شح العطا
يامضميه شح العطا منـك وشلـون
اصبر وانا اللي منك بالحيل ضامي!!
جفت عروقي والضما يبس الكـون
مااسقا هشيمه سيل وبل الغمامـي
وشلون يحيا العرق لاشحت امزون..
..غيمك!!وصيفك جاير الوقت حامي
ياونتي ونة من امسى بـه اطعـون
في حيد حزمٍ قد غشـاه العسامـي
من دون حد الرجم والرجم مسكون
تعـوي ذيابـه لاادلهـم الظلامـي
ان صاح ماعنه المخاليـق يـدرون
وان قام طاح ولاحصل لـه مقامـي
من حظي اللي فيك من دون في دون
معثور صاير له من الوقت عامـي
ياما من اسبابك تجرعـت مغبـون
كاس المرار وقلـت ياعيـن نامـي
باكر تهون!!وبس عيت لي تهـون!
يقطعـك ياحـظٍ عليـه المـلامـي
ياحظ انا في ذمتك وانـت مديـون
سدد ديوني قبـل شهـر الصيامـي
يكفي عذاب وجاير الوقـت ملعـون
وانا اللذي ماعشت وقت السلامـي
وان حل عيد الفطر والعمر مرهـون
ولاهـل مزنـك سقـوةٍ للغرامـي
برحل ولالي في دهر جورك اضنون
وارجوك لملم مابقى مـن حطامـي
دام العطاء من شح بالشح مضمون
ماللرجاء من وصل شحـك مرامـي
بيحت لك من خافق الشوق مكنـون
وش عاد باقي مااتضح من كلامـي
لشاعر/ عبدالله العتيبي
