ماعليه .. وفال طيب يانصر

ماعليه وفال طيب يانصر=والله انك عاد بيضت الجبين

صح باقي خلل بخط الظهر=والهجوم اثنين لكن باردين

لكن المذن ينادي للفجر=أقبلت شمس الفضا يانايمين

يانصر ياعوق من باق وغدر=يانصر يانصرة المستضعفين

كم سنين عجاف وايام ودهر=ماتركناك وبقينا صامدين

يمكن ان اعلامنا صابه خور=لكن الجمهور ماهم خانعين

كم ذليلٍ من عدوٍ ماظهر=لا ذكر طاريك يخفا مايبين

وكم تجرعنا مرارات وقهر=بكرة وبعده الى شهور وسنين

وكم قفلنا من تلافونٍ هدر=بالشماتة من خصومٍ شامتين

عالمية أنقذتنا هالعشر=نشكرك عنها ولا انحن جاحدين

شف وهي لا غيرها باب المفر=أعجزت أصحاب خمسين ومئين

كيف اجل لو يصهل الطرْف الأغر=في ميادينه كماهو من سنين

كان مايبقا على الكوكب نفر=يعرف البرشا وهرتابارلين

عد أعاد الله مجداً ما اندثر=أفرح الأحباب واخز الحاقدين

خلك من اليوم من (نور وتكر)=عدها زكاة مال لظاعنين

بس عاد اوقف ترا الدعوا خطر=لاتراوغ لا يسار ولا يمين

باكر انس العفو ماحولك عذر=كان ماتصطاد لك صيدٍ ثمين

حارسك ماينحزم فيه الظهر=الحقيقة تتبع يامسلمين

كل ماحمي الوطيس المكفهر=مالقينا حارسٍ يحمي العرين

واقعٍ مشهود واضح للنظر=ياإلاهي يامعين الصابرين

كيف كلٍ زان وضعه وازدهر=فيصلي واهل الحسا متقدمين

وانت واصلت التعثر بالحفر=ليتها كبوة جواد او كبوتين

الختام المختصر باخرسطر=ماني موصيك غير بكلمتين

مابقا لك غير فرصة بالعمر=لاتفوتهافدوك الحاسدين
بقلم محبكم ابو بيان