(( ابن العمده ))

*( ما تطيح السقيفة إلا على الضعيفة ).. لازم من جمعية عمومية لانتخاب رئيس، طال عمرك ما عندنا وقت، لازم يعني لازم، بس غيرنا ما سوى جمعية، ما لكم ومال غيركم خلاص قضي الأمر.. ديون ولازم تسددوها ولا ما في محترفين، كيف كده ونحن مالنا يومين في الرئاسة والديون طال عمرك متلتله وغيرنا عنده ديون وما سددها، هو كده الأنظمة والقوانين لازم من تطبيقها ولا راسكم والجدر، سم طال عمرك كله إلا الجدر لحسن راسنا أتورم من كثر ما تطيح عليه السقيفة !!.
.
*(إيش تأخذ القرعة من كد الأمشاط ).. غرامة مئة ألف ريال على الفريق لتأخره لمدة دقيقتين في نزوله الملعب، والهتافات المسيئة، ورمي الجمهور الرولات الورقية على الملعب.. الهتافات ما نرضاها طال عمرك لكن التأخير كلها دقيقتين، ورمي الرول ترى الجمهور الأرجنتيني يموت في رمي الشريط البيض، وبعدين في جماهير أندية دخلت ملاعبنا بعربيات الخلطه وحولوا المباراة (لليوم المفتوح).. أقول تدفعوا ولا تكثروا هرج، طيب ممكن نستأنف لأنه بصراحة مية ألف كثير ونحن جيوبنا (قرعه) وانتم طال عمركم شغالين تمشيط ؟!.
.
*(سلام يا جاري انت في دارك وأنا في داري).. تم تأجيل مباراة الاتحاد والأهلي بناءً على المصلحة العامة (والذات العام).. طال عمرك وصلنا خطاب من الاتحاد السعودي قبل فترة يفيد بعدم تأجيل المبارة إيش اللي أستجد، المخرج(( ابن العمده )) عاوز كده.. بس ممكن نعرف الأسباب؟، للمصلحة العامة، وهي المصلحة العامة ذي عوره ما تراعي مصلحة الاتحاد، وبعدين طال عمرك اسمها ( عامة ) يعني تشملنا مع بقية الأندية ولا أحنا أولاد البطه السوده، لا بطه صفره ولا سوده (الجار أولى بالشفعة ) !!.
.
*(الإبره اللي فيها خيطين ما تخيط ).. سؤال أخير يا طويل العمر مين اللي اقترح عليكم نلعب مع أسبانيا ؟، الذات العام يا ولدي، هو في كل شي يحشر نفسه هذا الذات العام، وأنا أقول ليه أتخيطنا بخمسة غروز أترونه الإبره فيها خيطين !!.
.
(ببوز القلم)
.
*مهما حاولنا في نفخ العبارة، وتفخيم المصطلح لن يزيد المعنى إلا ركاكة واضطراب والدليل (الذات العام) هذه العبارة التي أفحمت في خطاب مهلهل لتبرير ما لا يمكن تبريره.. حضرة الذات العام ممكن تعرفنا بنفسك وتظهر أمام الملأ ولا هو بس فالح في الهرووووب !!.." دمتم طيبين "