لمن ورط بشيك بدون رصيد

اغنام - ابل - دواجن - طيور

كل عام والجميع بالف خير
والشهر مبارك

للاسف بلشنا بناس ماتخاف الله .. تعطي شيكات بدون رصيد مع علمها بانه ليس لديهم الامكانيه للسداد .. وهذا ليس قرض او تقسيط ولكن مقابل بضاعه او شروه او خلاف

المهم انا واحد من اللي بلشوا بشيكين بدون رصيد واحد له اربع سنوات في مراجعات مالها نهايه لين حصلت الحل

اولا يجب التاكد من ان بيانات الشيك كامله عند استلامه مثل الاسم مطابق وان يوضع فيه التاريخ ومدينة الاصدار .. لاتنسى صوره من بطاقة صاحب الشيك اذا الشيك مؤجل
ثانيا. راجع البنك المصدر للشيك وخذ خطاب اعتراض .. للاسف بعض الافرع لايقومون بعمل ذلك ولكن حسب النظام فانه يجب عليهم اصدار خطاب الاعتراض مهما يكن ولاتسمع لما يقولونه بمراجعت فرع صاحب الحساب وخرابيطهم، لاتتطلع لين يعطونك ورقة الاعتراض ويوضح فيها سبب عدم صرف الشيك
ثالثا. صور الاوراق مع الشيكات والاعتراض وعليك باقرب مركز شرطه ،الحقوق الخاص ، قسم تنفيذ الاحكام وقدم الاوراق وتاكد بانه يتم التعميم على الشخص وهذا تعميم رقم واحد
رابعا. بعد شهر من التعميم الاول راجع الشرطه لكي يعممون عليه تعميم ثاني وهو الاحضار بالخفاره ولكن هنا لابد انك تعرف وينه فيه وهذي الورطه .. هذولا الناس للاسف من كثرة اجرامهم فانهم يغيرون منازلهم وهواتفهم وكل شي من فتره للاخرى
خامسا. بعد شهر اخر راجع الشرطه لكي يوقفوا عليه الخدمات لكل شي وحسب ما سمعت فانه يشمل خدمات وزارة الداخليه والبنوك والمستشفيات الحكوميه (ما ادري كيف ولكن هذا ماسمعته ).. هذا التعميم يكتف اهله ولايقدر يصلح اي شي نهائيا فلازم يراجع الشرطه ويتم القبض عليه او يتصل عليك للمفاهمه وهنا لك الحق في المفاهمه ...

ما ذكرته اعلاه هو ما تم افادتي به من قبل احد الاخوه في الامن العام لانني رحت اشتكي هناك وقاموا بالواجب الله يجزاهم بالخير وخاصه للشيك ابو اربع سنوات ...

طبعا فيه ناس يقولون يقدرون يطلعون لك حقك وياخذون نسبه ومن هالخرابيط وتصير ورطان معهم .. فلا يهمك كلامهم .. ماحك ظهرك مثل ظفرك واهو مشوار للتعرف على مباني الحكومه ووجيه جديد وتطلع بفايده ..

المهم في الموضوع انه اذا جلست فتره مثلي وماحصلت شي او ماجاك خبر ، فعليك بالامن العام في الناصريه بمعروضك وصور اوراقك وفيه مكتب لحقوق الانسان تابع لمدير الامن العام وسلمهم الاوراق وعزا الله يبدون الاتصالات وانت عندهم ويطلبون افادات مركز الشرطه لمعرفةاذا كان فيه تهاون منهم .. ويجيك الخير باذن الله في فتره لاتتوقعها .. ولكن لابد من مرور التعاميم اعلاه اول

الله يكفينا شر هالعالم المريضه ...

حبيت اشارككم هذاالموضوع لعل الله يفيد احد ..