سواق ليموزين وقصصه مع الناس ( موت بنات من المبيد الحشري )

مساكم / صبحكم الله بالخير

يوم الأحد 8/10/1433ه ركب معي واحد بعد العشاء من شارع أنكاس في حي الروضة الى حي النسيم

كان عند ناس من جماعته رايح يعزيهم في موت بناتهم..بنات في عمر الزهور اكبر وحدة عمرها 12 سنة والثانية 10 سنين

تدرون وش القصة ،، القصة مؤلمة

السبب في موتهم أمهم بس عن طريق الخطأ وأمهم الأن في حالة نفسية لايعلمها الا الله .

القصة ومافيها أن الأم غسلت راس بناتها بالمبيد الحشري حق النمل والصراصير اللي يبيعونه في الصيدليات البيطرية وشركات مكافحة الحشرات.

غسلتهم عشان الصيبان والقمل تروح من راس بناتها .يقول الرجل ماكملو ساعة الا والبنات سلموا الروح لبارئها.

يقول لي الرجال حسبي الله على من شار عليها هذا الشور ..ولكن قدر الله وماشاء فعل .

أنا لله وأنا اليه راجعون ....

فنصيحة لوجه الله لكم ياأخواني وياأخوات وياأباء وياأمهات

لاتستخدمون المبيد الحشري بغرض قتل الحشرات الزاحفة هذا في بيوتكم لانه يكتم ويضر بالرئة وضرره أكبر من نفعه.

ولاتستخدمون أيضا أي شئ دواء وصفة طبية الا بعد مشاورة أهل الأختصاص لأن الأعمار والأرواح ليست لعبة .

أسأل الله أن يصبر أبو البنات وأمهم وأن يعوضهم خير ..

قدر الله وماشاء فعل ،،،،.


^^ سواق ليموزين _ من المكافحين بالحياة ^^

منقوووووووووووووول