منوعات & عام اخر روقان.....أ كيد كل واحد فيكم مر بقصة حب ايام طفولته!!!!

أ كيد كل واحد فيكم مر بقصة حب ايام طفولته
قصة حب مو على طريقة غرام البالغين , مجرد احاسيس بريئة وتصرفات تلقائية
مايفهم الطفل معناها .. فأتصوٌر عند كل شخص قصة وحكاية نتمنى نسمعها منكم

راح ابدأ بقصتي علشان اقص لكم شريط الافتتاح

تقريبا في عمر تسع سنوات الي حبيتهم من البنات اتوقع يجون عدد سكان قارة افريقيا
الي تعجبني أول شيء اسويه اشتريلها اي شيء من البقالة حلاو ولا مصاص ولا ببسي
وتعرفون الاطفال مايعرفون شيء اسمه شكرا تاخذها وتجلس تبلع ولا يجي على بالها
وانا طبعا مدري وش الدافع ولا فاهم شيء مجرد رغبه مني في التقرٌب منها
سواءاً طنشت ولا رفضت تأخذ الشيء الي شاريه لها ماتفرق معاي ولا احس بأي نوع من الاحباط
والتحطم , حتى أحيان اذا جات افلام الكرتون في التلفزون اسحب عليها السيفون واروح اتفرج وانساها وانسى ابوها الي خلفها

المهم كان عندنا في الحارة وحده اعجبتني مدري وش حببني فيها
فيها وصاخة الدنيا كلها , دايم اشوفها العصرية جالسه قدام بيتهم
شعرها مشهٌب من الشمس وتمشي حافية في الشارع ورجولها مسوده من الزفلت
واذا عطست رفعت فستانها وجلست تمسح فيه خشمها نص فستانها متصفط من وصاخات خشمها

وبعدين مجنونه الظاهر معاها اعصاب او مس او قلة صحه
ماتشوف سيارة في الشارع تمر مع الحارة الا ويصيبها حالة هستريا
تروح تجمع في الحصى وتحذف السيارات واحيان حتى الي ماشين في الشارع
تجلس تصارخ بكل راسها في وجهه .. والله الى يومكم مدري وش الي طيرني فيها

حبيت ألفت انتباههاا كان معجبني فيها قوتها وهيبتها في الحارة .. حتى الخوف كنت اخاف منها
واخوكم في الله يبغى يسوي فيها رامبوا
حصلت ورع صغير يمكن عمره 5 سنوات يلعب قدام بيتهم .. كان بيته مقابل لنا
وروح له واطيح فيه ضرب , ركب على مخمسات لين صار صياحه يسمعونه الي في الحاره كلهم

كانت وقتها جالسة قدام بيتها وتشاهد المنظر قلت في خاطري اللحين
بتقول مشاء الله عليه ياقوه قوااه وتجي تسألني وش اسمك وليش ضرت الولد ومن هالكلام

جلست انتظر وانتظر والله والبنت ماجاء على بالها
مشغوله تطارد في السيارات .. انتظرتها لين خلصت غارتها على السيارات ورجعت وجلست مكانها
مريت من جنبها .. وبرضو مافيه اي ردة فعل
كررت المحاولة ومريت من جنبها مره ثانية .. إلتفت يمي وقالت "وش تبي ياحيوان ياكلب"
انخرش قلبي خفت منها .. وعاد هي لسانها زباله مره , تقول كلام وصخ ماينقال

مرٌت ايام بدون نتيجة كنت احيان اشتري لها ببسي وحلاوات
يوم كنت صغير كانت المائة والميتين ريال في جيبي امي الله يحفظها مدلعتني
فكانت احيان تاخذها وتجلس تبلع فيها بدون اي نتيجة ..
وهذا الشيء مايشفع لك عندها .. مالها صاحب تقلب عليك في اي لحظه وتحذفك بالببسي
الي شاريه لها ولا عندها مشكلة

في يوم من الايام كان الاستاذ في المدرسة مبسوط من حلي للواجب
وكان حاط لي يمكن خمس نجمات على الدفتر وقتها انتفخ راسي ماخليت احد ماوريته
الدفتر , حتى جدتي الي ماهي فاهمه وش السالفة كنت اقولها ياجدة الاستاد حطي لي خمس نجمات
وتقولي مشاء الله تبارك ياولدي وتلتفت يم امي وتقولها يعني بعطونه راتب !! ههه

المهم جاء في بالي اني بوري النجمات حبيبت القلب هذي المعفنه
طلعت دفتري من الشنطه وطلعت الشارع ومريت جنبها وقلت شوفي النجمات الي حطها الاستاد
عطيتها الدفتر وكنت داق الابتسامه .. احسبها بتمدح مثل الاستاد ومثل مدح امي وبوي وجدتي

مادريت إلا وهي حاذفه الدفتر وتقول انقلع ياحيوان وقامت على رجولها تدور حصى بتحذفني
يلعن شكلها المعفنه , انا عاد ماخليتها هذي المره تشجعت وعلى طول مسكتها بشعرها
وجلست ابرم فيها مثل الصحن الدوار

وهي ماتسمع غير صياحها جلست تبكي وتسب وتلعن وطلعت امها وفكيتها وهربت
وجات امها عندنا في البيت تشتكي بعدها امي قفلت علي ماعاد تخليني اطلع العصرية
وهي برضو صرت ماعاد اشوفها كثير وكرهتها من ذاك اليوم وصرت ماعاد اعبرها

وسلامتكم .. الدور عليكم

عزيزي المشرف اذا حسيت بإي نوع من انواع المصاله لاتتردد في إراحة ضميرك