واقع عشته وتجربة فقد شخصين خلال عشرة ايام
بسم الله الرحمن الرحيم
الله يشافي كل مرضى المسلمين في كل مكان يا رب ويرحم موتانا قولو آمين
اما بعد من خلال واقع عشته يوميا ومعاناة خالتي الله يرحمها خالتي كانت مره محبوبه عند الكل وما تحقد على اي انسان وما في غير ذكر الله ورسوله على لسانها سواء في الفرح او الحزن ماشاءالله عليها قصتها مع هالمرض كانت في قعده نسوان اظن في خلف واكلت حلوى وقالت لها وحده من معرفها مره كبيره لا تاكلين ترى يطالعونج يعني يركزون على الاكل اللي بتاكلينه لكنها ما اهتمت انه في شي اسمه عين والعين حق والحسد مذكور في القرآن الكريم
بدأت القصه عندما كانت في سفره مع خالتي الثانيه لايران ومن زود كذب الايرانين بانه اطبائنا امهر من اطبائكم في الاسنان لعبو في اسنان خالتي بس كانت بتحشيهم لا غير والله انها ما حصلت غير الالم والبوق مع انه خالتي الثانيه سووت اسنانها بس الحمدالله جات سليمه قبل سنتين لما تم تشخيص مرضها بسرطان اللثه او الفم اللثه كان لونها يصير اسود بالتدريج مع العلم بان خالتي غير مدخنه يعني لا شيشه ولا تدخين وكانت من قبل دايما تشتكي من اسنانها وراحت لدكتور في عياده خاصه واخذ منها عينه والنتيجه كانت سليمه ما فيها ورم
لكن الصدمه لما تم تشخيصها وقالو لها انها تحتاج عمليه تستغرق 12 ساعه الله يعلم بحالنا يومها استاصلو جزء من لسانها وستة اسنان من الفك السفلي وتمت في الانعاش لمدة اربع اشهر والله انا اهلي ما كانو يخلوني ازورها يقولون لي ما راح تتحملين لا انا ولا امي لمن طلعوها اول يوم رحت لها وقعدت عندها مده كانت نايمه وصحت من النوم والله اني كنت ماسكه نفسي لا اصيح جدامها من المنظر لانه رقبتها كانت شبه محروقه من العمليه بس طلعت والله صحت يمكن ساعتين مسحت دموعي لا تجوفهم جدتي وتتضايق لكن كان يبين على وجهي بس امي سالتني واعترفت لها اني زرت خالتي وقالو لي ليش رحتي وخافو على خالتي وبعد ما كملت ال4 اشهر تمت في المستشفى كم شهر لكن الحمدالله تحسنت حالتها بس بالاشعاع كانت تتعب ومن زود مده التنويم في المستشفى خالتي صارت ما تقدر تتحرك ولا تمشي والاكل ما كانت تقدر تاكل او تشرب شي صرت اشتري لها ابره الدواء للاطفال ونخلي فيها الماي وبالملعقه والاكل يكون الاكل البارد المهلبيه وبالتدريج الحمدالله تحسنت خالتي بفضل من الله والعلاج الطبيعي على حسابنا في المنزل ونفسيتها ارتاحت واحنا بعد ارتحنا صح الاكل كان كانه اكل للاطفال بس بعد الحمدالله احسن بوايد من بعد العمليه يعني نسوي العيش لين شوي اللي اهو الرز وساعات حتى من اكلنا العادي اذا كان شوي طري واشتهت تاكله اكلته.
