أنا فاشله ؟؟

سلام عليكم ..

أنا متخرجه من ثنويه بمعدل لا يزيد عن 2.5 إلي اهو (70) بالميه ..
والحين قاعده أدرس دبلوم وأشوف اللي حوالي داشين الجامعه واللي مسافرين يدرسون بره وأنا اتحسر على حالي معنه كانت درجاتي عاليه قبل بس مريت بظروف الله أعلم فيها وانعكس هالشي على دراستي بالثنويه وبسببها طلعت بنتيجه فاشله وتوطي الرأس ..
قبل كنت أحلم أني أكون شي مميز بالمستقبل ولي الحين عندي هالأمل والطموح بس التحطيم اللي قاعده الاقيه بكليتنا ومن أساتذتنا شي مو طبيعي .. لدرجه دكتورنا بالصيفي قاعد يشرح وقال لنا هالصفحه محذوفه لأن كلام أكبر منكم !! شقصده كلام أكبر منكم ؟؟ يعني أنتوا أغبياء .. وكذا مره يكرر ويقول كلام ويتطنز والبنات يضحكون وأنا انقهر من داخلي
وغير أمي تقول مكانكم حق الفاشلين !!!

بنات والله فيني بجيه مادري شسوي قاعده أحاول أوقف على ريلي بس مو قادره والله لمن أيبون طاري وحده تدرس طب أو هندسه يحز بخاااااااااااطري حيل لأني أتمنى أصير مثلهم
وكلام الأهالي إنه معدل الثانويه يحدد مستقبل الانسان ومن هالسوالف أحسن أن القطار طافني :( قاعده اقنع نفسي بس البيئه اللي حوالي ما ترحم أنا أحب العلم والله أعشق العلم بس ماكان لي فرصه إلا دبلوم ..

ووحده قالتها بويهي إنتي فاشله !! أنا صج صج انجرحت من هالكلمه وحز بخااااطري حيل

هذا غير (إبوي) :) اللي يبي يعرف شنو ومنو إبوي خل يراجع مواضيعي اللي كتبتها ...

أشكره وبدون رحمه يقولي إنتي لمن تخررجين شغلج راح يكون شغل هنود !!!

جد نفسيتي تحطمت وانقهرت وإيد