قلت لك آسف وعني مارضيت ...**

قلت لك آسف وعنـي مارضيـت

ويش اسويلك لجل ترضى علـي

كنت اجس النبض والله ماخطيت
في دعابـه وانـت ودك تزعلـي

يامقفـي شكلـك لغيـري لقيـت
وجات لك فرصه سببها ترحلـي

يامعنينـي ليـا منـك نـويـت
بالرحيل اللـي صـداه يزلزلـي

ارفق بحالي ترى منـك اكتويـت
ونار هجرك وسط قلبي تصطلـي

ماشكيـت الا لربـي ماشكـيـت
( والله الوالي ولا غيره ولـي )

وماهقيت الصـد منـك ماهقيـت
ارجـع وتذكـر كـلام قلتـلـي

يومك اتـردد لبـو تمـام بيـت
( مالحب الا للحبيـب الاولـي )

وين عهدك بالوفـا لا ماوفيـت
وللمواثيـق القديمـه تجهـلـي

ضاعت عهود الوفا ياللي جنيـت
والوفـا لهـل الوفـا ويجملـي

كنت اظنك مخلص لـي مادريـت
انـك المقفـي وغـدرك مقبلـي

كيف تنساني وانا اللي مانسيـت
والله انـي فـي هواكـم مبتلـي

الخفـوق يفـز لامنـك طريـت
وافطنوا فيني ربوعي مـع هلـي

بعدكـم مابـه ولا يـوم سليـت
وجمرتك وسط الحشا تغلي غلـي

ليت تدري وش حصل بعدك ياليت
كان ماتهجر ابـن عامـر علـي