شاكة في أم زوجي

السلام عليكم بنات ...

حبيت اسجل واقولكم اللي في خاطري

ترددت وايد قبل لااكتب هالموضوع بس صارلي فترة والشك ياكل قلبي ماقدر اتحمل أكثر وأبي اخذ رايكم..


انا تزوجت عن حب،، انا وزوجي خليجيين مب كويتيين،، بس كل واحد فينا من دولة وانا عايشة مع ريلي فبلاده وماعرف

حد هناك..

قبل الزواج امه ماكانت موافقة ومع اصرار زوجي وافقت مجبورة..

،، كنت اقول عادي بكسبها مع الوقت وبتعرف انها غلطت في حقي وانا مب ناقصني شي الحمدلله ،، بس ام زوجي عربية ومن جنسية معروفة بلسانها الطويل

وكانت تبي زوجي ياخذ وحدة من اهلها من بلادهم وبناتهم لا تعليم ولا ثقافة مايكملون الاعدادي وأغلبهم جمالهم عادي..

أم زوجي فنظرها الزوجة مكانها المطبخ وحياتها شغل بيتها وبس

عمي مب من النوع المتحجر واجتماعي بس هي تفكيرها جذي..

المهم قبل الزواج كانت شرانية ووقحة بمعنى الكلمة لسانها وصخ وتهدد ووصلت فيها انها كانت تبي تنشر صوري عالنت!!!

المهم اثنينا غلطنا وعفا الله عما سلف وانا قررت افتح صفحة جديدة بعد الزواج وسامحتها من قلبي والله شاهد علي..

حملت بعد زواجي بشهر واحنا ماكنا مستقرين ننتقل بين بيتنا وبيتهم..

في البداية ماحسيتها مستانسة كنت اقول يتهيأ لي و سافرت لهلي ورجعت بعد اسبوعين وهني بدت المشاكل معاها ،،

كانت دووم تنتقدني خصوصاً من ورا زوجي الا مانظف غرفتي الا كله نايمة
وساعات تدخل الغرفة وتقولي فتحي الدريشة خلي الغرفة تتهوا تخيلو والدريشة أصلاً مفتوحة أنا احب اخلي هوا الغرفة يتجدد تحسسني اني وصخة,,


تتسلط في كل شي حتى شلون انشر الملابس عالحبل لها طرق خاصة وتتشرط وايد "لاتغسلين الدلاغات (الله يعزكم) في الغسالة غسليها باليد وصاخه"

وتقول الناس الوصخين يغسلون لبسهم الداخلي في الغسالة!!!!!هاللي ناقص اغسل على يدي بعد.. انا علي من ثيابي اكلي وغرفتي..

تتدخل فطلعاتنا ودخلاتنا ومصاريفنا ماتحب تشوف زوجي يشتري لي شي،،

في بداية حملي صادني جفاف تمر اسابيع وماشرب قلاص ماي كله فالطواري ودايخة..

وفوق هاي تجيني ام زوجي تتحلطم ليش ماتقعدين معانا وليش غرفتج وصخه وتدخل علي الصبح بدون استئذان ولما اقفل الباب تقعد تطقه وتزعجني لين قفلت وقلت لزوجي ابي ارد بيتنا مابي اقعد فبيت اهله..

كانت تقولي انتي كسولة والمشي زين امشي اشتغلي تحركي اتحرك وامشي وانا حامل فالشهور الأولى وحملي ماثبت!!!

ومرة جابت لي زعتر اشربه استغربت وقلت لها مب زين عقب صارت تجيب لي شاي بزعتر !! وشاي بميرمية !!! وكل هالأشياء مب زينة حق الحامل ولا انا غلطانة؟!!!

ولما سألها زوجي الميرمية تضر الحامل قالت له سمعت فبرنامج ان كثرتها تضر عيل ليش تعطيني منها..!!

حتى مرة كان الجو بارد وعند جارتهم زيارة ماتدري اني حامل جابت لي زنجبيل حاار تنشم ريحته من عند الباب وأم زوجي ما قالت لي لاتشربين مب زين!!

