تجربتي و نزولي 12 كيلو بشهرين

السلام عليكم و رحمة الله و بركاته .. :eh_s(17):

اول شي صار لي فترة طويلة ما سجلت بمنتديات و شاركت
و ترددت كذا مرة قبل لا ادخل و اكتب لكم هالموضوع البسيط و اللي سجلت خصوصا عشانه .
منتداكم و بكل بساطة روعـة مو بس من ناحية القسم الصحي من كل النواحي
و كنت ما اعتقد ان للحين في منتديات ناجحة بهالشكل , الله يوفقكم و للامام .
اليوم حابة اقولكم عن تجربتي في الرجيم و مسيرتي وياه .
انا صغيرة و توني باول الحياة عمري 17 سنة , خلوني اقولكم شوي عن طفولتي .:eh_s(22):
اول سنيني كنت ضعيفة لدرجة ان عظامي تبين , و كانوا اهلي وايد تعبانين معاي لاني ما كنت اكل
كنت جلد على عظم , خذوني لكذا دكتور و لما يفحصوني ويجوفون عقلي و ذكائي يطمنون امي و ابوي و بـس .
و تميت على حالي لين دخلت الروضة و كنت مغربلة المعلمات ارجع عزكم الله و ما ارضى اكل .
اول مادخلت الابتدائي , دخلت منطقة الخطر بدى يزيد وزني , بديت انتفــخ بمعنى اصح , كنت مو مهتمة للموضوع و توني صغيرة و مو عارفة شقاعدة اسوي , و اتذكر كان في برنامج للسمنة بالمدرسة وقتها كان وزني 40 و عمري 11 يمكن او 10 بس ما اهتميت للموضوع و لا افتكرت بكلام المعلمات و اللي كنت افكر فيه ان كلامهم لا يودي و لا ييب .
و كملت هالمرحلة و طبعا مع كل سنة تمر يزيد وزني و ما دخلت الاعدادي الا و انا في 70 , كنت انجرح وايد لاني حساسة و البنات ما يرحمون ولسانهم الطويل , الكل كان يطالعني بنظرات و الاغلبية كانوا يقطون علي كلام , كنت اروح كل يوم اصيح , و وايد مرات تعرفت على بنات و لما يجوفوني ينصدمون ويهدوني ! ما كنت بالانتفاخ ذاك كان في اكثر مني و امتن مني . كنت اعرف ان وزني مو شوي بس ردة فعل البعض مبالغ فيها ! ما اهتميت .. بس من داخلي كنت اعرف ان ملامحي ضاعت وسط هالدهون و كان ودي اتغير بس مافي ارادة و لا دافع , كنت اعرف ان في بنت وايد حلوة بداخلي و جمال طبيعي سرقها الدهن و الشحم و ذبحها في داخله .
و مرت سنتين و انا بالاعدادي او المتوسطة , حتى وصلت ثالث اعدادي , وقتها كانوا يوزنونا بداية السنة حق حصة البدنية , و اللي صدمني ان وزني 95 و بلا فخر ! و ماكنت بهذاك الطول 157 يعني مستحيل طولي بيغطي على وزني .
و مثل ما يقولون كانت هذي اول طقة على الراس , خفت اني ادخل ال100 و انا توني 15 سنة ما صرت , و كان اول دافع لي اني ابدى رجيم واتخلص من كل هالوزن و بديت , و تميت شهرين و شي ضعفت فيهم 12 كيلو و صرت 83 و ضعفت الارادة لما ضعفت و رجعت اكل و اكل و اكل و مو هامني شي .
بديت الثانوية و لما وزنت اكتشفت ان وزني 91 , رجعت من بعدها البيت اصيح و شبه منهارة على كل اللي ضاع , كل الايام اللي تعبت فيها و وقاومت , و عرفت صج ان احنا ما نتعب و احنا نزيد بوزنا بس نتعب وايد لما نبي ننزلـه , رجعت اسوي رجيم بس ماكنت بذاك الاصرار و لا كانت محاولة جدية وصلت لي 88 و وقفت .
واللي كان يمنعني وايد مرات اني امرض و يصيدني ارتفاع في كريات الدم البيضا او التهاب بالعظم فالهى ويا المرض , و ارجع ناسية الرجيم .
تم وزني ثابت بين 88 و 86 .
طبعا انا مو طويلة مثل ما قلت قبل بس جسمي من تحت الفخوذ و الارداف و ريولي مو بذيج المتن يعني مافيني تكتل وايد , المشكلة اني عريضة فوق .
بهالسنة ابتدت رفيجتي رجيم و تخفيف و ضعفت , و انا كنت ابدى جم يوم و ترجع حليمة لعادتها القديمة , بس في كل يوم كنت اتذكر اني بنت ابي البس ابي استانس بجسمي ابي احس اني صج بنـت ( أنثى ) .
اهلي كانوا يشجعوني الحمدلله , امي ما تقصر الله يطول بعمرها طباخة و كانت تساعدني و تسوي لي طبخات للرجيم بس مرات تتملل , خواتي كانوا تقريبا نفس معاناتي بس و لا وحدة منهم فكرت تجرب , الشي اللي كان يعور قلبي ان لما اسوي رجيم و ارجع اكل , كانوا وايد يحبطوني و يلوموني , و هالشي يخليني بس اسكر اذني و ارجع و اكل اكثر .
المشكلة ان هم ما كانوا يفهمون الجزء النفسي في الرجيم ! او اني اكون بهالوزن في هالسن .
و لا كانوا يفهمون شلون انا اشوف البنات معاي بالمدرسة شلون ياكلون اكل داينصورات و لا يمتنون , و لا اني مو قادرة البس مثل البنات , و لا اطلع , و لا ابين جمالي و اني عايشة في بيت كله اكل 5 نجوم .
رجيمي اللي سويته و نزلت عليه 12 كيلو ما كان فيه شي معين و لا اكلات معينة
كل اللي كان فيه شي ممنوع و شي مسموح .
مثلا :
انا ما احب اتريق من زمان بس مرات اكل او اودي معاي المدرسة
كنت اخذ توست اسمر مع جبن قليل الدسم سلايس او جبنة بيضة قليلة الدسم
بيضة مسلوقة - كورن فلكس و كنت اخذ special k - جزر - خيار - بيض
روب - لبن - خبز اسمر
الغداء :
دجاجة مشوية - ستيك لحم - ستيك دجاج - خضرة مسلوقة
جبنة حلوم قليلة الدسم مشوية - سلطة خضرة - سلطة معكرونة
تونة - شوربة - برقر مشوي - سجق مشوي - عيش مسلوق بماي و بس - سمج
العشاء كان خفايف مثل الريوق :
توست او فواكه او بيض


