ياسر يحاول يضرب جمهور الهلال بالإدارة !! (( للأسف ))
بسم الله الرحمن الرحيم ..
في البداية أتمنى من جميع من يقرأ الموضوع يدعي لأخواننا وأهلنا بسوريا وان الله يفك أسرهم عاجلا غير أجل وينتقم لنا من بشار وأعوانه ..!
موضوعي هو تحليل شخصي أتحمله انا شخصيا وما يعتبر رأي الجمهور الهلالي ككل أو رأي المنتدى الرسمي للنادي .. أنا اطرحه وانا اتحمله ..
قسينا على ادارة النادي كثير السنه الي راحت بالرغم انها كانت واضحه وما تتخذ اي خطوة الا بعد تفكير دقيق ! لكن الحقيقه أن جمهور الهلال جمهور لا يرحم إطلاقا ولا يرضى الا أن يكون البطل ((الوحيد)) وهالشي يرهق كل ادارة تأتي للنادي !!
بعلق على قرار اعاره ياسر للعين فقط ! قرار أحدث ازمة بين الجمهور العاشق لياسر وللهلال مع الاداره !
هاجمنا الادارة ! ماكنا ندري عن اي تفاصيل ! الي نعرفه ان الادارة قررت إعارة ياسر ! المعنى ان الادارة ماتبي ياسر ! فطبيعي نزعل وننتقد والبعض بدأ ينتقص من الاداره !
لكن طلع الرئيس وطلع سامي وقالوا حنا كنا نبيه ! وسامي راح له بغرفته بالمعسكر وقاله : يا ياسر اتروح للعين !
قرار الرحيل ولو بالاعارة للعين كان قرار ياسر 100٪ !! ليش (( حاسبنا )) الاداره ؟! ليش (( رقعنا )) لياسر وقلنا راح يغير أجواء !!
حاليا يتكرر نفس الموقف ! لكن الأدهى والأمر أن الكابتن ياسر القحطاني يحاول يضرب الجمهور بالأدارة !
الادارة صرحت انها مارح تقبل التفاوض مع العين بخصوص بيع عقد ياسر الا في حالة رغبة ياسر بالرحيل ! والمفاوضات جاريه حاليا ! وش معناها ..؟؟
السالفه واضحه ياجماعه وبدون عاطفه زايده ! ياسر ارتاح للعين ويبغى يكمل معاهم ! ولكن ياسر ما يبغى يخسر جمهور الهلال أو بالأخص جمهوره ! فيحاول يظهر بمظهر الأنسان الي مسير غير مخير !!
جمهور الهلال الاوفياء صبروا على ياسر من عام 2009 بعد ما بدأ يمر بأزمه نفسيه ودعمته بكل ما تملك ورددت أسمه كأكثر لاعب هلالي تم ترديد أسمه بالمدرجات !! ( لدرجه أن اي شخص يتابع المباراه يحس ان فيه ثلاثه يتنافسون الهلال وخصمه وياسر ) وبعد كل هذا الدعم ينتهي موسم 2011 وياسر مستواه متواضع !
اضطر الهلال يتعاقد مع مهاجمين اثنين بنفس الوقت ! وبالمعسكر بعد ما شاف ياسر مستوياتهم وجاه عرض من العين قرر الرحيل ! وقالوا تغيير اجواء ! (( احترامي لياسر ولكن هذا يسمى هروب من المنافسه على الخانه ))
العربي سجل 12 هدف بالدوري و4 بأسيا وجميع اهدافه الاسيوية موثره غيرت نتيجة المباراة (( العربي ما سجل علي الفرق الكبيره الشباب والاتحاد والاهلي حتى النصر ))
الكوري سجل 20 هدف بالموسم (( بالرغم انه ضيع ضعفهم ومارح اقول صغير بالسن لكن مشاغب ومتحرك ومزعج يعني ممكن يصنع لنفسه فرصه ويسجلها )) !!
عيسى كانت له أهداف حاسمه ومايحتاج اتكلم عنه الله يستر عليه لاعب انظلم كثير بالهلال وكلنا باركنا له هالخطوه لانه يستاهل كل خير !!
سعد بالرغم اني ضد التعاقد معه لكن كلمه حق (( سعد من الاعبين الي فيه ميزة الاعب الي يحس بالجمهور )) يعني سعد مستحيل يختفي بالمباريات الجماهيرية !!
بعد كل هذا السرد عن مهاجمين الهلال الموسم الماضي ياسر لايملك الثقه بالنفس أنه يرجع ويفرض نفسه اساسي !! لانه عارف أن المدرب وسامي مارح يجاملونه أكثر من كذا !!
ياسر مهما بلغ مستوى ذكائك لن تستطيع ان تضرب جمهور الهلال بالادارة !!
سامي الجابر طلع مع مصطفى الاغا وقال اعتب على ياسر انه ما نفى الكلام الي يقول اني سبب تركه للهلال ! وأخفى عن الاعلام والجمهور اني حاولت اخليه يبقى بالهلال !
بعد كل هذا الهلال مارح يوقف على ياسر او غيره.. وياسر مهما كان عمره مع بداية الموسم 30 سنه ومارح يعطي الهلال بهالعمر قد ما اعطاه وهو اصغر (( بغض النظر عن المستويات المتواضعه ))
أتمنى له التوفيق بالدوري الاماراتي (( الدوري عندهم حاليا يناسب مستوى ياسر الفني والمفروض يبدع ))
ذهب للامارات بسبب تغيير الاجواء والهروب من الضغوط ! سامي 20 سنه يحاربونه كلاعب و4 سنوات كأداري وناوي يصير مدرب ! وياسر حاربوه سنتين والثالثه هرب للامارات !!
أتمنى من ادارة الامير عبدالرحمن بن مساعد أن لا تخشى احدا بأعلان قرارها وسنكون خلفها لأن الهلال يملك جمهور عاشق له وليس جمهور للاعبين !
الي ما يبغى الهلال مع السلامه والله يستر عليه (( احترمنا عيسى لانه واضح وصريح )) (( وبرضوا شجعنا اسامه البطل لانه طموح وصريح ومستحيل نوقف بوجهه ))
اسف على الاطاله وبالتوفيق لزعيمنا بالموسم القادم
