كلمة راس من الكنت للمدافع الكبير عمر هوساوي ......................... ................
- أول شيء أنا ولله الحمد عندي نظره كرويه وأقدر أميز اللاعب الممتاز من اللاعب السيء .
- بداية نزول مستواك كان في عهد المدرب الغبي كوستاس اللي كان يلعبك ظهير وكنت خايف من هالشي وصار مع الاسف لأنك حاولت تأدي في الظهير
ولكن صارت أخطاء لأنك ترجع قلب وانت ما تدري وهذا الشي سبب ربكه وثغره وخلا ثقتك في نفسك تقل وانا احمل المدرب كل المسؤوليه .
- كل لاعب له أخطاء وخاصة في المناطق الدفاعيه .
- هنالك عنصر مهم وهو التطور أو التراجع .
- المدافع لابد أن يكون مركز على اللعب ويقرأ اللعبه عشان يتوقعها صح ويقطعها .
- لابد أن تعلم أنك تملك مقومات المدافع الكبير ولكن لاتعتمد عليها فقط يعني إذا قابلك مهاجم لا تدخل عليه بقوتك وسرعتك لأنه يمكن يموه ويسحبك .
- ركز على الكوره ولاتحط في بالك موضوع الملامه وأنا الاحظك دايم تحاول تلوم اللي معك لأنك تخاف انهم يلومونك يعني باختصار
تخاف من المسؤوليه وهذا خطأ كبير أنت مدافع ولازم تتحمل الضغوط وما تستسلم لكلام الناس أهم شي تسوي اللي تشوفه صح مهب اللي
المفروض أنك تسويه عشان الناس ما تنتقدك .
مثلاً فيه بعض المدافعين مرات من الربكه يشتت الكوره وقدامه مهاجم فتضرب الكوره في المهاجم وينكب الفريق ليش ؟
لأنه حاول يتهرب من المسؤوليه وما حاول يسوي الشي اللي يوافق عقله بأنه يناول أو يشتت للآوت أو يموه على المهاجم .
- على فكره اسامه هوساوي نكب فريقه وطلعه في الاسيويه قدام ذوب اهن ومع هذا يبقى نجم كبير يعني على انه خطأ طلعهم من بطوله
تخيل لو انه قام يلوم نفسه وبدأ يحاول يقنع الناس انه نجم وهذا يخليه تحت الضغط طبعاً وزادت أخطاىه يمكن ما قدر يستمر في فريقه ويمكن يكون دكه
وبنفس الوقت ودي أعطي مثال في عيد لاعب كان نكبه ولكن على كثر الانتقادات اللي جاته ولكن ميزته الوحيده انه ركز أكثر في الملعب وحاول يرضي
نفسه بس ويتحمل المسؤوليه لدرجة انه مرات يشيل كور من ورى الحارس وهذا شي مهب مطلوب منه ولو كان يفكر في الجمهور والاعلام كان يمكن مالحق
ورى الكوره لأنه وقتها بيقول الحمد لله أني ما لي دخل في اللي صار وما أحد راح ينتقدني في هالهدف !!!!!
-اخر شي احب أقوله أنت تلعب من ضمن مجموعه من المدافعين أنت تقدر تتميز من بينهم وتوصل للمنتخب بعد ولكن هذا يعتمد على قرارك أنت
تبغى هالشي والا بس تبي تستلم راتب وتجلس على الدكه ، فكر في مستقبلك لأن توك صغير وتقدر توصل بالإصرار والعزيمه والفكر السليم وترى الدفاع
فكر مهب بس مجهود فيه لاعبين كبار بالسن ما يبذلون ربع المجهود اللي تبذله ومع هذا يقطع الكور بكل ثقه لأنه يعرف وش يفكر فيه المهاجم وينتظر شوي
قبل ما ينقض على الكوره وما يخاف لا من المهاجمين ولا كلام الاعلام ولا الجماهير ولكن يخاف من ضميره ورأي المدرب فيه فقط.