لكن قبل كم شهر حست بالم وحرقان في الفم وبعد محاولات مني ون امي لا تكررين التجربه ما ادري والله من قنعها مره ثانيه للعلاج في ايران للفحص ويا ريتها ما راحت خساره فلوس وبوق وشنو اللي سوو لها خذو منها عينه الدكتور الزفت اخذ منها عينه بدون بنج ااخ يا قلبي عليج يا خالتي وبس رد لها الالتهاب والورم اشد من قبل وكانت تشتكي لنا تقول يا ليتني سمعت كلامكم ورجعت مسكينه ما تقدر تاكل شي الا بالغضب وتتالم وحتى الماي يحرقها تقول كانه نار في حلجي والدكتور الزفت عطاها علاج بالكيماوي بس ما تعالجت هناك رجعت هني وكان الدكتور مخوفها بانها لازم تاخذ الكيماوي وكاتب في وصفته بانها لازم تاخذ جرعات كيماوي ويا ريتها ما اخذتها اول جرعه ما كان يبين الاثر عليها بس دوخه والنفسيه كانت تتدمر تدريجي عندها مع انها لمن تشافت بعد الاشعاع نفسيتها كانت احلى والحمدلله والشكر على كل حال لكن مع الكيماوي كانت تتعب والنفسيه احس كانت تزيد في مرضها وصارت ما تقدر تاكل شي يعني كورن فلكس مقدار استكانه بس وبعدها بالتدريج ربع استكانه مع شاي حليب وكانت تشخله يعني تصفيه بس الحليب ياخذ طعم الكورن فلكس وكنت اجوفها تصيح (تبكي) بدون ما احد يحس ما تخلي احد يجوفها لما تتسبح او تكون بروحها عشان لا تضايق احد يا ربي الله يرحمك يا خالتي عشان امي وجدتي بالذات كانت تخاف عليهم لا ينهارون لمن كانت تبكي كنت اسوي روحي ما سمعت وادش حجرتي اصيح بدون لا احد يدري وهمن عشان خالتي لا تتضايق وترتفع معنوياته
ومع الكيماوي كانت تسوء حالتها وما تقدر تاكل تتعب وتعصب لكن ما تقول غير الحمدالله ومره في الليل حسيت تنفسها غير طبيعي وخفت وثاني يوم في الليل نفس الوضع صار شوي انتفاخ في جهه واحده يبين قليل وحسيت انها تنتفس بصعوبه وكانت الله يعزكم تعاني من البلغم لاحظت جارتنا وقالت لي وحتى الخدامه كنت خايفه وايد ليلتها صار الصبح وجاء خالي وداها المستشفى للدكتور المعالج ورقدوها عشان يتابعون حالتها وخلو لها السيلان المغذي وحق يسحبون البلغم من صدرها وكانت الحمدالله احسن من البيت لكن بعد مو بوايد.
امي كانت تزورها كل يوم وخالاتي بعد لكني زرتها مره وحده يومين قبل لا تتوفي رحتلها العصر كانت نايمه ما قعدتها جات خالتي الثانيه كلمتني شوي سمعت صوتنا صحت من النوم سلمت عليها وقعدت معاها شوي كانت اخر قعده معاها قلت لخالتي ترى مرت ابوي مرقده تعبانه وكان فيها نفس المرض بس في الثدي الله يشفي كل مرضى المسلمين اللهم امين يا رب تعالجت في البدايه في البحرين لكن راحت فرنسا عشان انه علاجهم احسن وراحت بريلها تمشي رجعت مسكينه بعكاز وما عرفو علاجها في فرنسا وصاورو يتاخرون في علاجها وردت هني تتعالج مره جابو لها الاسعاف في الليل وردت البيت وبعدها قال الدكتور لازم كيماوي وكانو بيخلون لها انبوب في وركها بس ما خلو خلو في رقبتها وما ادري ليش المهم لمن قلت لخالتي انها مرقده مرت ابوي قالت خالتي روحو لها مسكينه غريبه بتفرح بزيارتكم ورحنا لكن العنوان كان غلط وقعدنا نفتر في كذا جناح بس ما الله كاتب وكنت برد لخالتي المريضه الا تسوي لي خالتي لا بس رجعي البيت ولدج صغير بروحه وامج تعبانه وانا رديت وكانت خالتي خاطرها تجوف ولدي وانا ما كنت اعرف انه يخلونه وكل يوم تسال عنه كأنها حاسه وانا يوم اللي زرتها سالت موظفة الامن عنن التصريح وقالت لي بس خالتي قالت لي لا تييبنه باجر انتظري بعد اسبوع اسبوعين لمن تتحسن شوي ييبيه يا ريتني وديته .
