تقريري لسفرة عائلية لدبي .. 5 ايام ...

السلام عليكم ورحمة الله وبركاته


مع سوالف السفر وتقارير السفر اللي تشوق تذكرت كنت مسوية تقرير ومجمعه معلومات حق سفرتي لدبي السنة اللي طافت .. طبعا هاذي مو اول مرة اروح لهاا رحت لها كذا مرة بس هالمرة كانت ع السريع لان عيالي قامو يبجون لان البيت كله سافر الا احنا مع اني كنت وقتها حامل بالسابع فمالقيت الا دبي .. خفت اروح مكان ثاني يطوفني شي وانا حامل ههههههه ..

السفر هاذي كانت السنة اللي طافت 2011 شهر7 قبل رمضان باسبوعين .. واعذروني التقرير بدون صور ...

حجزنا على طيران الجزيرة .. حده موشي .. بس مالقينا غيره ارخص لان ماكان عندنا ميزانية كافيه ..

كلفت علينا التذاكر 504 .. انا وزوجي وعيالي 4 .. الحجز كان من النت ..

حجزنا فندق من سفريات الاسطورة اللي بالبحر سنتر .. الليله 49 .. طلعت علينا 4 ليالي 196 ..

اخذنا شقة صغيرة عبارة عن غرفة نوم وصالة ومطبخ تحضري وحمامين .. مع الريوق ..

فندقنا اهو سيتي سيزون .. حده عجيييييييب ... ثاني مرة اسكن فيه ..

اجرنا سيارة من المطار بالضبط ماني عارفة اسم المكتب بس المطار متروس مكاتب تاجير سيارات .. اخذنا كامري 2011 طلعت علينا 215 دينار مدة 5 ايام ..

اليوم الاول ...

وصلنا الساعه 9ونص دبي .. ووصلنا الفندق الساعه 12 الظهر ...

اول ماوصلنا كنا تعبانين لانا كنا متعودين على السهر وطيارتنا خذيناها مبجر شوي كانت الساعه 7ونص الصبح ..

نمنا وقعدنا على الساعه 5 .. اول ما قعدنا كنا يوعانين حيييل لان اخر وجبة كانت بمطار الكويت .. اما وجبة الطيارة الحمد لله على النعمة ماعجبتنا كلش .. الصمون كان باااااارد ..

طلبنا غدا من مطعم اسمه بيت المندي ... مطعم كله عيوش مالقينا غيره .. اكله ماشي حاله ...
رقم تلفونهم .. 042629239 - 042629139

طلعنا على الساعه 7 ونص ورحنا الامارات مول وتمشينا فيه
وتعشينا بمطعم الحلاب ... وااااااااي بنات يهبل حده اكله عجييييييييييب .. واشكثر ناس مادحته بالنت ... رجعنا ع الساعه 12 الفندق ونمنا ...

اليوم الثاتي ...

رحنا حق برجمان عشان نحجز حق الباص البرمائي اللي الكل قام يمدح فيه ويقول من الزحمه احجزو امبجر ..
رحنا نحجز عشان ناخذه العصر لقيناه فاضي وحجزنا وركبنا بنفس الوقت ..

التذاكر طلعت علينا 595 درهم .. وااايد على الباص .. رحنا كانت القايله وكلش كلش مو شي الباااص .. حتى عيالي ملو منه .. لانهم كانو مجربين الباص البرمائي اللي باستراليا فحسبالهم مثله ههههههه ...

صراحه مايسوااا .. اللي معانا بالباص كان يشرح لنا حده مليق ..

فكرة الباص تفتر فيج بشوارع دبي وبعدين يدش البحر ..

رجعنا الفندق دايخيين وعيالي نامو اصلا بالباص من الملل ههههه ...

قيلنا شوي وعقبها طلعنا حق فيستفال بس للاسف ...

:eh_s(16):

اول ما سفطنا ونزلنا رحنا نمشي لباب المجمع مسكت ولدي عن السيارات خفت تدعمه وطحت وقامت ريولي تعورني :eh_s(11):

ماقدرت امشي كلش ركبنا سيارتنا ورحنا اندور على مستشفى ...

رحت لمستشفى اسمه الراشد مستشفى حكومي .. مستواه افضل من مستوى المستشفيات الخاصة اللي بالكويت ..

التشخيص طلع فيني تمزق بالاربطع وممنوعه من المشي لمدة يومين :eh_s(11)::eh_s(11):

بس عشان عيالي ماحبيت اخرب عليهم السفرة قمت امشي بس ع الخفيف ..


اليوم الثالث ..

من الصبح رحنا حق مدينة مدهش ..

تذاكر الدخول 60 درهم

لعبت عيالي تقريبا باكثر من 600 درهم ...

وقتها كان مهرجانهم عن التراث واكلت لقيمات بدبس التمر وفي شغلات عن التراث مثل الخوص والحنا وغيرهاا .. التراث عندهم مقارب لتراثنا ...

لما خلصنا من المدهش قلت لازم اروح لفيستفال اتمشي فيه ابرد حرة الطيحه اللي بجبدي ...

مجمع عادي مثل اي مجمع ...


اليوم الرابع ..

رحنا حق دبي مول .. دخلت عيالي في كيدزينا ودخلت انا وابوهم معاهم

الصغار بـ 125 والكبار بـ 95
الاجمالي كله 680 درهم

كيدزينا عبارة عن مكان مخصص للاطفال يشتغلون مثل الكبار وياخذون على الشغل رواتب وكل ماجمعو اكثر اقدرو يشترون من السوق اكثر ..

حلوة لليهال بس متعبة للاهل .. زحمة وحر .. اذا كانو عيالكم شوي كبار تقدرون اتخلونهم بروحهم وتطعون تتمشون واذا خلصو يدقون عليكم .. انا بناتي يخافون بروحهم وانا ما اقدر امشي وايد قعدت معاهم .. بس حييل تعبت لاني وقتها كنت حامل ...

طلعنا عقبها من كيدزينا وتغدينا بمطعم للهمبرجر عندهم صراحه نسيت اسمه ...

عقبها رحت لمجمع المنال .. المجمع الوحيد اللي تسوقت فيه ..فيه محل ارابيكس والطاهر والخلوج ..


اليوم الخامس والاخير ..

طرشو لنا مسج الجزيرة وبلغونا ان رحلتنا راح تتاخر كان موعدها 4 العصر بس تاخير لي الساعه 10 بليل ...

طلعنا ورحنا لدبي مول مرة ثانية لان اول مرة راحت كله بكدزينيا ..

رحنا الاكواريوم 6 اشخاص بـ 300 درهم .. نصيحه بنااااات مايسواااا اللي داخل مثل اللي برا ..

ورحت محل كاندي مال الحلويات شرينا حلويات ونفيش وشريت نافورة الككاو منهم سعرها تقريبا 290 درهم .. ولي الحين ما جربتها ههههههه


رحنا المطار الساعه 8 بس انصدمنا ان طيارتنا عليها تاخير لي الساعه 2 بليل ههههههه

ماطرنا الا الساعه 3 ونص ...

والحمد لله وصلنا بالسلامة ... بس ضريبة سفرتي هالمرة خلتني اولد عمليه هههههه واول التاسع ...

والحمد لله على كل حال ...:yaaaaaarb: