ان عاد ولهامسون سيعود الابداع (عصفور في اليد خير من عشره على الشجره)

ان صحت اخبار الصحف اليوم وعاد ولهامسون للهلال فهذا خبر سعيد ومفرح لنا جميعا والله الاعب هذا ممكن يكون من افضل ثلاثه لعيبه اجانب طوال تاريخ الهلال ماشاء الله عليه غير مستواه الكبير وغربلته للمدافعين يملك ولهامسون قلب عاشق للهلال يمكن اكثر من الكثير من ابناء النادي اللي قاعدين يساومون النادي وعقدوا الاداره والجماهير وافضل من بعض اللعيبه اللي يلعبون ببرود يرفعون الضغط وما اظن احد ينسى دموع هذا السويدي بعد ما قلبنا النتيجه على الغرافه في قطر مع انه ماسجل لكن حبه للهلال شيء فوق الوصف لاانساه في لحظة احتراق اعصابنا خلف الشاشات نزلت دموع ولي حبا للون الازرق ولجماهيره دمعات صادقه مخلصه زادت من رصيد حب الجمهور له.

اما مستوى ولهامسون فما اعتقد ان فيه خلاف عليه حتى نجوم جوفنتوس جننهم في مباراة اعتزال الدعيع بانطلاقاته وتسحيباته

اعتقد ما فيه ولا لاعب في الدوري السعودي ممكن يوقف السويدي اذا كان الفريق ككل في وضع هجومي ولياقي عالي .
ولاتنسون ان عودة ياسر القحطاني للفريق رح ترفع من مستوى ولهامسون نظر للتفاهم الكبير بينهم من اكثر من موسم .

وبالنسبه للي مايرغبون في عودته نذكرهم بالمثل اللي يقول ((عصفور في اليد خير من عشره على الشجره))يعني ممكن نجيب لاعب عالمي ومايتأقلم مع الفريق لأي سبب واقلها اجواء المملكه الحاره او العادات والتقاليد الاجتماعيه اللي اجبرت الكثير من اللعيبه على عدم المجيء وحتى لو حضروا فتره بسيطه ويغادرون بحجة عدم رغبة زوجاتهم مع كامل اعتزازنا بديننا وعاداتنا الاجتماعيه فلا يمكن نتخلى عنها من اجل كرة قدم.

اخيرا انا متأكد ان كل خصوم الهلال وبالذات الجماهير ماراح يسعدهم خبر عودة نجمنا الكبير بل انهم فرحوا برحيله لان ولهامسون لحاله قصه معاناه خاصه عندهم ولو كان يستطيعون على مرتباته الشهريه لتعاقدوا معه ولكن قطارة الاتصالات السعوديه ماتساعدهم.