ولما كنا نبي نروح نشوف جنس البيبي اتصلت وقلنا لها تخيلو شكان ردها : قالت ماعندكم سالفة!! أول حفيد/ة لج وهذا كلامج...وتتضايق لما نشتري اغراض للبيبي مصاريف يازعم..

وبعد مارحنا بيتنا بفترة التهبت علي الزايدة وسويت العملية وقعدت عندهم كانت تغار لما تشوف ريلي يساعدني فالمشي والقومة والقعدة وتقط نغزات.

صارت هوشة بيني وبين زوجي بسبب أسلوبها الخايس وكنت ابي اتطلق ومع اصراري طلقني طلقة عقب رجعني فنفس اليوم..

تخيلو شكان ردها كل بيت تصير فيه مشاكل عادي !! شنو كل بيت تصير فيه مشاكل المشاكل اللي تصير بينا هي سببها تامر علي على بالها جاية من مكتب الخدم

وصلت فيها تناديني تقولي حطي جوتي زوجج فالشمس يتهوا خير ان شا الله ..

المهم احنا رحنا بيتنا بعدها وصرت اروح لهم زيارات وقبل العملية

كنت احس بالام فظيعة فبطني تحت مب صوب الزايدة وكل فترة تزيد الالام..

رحت الطواري وقالولي عنق الرحم مفتوح واحتمال ولادة مبكرة كنت كله فالطواري واخذ ابر تثبيت..

لما دخلت السابع رحت بيت اهلي ارتاح هناك لين اربي ومن وانا هناك صارت تجيني افكار

مادري صج ولا انا ظالمتها بس شي يشكك معقولة ماتعرف ان هالاشياء مضرة بالحمل مرة عندها ست عيال ماتعرف

وكانت تقولي عادي مب لازم تروحين كل مواعيدج مع انها كانت فترة تحليل سكر الحمل

وانا ماكنت ادري ولا رحت عبالي مراجعات عادية نفس كل مرة واكتفيت بروحات الطوارئ وطبعا فالطواري ماسوولي فحص سكر وطلع عندي سكر الحمل اكتشفته الشهر الثامن

وفكل زيارة اشرب فوق 6 استكانات شاي ومرة لقيت عشبة في الغوري هني شكيت العشبة خضرة واوراقها مب وايد صغيرة وصف من الجهتين قعدت ادور عنها فالنت

وقريت بالصدفة ان المشموم (الريحان) مضر وينشط الرحم وتذكرت انها كانت تحط مشموم في الشاي وانا استغربت..!!

هني الشك وصل عندي 99% مابي اظلمها اقول معقولة تسويها ماتوقع انها بهالشر اخاف اكون ظالمتها ريلي قبل قالي

ادري انها ماتحبج ولاتبي هالياهل منج ولما قلت له اللي افكر فيه تضايق وقالي ماتسويها شدعوة شلون تفكرين جذي..

وامي واختي تقول هذول يسوون اي شي عادي..

كرهتها والله قصدت ولا ماقصدت انا انضريت من وراها والحمدلله البنت مافيها شي ،،

ماكانت تراعي نفسيتي وانا حامل وتتعمد تزعجني حتى وقت النوم ونصايحها خايسة..

تبيني اكرف واتعب وانا حامل انا وانا صاحية ماشلت صحني عقب الأكل عشان اشتغل وانا تعبانة..

قولولي شلون اتعامل معاها انا للحين من بعد ماربيت ماشفتها ويمكن اسافر الاسبوع الجاي..

تكفون قولولي انا ظلمتها ولا هي متعمدة تطيح البيبي وشسوي

لما اروح هناك انا بقعد عندهم شهر وزوجي مقتنع انها صارت تحبني لأنها تقوله مشتاقة لهم ومتى اشوفهم ووو..

أنا بقعد عندهم فترة على مارتب بيتي واجيب خدامة شسوي بليز بنات ادري طولت بس بغيت احطكم في الصورة..