الشي الصعب اللي واجهته اني ما احب الحليب و لا منتجاته , يعني ما اشرب حليب مستحيل !
بس كنت صج مصرة و كنت اتغصب عليه و صج كنت متمسكة عدل و لا اخربط


جوكلت - حلاوة - كيك - فاست فود - جبس - مقليات - معجنات - سمبوسة - عيش - اي شي مقلي -البهارات كانت قليلة وايد في اكلي لانها فاتح للشهية حتى الملح - البيتزا - البيبسي


حتى عصير ما كنت اشرب لان اخاف من الشكر :)

كانت كلها ممنـوعة و ما اقرب منها , حتى بس اخر الايام بديت اقلي البيض بزيت زيتون كنوع من التغيير , ارادتي كانت قوية و كل من مستغرب منها و تحسفت وايد اني خربت كل اللي بنيته بلحظة ضعف .

مرات كنت اخذ لي جوكلت من الصيدلية او جبس من قسم الحمية بالسوبر ماركت بس هالشي يصير مرة بالشهر يمكن .
ماكنت وايد محافظة على الرياضة يوميا كوني ادرس و الدراسة تاخذ وقت . مرات كنت اروح جم او امشي .


المـهم اني تقريبا قبل اسبوع رجعت اسوي رجيم و هالمرة ارادتي ان شاء الله و باذن الله كبيـرة و اول ما بديت سويت رجيم محمد طاحون اللي ينزل 8 ب 10 ايام . بس طبعا تعبت و حسيت اني مستحيل اكمل مع انه نزلني .
اول ما بديت هالمرة كان وزني 88 و استمريت على هالرجيم 4 ايام و قطعته و رجعت حق فكرة الممنوع و المسموح و نزل وزني الحمدلله لي 83:eh_s(9): و باجر رايحة اوزن .
و الشي الحلو اني انزل بسهولة و ما اقول بسـرعة لان في فرق , اقصد اني من الاجسام اللي لها قابلية ان تضعف و تستجيب للرجيمات .
اللي مشجعني استمر اني وصلت للنقطة اللي وقفت عندها اخر رجيم و ان شاء الله راح اكمل و راح اوصل ل60 و ال50 ما في شي مستحيل لو تنوجد الارادة و التشجيع و انا عارفة
و اتمنى انكم تشجعوني لين اييكم بيوم و اقولكم اني وصلت للوزن المثالي . و الوزن اللي احلم فيه


انشاء الله ما اكون طولت عليكم بس حبيت اشارككم تجربتي اللي للحين ماخلصت و اعرف ان في بنات وايد بسني يعانون و الكل قال لي و انا بعد راح اقول لكم لاننا صغار وبعدنا نقدر نضعف اكثر و اسهل . لا ناخذ هالتعب و يانا و نزيده لين نكبر , نقدر نتخلص من هالوزن اللحين بالارادة و الامل و طولة البال , بالتشجيع , و نعيش مثل البنات نلبس و نستانس و نبعد اي مرض .:ggdw:

و اذا في اي سؤال تفضلـوا . و هم اذا في شي يساعدني و يقويني اتمنى ما تبخلون علي .


في حفظ الله :eh_s(8):