كرهت رمضان والسبب زقارة

مرحبا بنات

مبارك عليكم الشهر مقدما وكل عام وانتوا بخير :eh_s(17):

مثل ما انتوا شايفين بالعنوان ، باجر إن شاء الله رمضان والكل فرحان ومستانس إلا أنا الله وكيلكم حالتي حالة وصار لي اسبوعين واكثر لا ليلي ليل ولا نهاري نهار لا اكل مثل الناس ولا راحة ولا نوم ....

ابوي الله يسلمكم مدخن ويشرب باكيتين باليوم مع انه ريال كبير فيه 61 سنة تقريبا ...
اهوه منفصل عن امي وأنا وخواتي قايمين فيه .... مو هذي المشكلة ...

المشكلة انه برمضان يصير جبريت يا بنات عصبي عصبي نااااااااار بطريقة لا تطاق
اللي والله يتهاوش على اي شي ويصرخ ويهز البيت هز ، ويا ليتها واقفة على البيت احيانا يوقف جدام باب السكة ويقعد يصارخ ، كل سنة نصير طماشة حق الفريج ، واحد من الرمضانات ركض وراي من غرفة لي غرفة عشان ضحكت العصر على حلقة كانت معروضة بالتلفزيون :/ السنة اللي طافت اخوي الصغير ياب السمبوسة غلط عمره 18 عطاه عسماوي فر ويهه بالشارع جدام الله وخلقه :eh_s(2): و بعد تهاوش ويا عمي ريال عمره اخر الخمسينات ومسح فيه الارض على السفرة والكل متيمعين :( هذا غير هوشاته مع امي الله لا يوريكم ويكافيكم الشر ....

المشكلة انه بعد الفطور وعقب الزقاير والقهوة يطخ ويتندم ... بس يكابر ومايرضى يعترف انه اللي صار مو طبيعي ، و أنا ما اقصد ابيه يعتذر لا حشى ، اللي اقصده ابيه يمشي الامور طبيعية بس اهو يكابر و يحط اعذار واهية ويصمم يركبنا الغلط و يتم متأكسد ويسف ويتف ويلعن والسبه الوضع المحرج اللي حط روحه فيه ويأكسد البيت كله معاه ....

وهذي حالتي طووووول رمضان ....

منو فيكم تعاني من نفس المصيبة

عصبية واحد من اهلها " ابوها ، اخوها ، زوجها ، ولا حتى ولدها الله يكافيكم الشر " برمضان والسبة التدخين ؟

وشلون اتصرفون ؟
المشكلة اني ما اقدر اتحاشا ابوي لأني مسئولة عن طلباته وكل شغله فمضطره احتك فيه بنهار رمضان :/

قولولي شالصرفة :eh_s(2):

ربي أجرني في مصيبتي واخلف لي خيرا منها ..............