وكان عشان باجر بيسوون لها عمليه بيدخلون انبوب في معدتها وباجر ما حصلو مكان يسوون لها العمليه اللي يقطع القلب انها تقول انا جوعانه ما اقدر اكل شي خل يدخلون لي الانبوب في المعده تتغذى سوائل بس ويوم بعد ما زرتها خالتي زارتها بس ما كانت تدري بانه اخر يوم لها خالتي المريضه مره تقول انها حرانه ومره بردانه فتطلب من خالتي تنزل تطلب منهم ايقاف التكييف او ارجاع التكييف وطلعت خالتي من المستشفى تصيح راحت امي وجارتنا وقعدو معاها الى 9 ونص في الليل او اكثر بشوي والحمدالله اكلوها ورجعت امي وجارتنا مستانسين بانه قنعوها اكلوها محلبيه وشوية جاي حليب وما اعرف شنو بعد ماي لمن ردو قالت امي لجارتنا الحمدالله قنعتيها بانها تاكل كل يوم تعالي معانا حق تاكل تخيلو يا ناس كانت اخر وجبه كانت صحوة الموت .
صار الصبح اتصلو لخالتي وقالو لها بان اختج تعبانه وايد وتعالي وكانو يبون رقم خالي ما حصلوه وبس دش خالي بيتنا ما سمعت الا صراخ امي عبالي في شي مع الخدامه لكن طلعت الا امي تقول لي خالتج خلاص قسما بالله ما استوعبت الشي عبالي حلمانه كانت الساعه 9 الصبح ودخل خالي قال الخبر المفجع ولبسنا انا وامي رحنا المستشفى مع خالي ما استوعبت بصراحه انا اول مره اجوف احد ميت لكنها من ايمانها الوجه كان منور نور الايمان وتتذكرون الورم اللي قلت لكم عنه في وجهها ما في كانت محلوه بس لازم الشي يصدمنا يعني حزن وبكاء اخر وداع يا قلبي انا بالذات كنت وايد متعلقه فيها وكانت تحبني انا جفتها اغمى علي من الصدمه خالاتي يشيلوني الله يشفي الكل ويصبر اللي عندهم ناس اعزاء فاقدينهم الله يرحمنا برحمته وبعدها صارت اجراءات ومراسم الدفن .
وبعد عشرة ايام توفت مرت ابوي كانت موصيه انه اذا صار لي شي عمي اهو اللي يتكفل بتربيه عيالي وبس ما طولت ووصت بعد انها تندفن هني مو عند اهلها عشان لمن يكبرون عيالها يزورون قبرهازارتها عمتي وقرأت سوره الحمد سبعين مره عليها كانت تفتح عيونها شوي تدمع عمتي تمسح عيونها بكلينكس ترد تغمض ثاني يوم كان عند اخوي اليوم المفتوح راح اذهو ومرت عمي المدرسه وبس طلعو راحو المستشفى لها كانت مرت عمي تقرا سوره يّس توقف الجهاز واصدر صوت راحت تناديهم لمن جاوو الاطباء قالو خلاص توفت بس مرت ابوي ما طولت تقريبا 8 اشهر بس لكن النفسيه عندها صفر حتى ما كاانت تدري اني اعرف بمرضها ولا ترد على مكالماتي وانا اعذرها ما الومها واحين خلت بنت صغيره في الروضه وولد في صف الاول يسالون عن امهم يا حرام يقولون لهم امكم مسافره والله انه يتقطع القلب عليهم
هذي تجربتي خلال عشره ايام والنفسيه تاثر في التعافي من المرض عافانا الله واياكم منه والله يشفى المصابين بكل الامراض الله يصبرنا ويرحمهم برحمته
رحم الله من اهدى سورة الفاتحه لكل اموات المسلمين
سامحوني اذا في شي غلط اتمنى تستفيدون من تجربتي ونستفيد من تجاربكم
