عليك في سبكيم والا الأنعام

الخير كله في مقابيل الايام = لاتزعلون وخلو الوضع عادي
الاقتصاد العام والنفط والخام = الحمد لله والشكر بأزديادي
واعطيك نبذه بالحقايق والارقام = ان كان تبغى نشرة الاقتصادي
قدام ياسوق المطانيخ قدام = مالك ومال مجمعين الدوادي
اكبر سلاح تشنه بروس الاقلام = ناس ٍ تبث الكذب مع كل وادي
مادام للدوله حصانه بالأسلام = والسنه السمحة شعار النوادي
يقودنا في رحلة الخير حكام = حكام عدل وبالعداله تنادي
ال سعود مطوعة كل نمام = اهل السيوف المرهفات الحدادي
وحنا سندهم من قديمات الاعوام = ادناة شخص ٍ للمهمه سدادي
مانتبع اطغاث الاماني والأحلام = اثيابنا بالعز دايم اجدادي
واللي خسر في سوق الاسهم من العام = يزرع ويجني مازرع بالحصادي
هذي تجارة مربحه بس الآوهام = تلعب يراس الناس حضر بوادي
خلك كما طير السعد كل ماحام = مايضرب الا في كبير الثنادي
لاتصبح طماعه توطاك الاقزام = اضرب بمخلابك صباح وهجادي
ترى الذكاء والصبر نوع من الآلهام = وفي كل فرصة لحظة الارتدادي
خلك مثل نايف ولد روق مقدام = لاتصبح بسوق الهوامير غادي
عليك في سبكيم والا بالانعام = واشلع مع الطيار والجو هادي
واحذر من مضارب نما حكم الاعدام = وعذيب لاكتسيت بلون الرمادي
والعالمية مع ولاء مالها نظام = عليك بالأنماء وبنك البلادي
وعرج على التعمير والبس لك حرام = وافطن ل مكه سهمها غير عادي
وانحش عن المتكاملة وام همام = زين الرخيصه جلعها للنفادي
تم الكلام و صلوا لخير الأنام = نبينا اللي مرسل ٍ بالرشادي

بقلم نايف العتيبي