اللي عندها او عند زوجها(قروض+ديون+فيزا وماستر)وسددتهم ادش ضروري !

السلام عليكم ورحمة الله وبركاته ..


شلونكم شخباركم ؟؟؟ :eh_s(7):


يا بنات ! انا عندي مشكله حيل جايده ! ما اشوفها هينه ! واتوقع الاغلبيه عندهم نفس مشكلتي !
يا ريت تنصحوني او تعطوني افكاركم وتكلمو معاي بالمنطق ويا بنات اللي عندها شي حق ينقال تقوله لأني ماراح ازعل انا حطيت هالموضوع عشان الاقي حل ! واللي نفس حالتي بتلاقي حل وانشالله انتو ماراح تقصرون :rerrerek:


الله يسلمكم انا متزوجه والحمدلله عندي عيال !
وانا طالبه قاعده اكمل دراستي ! كنت ناويه اكمل جامعه بس الظروف ما سمحت !

زوجي الله يسلمكم ريال معتمد على نفسه ما ينطر من احد شي حته اهله ! فزوجي من قبل لا ياخذني عنده قروض ! كان حق دراسه وحق سياره و ... و ... !
ولمن تزوجني هم بعد دق له قرض ! تدرون للشقه والاثاث وامور الزواج انتو ادرى فيها بعد !
ولمن حملت هم خذا قروض !
وقرض فوق قرض فوق قرض (تراكمة عليه القروض) ! وبعد فتح فيزا وماستر ! ما قصر صارت بدال المصيبه مصيبتين !
للأسف ان زوجي ! ما يحطني بالصوره يسوي ويخلص ويقولي تالي !
عالاقل لمن يقول اعذره ان ما ناخذ فلوس, فأهني عرفت ليش ما يتبقى لنا شي اخر الشهر بس والله يا بنات والله شاهد على كل كلمة اقولها,انا كل قرض خذاه ! خذاه حق شي مفيد !اللهم القرض اللي قبل الزواج انا ما احاسبه عليه بس قالي حق سياره وجامعه !
وعلى فكره عمرنا ما سافرنا او مثلا تقولون فسفسنا فلوسنا على شي تافهه لا لا !
اصلن طلعات نادر ما نطلع ايه لا تستغربون من الديون اللي عليه
وانا متأكده من كل فلس وين يروح ! وريلي مو راعي خرابيط او سفرات اللي اشك فيه لا الحمدلله

الحين ...
اهو ماشالله معاشه زين ! بس اتوقعون جم يبقى اخر الشهر ! (20) دينار بالظبط !
نخليها حق بانزين وجذي ! تدرون ليش !
-عنده 3 قروض قرض (1-2-3) طبعا كل قرض المبلغ يختلف عن الثاني
-التسليف
-التأمينات
-ايجار شقه >>>>هابين هالايام الشقه محكر وايجارها 300 او 400 ولا نبي معاريس بعد
-ماجله
-فواتير مكالماتنا
-معاش الشغاله
وبجذي طار المعاش ! :rgewrg: ما نطلع ما نغير جو ما نستانس ما نونس عيالنا ما نسافر والسبه القروض والديون ! :eh_s(2): الحمدلله الواحد بعد شيسوي والحين لو يناقز ما يعطونه البنك فلس وااااااحد !

عرفتو سالفتي .. :eh_s(11):
اقترحت على زوجي اني اتوظف بقطاع خاص ! مو مشكله انكرف بس ابي شوي معاش قوي !
ليش قلت له اساعدك ! رفض وعصب وصارت هوشه بينا وقالي انا غلطان اقولج كل شي (مثل ما قلت لكم ما يحب ياخذ شي من احد هذا طبعه) بس بعد حنه ورنه قلت له انا زوجتك ما فيها شي اذا ساعدتك هاذي اهيا الحياة مشاركة واهو ما قصر معانا وقلت له انا اذا اتوظفت اشيل معاش الشغاله ومثلا نص ايجار البيت ! جذي نحل شويه من مشكلة الديون وقعدنا نحسبها ونفرفرها بس يا يبنات ماكو فايده ! القروض موجوده ويبيلها سنين على ما اتصكر ! ومعاشي همن بيطير وعملنا حساب اني باخذ سيار راح يصير عندي اقساط بعد ما سوينا شي ! وحياتنا صار ملل بملل اعوذ بالله الروتين خااايس ما نطلع ما نسوي شي اهو من الدوام لي البيت والعكس اهو قالي نفسيتي تعبت ودي اغير جو نفسيتنا صارت اكس ! :eh_s(2): عيالي بخاطري امشيهم ! وريلي قالي انا لو احد بس يشيل عني مصرف الماجله والايجار والخدامه خلال سنه او سنه ونص اصكر قرضين يعني لدرجه حته لو نفكر نسكن بيت اهله تقسيمة بيتهم ما تسمح ! ولحد يقول اهله يساعدون اهو كللللش ما ياخذ من اهله مادري ليش شي خاص بينا وبينهم وان اللي عرفته منهم اهو من دش الجامعه واهو شايل عمره !انا قام يكسر خاطري كل يوم يحسب بورقه وكل يوم يايني بأقتراح ! لمن قالي :
(تبين تبدين حياة يديده ؟ لازم نتحمل شوي..شلون؟ نطلع من شقتنا ونروح شقه صغيره ايجارها بحدود 100 وشي او 200 ونبيع اثاثنا كله ! الا الاشياء الاساسيه ! نقعد على هالحاله لمدة سنه او سنه ونص عشان يصكر ديونه تالي نبدي من يده ويديد شوي شوي على قولته نبني) :eh_s(10): :eh_s(11): حسيت شوي صعبه ماراح انتحمل !وحته لو بنتحمل راح تتعب نفسيتنا زياده انا ادري !
وللعلم : انا عندي اسهم بس اخر مره سألت ما تييب واايد يعني ما تصكر ديونه
رفيجتي اقترحت اني ابيع الاسهم وادش فيها مشروع بس قالت لي هاذي تجاره ما تضمنين الربح

الحين اللي ابيه منكم !
اي اقتراح او نصيحه او معلومه تفيدوني فيها ! اللي عندهم ديون شلون سددتو ديونكم ؟
شسويتو ؟ شنو خططكم ؟ اذا انا توظفت شنو اقتراحكم ؟ شلون اقسم معاشي واساعده ؟
معاشي هل يفيدنا ان نصك شوي من ديونه ؟ عندكم خطط حق هالمشكله ؟
اسويلي مشروع معين ؟ شالحل شورو علي شسوي

تكفون اللي عندها اقتراح تفيدني قبل لا يرسي زوجي على حله ! :eh_s(11):

انا مستعده اسوي اي شي لانه زوجي وما قصر
مابي نوصل مرحلة ان ننفصل فيها والسبه الظغط والاعصاب والمشاكل



وشكرا