ضاق خلقي بحفلة امس

السلام عليكم
امس حضرت حفلة زواج صادني احباط مو طبيعي
حسيت اني غريبة ومحتقرة صراحة
اولا انا شخصية مسالمة
احب الناس دائما مبتسمة يمكن مو اجتماعية
لكن اتجاوب مع الناس بشكل ايجابي
اهل ابوي شوي شايفين نفسهم من كنا صغار ماكانوا
يحبونا ويعاملونا انا واخواتي مثل الباقين
ياعني مو كره لا استحقار صراحة
ياعني مثال لما كان عمري 9 سنوات وكان الوالد
متوفي له سنه انخطبت بنت عمي وجالسين ينسقون
لزفتها كل بنات العايله الي بعمري خلوهم يشاركون
بالزفة كوصيفات الا انا واختي تاثرت نفسيا حييييل
وقتها....

الان كبرت وصار عمري 28 متزوجة وعندي اطفال
وعندي قناعة شخصية
ان ماحد يقدر يغلط عليك الا اذا انت سمحتله
يغلط يعني المشكلة في ذاتي..امس كنت بحفلة
وحسيت اني شي هامشي بنات العايلة مع بعض
ماحد فكر يناديني انا واختي نجلس معهم
وانا بالمقابل ماحب افرض نفسي ع احد
وجت بنت عمتي جلست معانا هذي تحبببني حيل
وانا احبها وجت وحدة وهي اكبر مني
وصار لي سنيييين ماشفتها وتعرفني زين
وقفت عندنا وقالت يالله يافلانة ياعني بنت عمتي
قومي نرقص وانا واختي كاننا خيالات
ماحاكتنا ولا عزمتنا ع الرقص اقل شي مجاملة
والله قط وجهي الوان منها حسبي الله عليها
وطول الحفلة حاقرتنا وتناظرنا بنص عين
وتراي كاااااااشخة حدي وبشكل راقي ومهتمة بنفسي
ياعني ماتوقع المشكلة بالشكل
وشوي وتبوس رجول بنت عمتي واختها
من كثر مو عالقة فيهم وتنكت وتسولف
وانا واختي طاااااااااف علينا
قلت هذي بكيفها ويبلنا ربي بوحدة ثانية
برضو ماشفناها من سنين طاحت عينها بعين اختي
واختي سلمت وحاولت تسولف معاها واهي
كنها تقول ايه ايه اخلصي بروح ياعني تتحرقص
لا احترام ولا تقدير ولا تقولون وراها شي لا عادي ارجعت مكانها
واسكتت ماعندها شي !!!!وفي الرقص ماحد يطالعني او يرقص جنبي
ووحدة جنبي كانت تبي شغلة وطلعتها من شنطتي
وعطيتها ثم ردتها وماقالت حتى شكرا
وما حاولت تسولف معاي وهي ماتعرفني اساسا
وانا ماعرفها عادي لما جت وحدة من قريباتي مكاني
هذيك قامت تحارشها تبي تتعرف عليها 0000
وانا ابدا ماعبرتني!!!!!!!!
مواقف كثيرة حصلت امس كلها احتقار واحباط
من غرب وقرب
واعترف ان المشكلة فيني بس مو عارفه شنهي ؟؟؟
ومثل ماقلت انا مبتسمة ولساني حلو مع الناس
ومؤدبة وراقية وكشخة بشهادة الي حولي
بس مادري ليه هالمعامله لي انا واختي
لان حتى هي كانت متضايقة من الوضع





ماحد جلس معاي او كلمني يادوب سلام
ومع بعض ضحك ورقص وفرفشة