مزري مع أنها جنب بيتي ولا حتى 3 دقايق بالسيارة لكن عفتها والله وطلبت نقل لمدرسة بحي ثاني حولنا .
انا من النوع اللي بصراحة اشيل هم الطلاب واتعب معهم واكتب بسجلاتهم واتابعهم وأحرص عليهم والله أني اروح البيت وصوتي متغير من الصراخ بالفصل .
العام رسب عندي تقريبا 6 كلهم مييييييح تعبت معهم أساسيات الحروف ما يعرفونها وحسبي الله على من درسّهم بصف اول ونجحهم .
أقولهم لا تنجحّون الا اللي يستاهل النجاح لا تظلمونهم وكلن يقول حرام يرسب ويعيد سنه ويعطونهم كلهم بالتقويم 1؟
يوم رسبّت الـ 6 العام تكالبت عليّ الأمم المعلمين والإدارة أنت متشدد انت ظالم انت ما ترحم ؟؟
قلت يا اخوان طالب ما يعرف الحروف شلون يروح صف 3 ؟ تبغون أدمره زيادة ؟؟
وعشت في قلق نفسي بسبب هالموضوع وكرهت المدرسة ..بالأخير عملت بضميري ورسبتهم لإنهم فعلاً ما يستحقون .
والله يا جماعة أني شرحت وشرحت وكتبت لهم بالسجلات والمتابعة وفوق 10 خطابات لأولياء الأمور ولا حياة لمن تنادي ؟
وبالأخير عملت لهم خطة علاجية وسحبوا عليّ ما داوموا واللي داوم جاي وهو ماله نيه اساسا ينجح .ولا حتى يذاكر .
الحين نقلت لمدرسة ثانية وع قول المثل ههههههههههههه ما أردى من المربوط إلا المنفلت
طبعا مبنى مستأجر وحالته متهالك جداً وعادي هذا مو مهم بس الغريب أن فصلي جحر وعدد الطلاب فوق 27 والتهوية دريشه وحده بس قلت يالله مو مهم نتحمّل .
بديت معهم بداية هالأسبوع طبعا الأسبوع الماضي عملت لهم مراجعة حروف لكن للأسف النتائج مخيّبة .
طلاب ما يعرفون حروف أبداً ولا كنهم درسوها وطلاب ثانين يعرفونها بس مثلا أكتب كلمة عمل يقراها كذا عين ميم لام ؟؟
أقوله لا لاااااااا مو كذا وأشرح ويقول استاذ صف أول يقولنا كذا نقراها ؟؟
لكن بالمقابل فيه يمكن 3 او 4 ممتازين وأعتقد بسبب إهتمام الاهل .
بديت معهم هالأسبوع بداية حامية الوطيس . سجلات متابعات أوراق بروجكتور عروض على الحاسب خطه اسبوعية ما خليت شيء ما سويته أجرمت والله حتى بحقّ صحتي .
والنتيجة جاني معلم بالصف اللي جنبي يقولي أنت مصري يا اخوي لا تسوي كذا لا تعطي اوراق ومدري ايش لا تسوي خطه لهم خلهم يكتبون بالسجل ؟ انحرجت منه بسبب اني معلم جديد عندهم قلت لا عادي انا متعود والا المفروض اقوله مالك شغل ؟
واليوم اللي غايبين عندي فوق 11 هههههههههههه
المشكلة الأربعاء عندي تصحيح ومراجعة وقراءه والغياب كثير والبقية نصهم ما كتب شيء ولا راجع والبعض ما جاب كتب والبعض بدون سجل يقول ابوي عيا يشتري لي وبعضهم عطيته انا سجل لقيته طايح بدروج المدرسة وعطيته .
أنا وش اسوي ؟؟؟؟
تعبت ؟؟ والله تعبت . يا جماعة إن عملت بالأمانة والله ما ينجحون .لكن انا ترى ما يرسب عندي الا اللي منتهين مرررررره ..
والحمد لله اللي ينجحون عندي غالبيتهم يروحون صف ثالث يقرون ويكتبون ببراعة ويشهدون بالشيء هذا معلمين صف ثالث .
انا والله حتى صف ثاني اعطيهم املاء تقويه من برى المنهج مساعده مني عشان اللي يعرف يكتب يزيد معرفه واللي ما يعرف ع الاقل يعرف الأساسيات .
انا ما ابي احد يرسب وبنفس الوقت ان رسبّت كلن تكلم وجاني اولياء الامور وصارت لي مشاكل والبعض منهم يحط العيب فيني يقولون منك انت والا كيف يرسبون ؟؟؟
وبعضهم ياخذون بالرياضيات 1 وبـ لغتي 4 هههههههه ..والله يا اخوان اني اكتب رقم 2 ع السبورة ويقولون رقم 6 ؟ مدري شلون معلم الرياضيات يرضى بالشيء هذا ؟
انا افكّر اهرب من الفصل ابي نشاط ابي ارشاد ابي ايفاد ابي حل ابي حل ابي حل
وش اسوي كيف اخذ دورات وين اروح ابي ارشاد الدبلوم ينفع ؟؟ وش اسهل الطرق للهروب من جحيم الفصل .
