روايتي الأولى .. خوات دنيا واقعيه رومانسيه واجتماعيه ,, دخلوا وشجعوني
السلام عليكم ورحمه الله وبركاته
قوووة بنات
هذي أول روايه لي اكتبها بالقسم
ويااارب تعجبكم ويارب اسلوبي بالكتابه يعجبكم :)
روايه واقعيه -
بطلاتها بنتين رفيجات وأحداث القصه تدور على حياتهم وأحلامهم والمشاكل اللي مروا فيها بحياتهم -
بحط لكم أول بارت وان شاءالله اذا عجبكم ولقيت ترحيب بالروايه راح اكمل معاكم وماراح أأذيكم على ماأنزل البارتات متى ماتبون راح تلقون البارتات جاهزة
يلا وبأسم الله ببدي ...
بارت 1
يوم الخميس 5-4-2012
بفندق الريجنسي بالبدع الساعه 8 الصبح بدوا الناس المشتركين بالدوره يتجمعون ( دورة لتنميه الذات وتطويرها) على الساعه 9 ونص الكل كان موجود ومن ظمنهم بطلات قصتنا( حور و ليلى)
خل اقولكم عن حور,, عمرها 23 سنه متخرجه من التجاري موظفه بقطاع خاص شوي قصيره وجسمها زين على طولها وبيضه وشعرها اسود وعيونها ناعسه شوي وفيهم حور وويها تقريبا بيبي فيس حبوبه واجتماعيه وبسرعه تختلط مع الناس وتحب رفيجتها ليلى وايد ومع احداث القصه راح تعرفونها عدل
والحين نتكلم عن ليلى,,, عمرها 24 سنه متخرجه من الجامعه الأمريكيه موظفه ببنك طويله وشوي متروسه بيضه وايد وشعرها صابغته اشقر متحجبه وعيونها كبار مدورين طيبه وايد وتحب تتعلم كل شي يديد وبالقصه راح تعرفون شخصيتها عدل.
حور طلعت من بيتهم باليرموك مبجر وكانت لابسه جينز وبلوزة بيضه فوقها توينز لونه اخضر بحري وفلات نفس لون التوينز وشعرها ستريت وعدسات خضرا فاتحه ونو ميكب وركبت سيارتها جيب انفنيتي وراحت تتمشى عالبحر قبل لاتروح الدورة
عالبحر ..
... : بكلمج بكلمج دقيقه
حور : واي قطيعه فاضي من الصبح الوحده ماتقدر تتمشى على راحتتها مابي روح روح
... : تكفين بس دقيقه بطلي الدريشه
حور : نعم خير بطلتها شتبي
... : ممكن سؤال شمطلعج من الساعه 7 شعندج
حور : مع انه مالك شغل بس رايحه الفندق عندي دورة
.... : والله حرام هالعسل يقوم من الصبح عشان دورة انزين تكفين سجلي رقمي الله يخليج ترا ماراح افج عنج الا لما تدقين
حور : امبيه حددي بخاف منك يعني لا تفج عاد شسويلك وسكرت الجامه ومشت عنه
وصلت حور الفندق وكانت اول وحدة من المتدربين توصل الفندق ودقت على رفيجتها فاطمه
حور : فطوم وااي وينج تخيلي انا بروحي هني محد وصل من الربع اللي بالدوام
فاطمه : كاني كاني برا بصفط
داخل الفندق ...
حور قاعده مع رفيجاتها بالدوام ( الدوام داز حور والموظفات الدورة هذي ) تسولف معاهم ويحشون باللي رايح واللي راد
وبالكراسي اللي جدام البنات كانت قاعده ليلى بروحها وحيل مستحيه ومرتبكه كانت لابسه عبايه وحاطه ميك اب
حور : وااي فطوم تكفين شوفي هذي اللي جدامنا جنها كاسبر في احد يحط ميك اب جذي والساعه 8 الصبح !!
فاطمه : اي امبيييه قعد اطالع حدها تارسه ويهاا فاونديشن
نوف : واي مادري شلون لهم خلق يحطون كل هالمكياج من الصبح انا كريم حمايه مالي خلق احط
فيصل وسعد يوو عند البنات ..
فيصل : اوووف ابي افهم شالفايده من الدورة هذي مقعدينا من صباح الله خير على هالخرابيط
سعد : شفيك انت اسمع كلام عمك المدير وانت ساكت قالو روحوا الدورة نروح لا تقعد تتحلطم ( فيصل وسعد موظفين مع حور بالدوام)
يت وحده من المدربات حق قروب حور
يلا بنات شباب صفوا دور البنات بروح والشباب بروح عشان تدخلون القاعه
فيصل : بعد نصف دور ريال شطولي شعرضي اصف دور
حور : واااي حدي متحمسه حدي احس الدورة هذي عجيييبه
فيصل : اي طال عمرج حدها عجيبه صفي بالدور بس صفي
المدربه : يلااااا بالدور بنات شباب
طلع الدكتور اللي بيدرب المشتركين
الدكتور يوسف : اهلا صباح الخير صباح الفل ازيكم ان شاءالله قاهزين
عايز من كل بنت وشاب ينسى كل حاقه حصتلو خارق القاعه دي ويخش القاعه ودماغو صافيه مافهاش حاقه
عايزين تنقحوا ؟؟ عايزين تعيشوا حياه قديده ؟؟ عايزين تتخلصوا من كل همومكم ومشكلكم ؟؟ طب يلا غمضوا عيونكو القميله وخدوا نفس عمييئ وادخلوا بهدوء وكل واحد يروح للمكان المخصص بتاعوا
حور واقفه ورا فاطمه : ههههههه امبيه اهم شي غمضوا عيونكو القميله
فاطمه : اوووش غمضي غمضي
فيصل : أنا غلطان اللي سمعت كلامكم وييت
حور : وااي فصول لا تتحلطم صدقني راح نستانس
دخلوا المتدربين القاعه وكل واحد قعد بمكانه
وبدا الدكتور يشرح المحاضرة وبين كل درس يقدمه الدكتور كان في تمرين عملي
واحد من التمارين كان عباره عن كل اثنين يمسكون ايدين بعض ويسوون نفس المنشار عشان ينشرون همومهم ومشاكلهم
حور : واااي ملااقه محد معاي ابي احد يوقف ينشر معاي
ليلى : معاج أحد
حور : لااا :( انتي محد معاج خل نصير مع بعض
وبدت حور تختلط مع ليلى وبكل تمرين كانوا مع بعض وبالدورة كان لازم كل واحد يكون معاه شريك واحد مايتغير طول الثلاث ايام للدورة
وصارت ليلى شريكه حور بالدورة
ومن بعدها قاموا يشاركون حياة بعض بكل شي وبدت صداقتهم من هاليوم ....
يارب يعجبكم اول بارت واذا لقيت تشجيع بكمل معاكم ان شاءالله
مع حبي **:eh_s(7):
