السلام عليكم ورحمة الله وبركاته
بسم الله الرحمن الرحيم
مدري والله من وين ابدا الموضوع لان الوضع مغلفص مثل غلفصت إدارتنا في بعض الامور شكلهم اعدوني الله يسامحهم.
يجيني واحد يقول وش معنى الغلفصه
الغلفصه يعني الدوران في حلقه مفرغه يعني تخبط يعني انسان يمسك عجينه ويعجنها ويتعب ويتهبد وفي الاخير تطلع العجينه ماتنوكل ولا يتعلم من عجنه اللي كل مره يفشل فيه.
نعم فشل بكل معاني الفشل
لا احد يقول لي مافيه فشل لان اللي بيقول مافيه فشل اصلا مو فاهم وش معنى فشل.
لان احد اهم اسباب حصول الفشل هو اختلاق الاعذار وعدم التعلم من الاخطاء.
لم انتقدك يا ابو فيصل شخصيا في جميع كتاباتي ولكن يجب ان نقول مانرى وهذا اول موضوع بتكلم فيه وانتقدك شخصيا .
نعم يا ابو فيصل ادارتك وعلى هرمها انت احسن اداره في العالم في اختلاق الاعذار وتزيين الاخطاء لنفسها وعدم الاعتراف بأن هنالك خطاء وانكم معصومون من الخطاء وخصوصا انت.
كالديرون جبته وقلت افضل لهذا الوقت ومافيه بديل وهو افضل الموجود وانت كنت تعلم بأن اريك راحل وقعدت تقدم مبررات وسوالف وان كالديرون يعرف الدوري تزين القرار لنفسك وفي الاخير وش المحصله اقالته .
دول اتى لان الخيارات كانت ضيقه وان الوقت ما اسعفكم وهو افضل الموجود.
الاصلع التشيكي نعذرك من دون ماتتعذر ولكنك تعذرت الوقت ومافيه مدرب محترم بيقبل يمسك فريق من نص الموسم وهو افضل الموجود.
تعددت الاسباب والموت واحد
سهل على كل انسان انه يختلق عذر لفشله في شي بس مو صعب انه يتعلم من اخطائه.
هل كنت يا ابو فيصل تقول لنفسك قرار بأخذه واذا نجح ما احد يحتاج عذر واذا مانجح العذر جاهز وجمهور طيب يصدق له كم كلمه مرتبه ولا احتاج اني اخذ راي احد منهم لاني انا احسن واحد في العالم يفهم انا ومن حولي فقط.
يا ابو فيصل ماسألت نفسك سؤال بسيط بس ليش الوقت مايسعف الهلال في اختيار المدرب والخيارات تقل علينا بس حنا :d الخلل في الوقت وقل الخيارات ولا في العقول اللي تدير الوقت !!!!
طيب مو الشباب وقع مع برودوم من وين جابوه من المريخ !!!!
والاهلي من وين جاب جالروليم نزل عليهم ببراشوت!!!
مثل ما قلت سابقا في الموضوع سهل ان الانسان يختلق عذر وصعب عليه انه يبحث عن مكمن المشكله عشان ما ينصدم بالواقع المر.
في اتصالك لبرنامج الهدف اتصلت متنرفز عشان العجوز جوزيه وتقول انه ماكان احد الخيارات وانك ضميته للخيارات وش المقصد من سموك الشغله عناد يعني!!
من اللي سبب الصجه؟
جمهور الهلال ليش تسلب الجمهور حق من حقوقه وتقول للجمهور لا تتبعون الكلام طيب نفس الجمهور اتبع كلامك وصدق اعذارك ما انتقدتهم وقلت ليش تسكتون.
ولمى ما وافقوك الراي طلعت قلت انا ضميته لان CV جوزيه ممتازه :d ممكن ما ضميته او ماراح يجي الهلال بس ليش تقول ضميته وتنتقد الصجه هل سياسة سموك ان لم تكن معي فأنت ضدي !!!!
للجمهور حق التعبير وانت يا ابو فيصل من وضع نفسه في هذا الموقف لان الجمهور اخذ وعد من شهر تقريبا في تاريخ 22 ان خلال ايام المدرب بيعلن ولا حصل شي .
وتطلع زعلان على الجمهور وتقول عندنا اربع خيارات والان مانويل الخيار الخامس!
ماهكذا تؤكل الكتف يا ابو فيصل
لان انت تتحمل جزء كبير من الخطاء تدري شلون
انت عارف ان الاصلع التشيكي ما راح يستمر مع الهلال من قبل نهاية الموسم بفتره.
كان بأمكانك تبحث من زمان عن مدرب وتخلص معه قبل ماينتهي الموسم ولا تتأخر كل هذا التأخير تنتظر اريك جريتس او غيره لان من عافك لا تلتفت فيه .
اجل اربع خيارات يا ابو فيصل :naughty:
انا بعطيك خياريين للاربع خيارات حقتك
الاول ان مافيها فاتح العين لان لو فيها فاتح عين او مدرب صاحي كان ماقعدت تنتظر ووقعت معه لان حسب كلامك المدرب الصاحي مايقعد.
والثاني يا انك عايش على امل ان واحد من الاربع خيارات هذي يوافق لانك ماقدرت تخلص معه واذا ماوافق جبتوا واحد من اللي مافيهم احد يفتح العين .
والعذر جاهزززززززززز
شخصيته قويه وهو افضل الخيارات الموجوده والوقت ما اسعفنا ونسوي قصه من لا شي .
خلاص يا ابو فيصل لازم تقتنع قناعه كامله انك يجب ان تسمع للجمهور مو مثل مقولة سامي حنا مو مايطلبه المشاهدون!!!
لان الجمهور فيه ناس كثيره محبه ومخلصه وتفهم كوره وتفهم اداره وتفهم اشياء كثير ما اطالبك انك تنفذ اللي يقولون اقلها اخذ ارائهم وبطريقتك تبني رايك وفق مشوره كامله مو مشوره مختصره لان النادي للجميع وحاول تبحث عن مكمن المشكله لتفاديها في الاربع سنوات القادمه .
واتوقع ان مكمن المشكله هو احد شيئين
1- ان من تشاورهم في المختصر خلاص يجب انك تسوي تغيير لهم لانهم اثبتوا انهم ماعندهم الا تزيين القرارات والاعذار الجاهزه وسم طال عمرك .
2-ان من تشاورهم في المختصر خلاص يجب انك تسوي تغيير لهم لانهم اثبتوا انهم ماعندهم الا تزيين القرارات والاعذار الجاهزه وسم طال عمرك .
:d:d:d
8
8
8
خيارين مالهم ثالث يا ابو فيصل
ختاما لك يا ابو فيصل تقبل مني ماتقدم كصديق
رحم الله امرىء اهدى الي عيوبي
و
(صديقك من صَدَقَكَ لا من صَدَّقَك )
اتمنى من كل قلبي ان ما اتوقعه يخيب لان جمهور الهلال محب للهلال وليسى بمحب لأشخاص ولولا الله ثم هذه الجماهير ما تهافتت الشركات على طلب ود الهلال.
دمتم بخير وسف على الإطاله
:rose:
لكل من مر من هنا
