-
آلسـلام عليكـم ..
شلونكـم بنـات ؟
هـذي اول مشاركـه لـي , و اول تجربـه اطرحهـا :*
طبعـاً اغلب البنات يعآنون من سواد الركبـه و الكـوع ,
و بـ هآلمناسبـه بقولكـم تجربتـي ..
انا بصرآحـه مآ تمشي مع بشرتـي آلخلطـات كلللـش !
مره حطيت خلطـة صبـوحـه , الكل يمدحهـا و خواتي يحطونهـا ..
ماشاءالله .. خواتي حطوها و تغير لونهم 180 درجـه ,
و انا حطيتها مره .. اقسم بالله اليوم الثاني ركبتي تلزقـت و حمرره
و لا بعد ازيدكم من الشعر بيت , صارت غامجه بشكل مو طبيعي ..
فـ من هني عرفت ان جسمي كلش مو مع الخلطـااات !
لووول مالكم بالطويله .. ادري قرقت فوق روسكم : $
.
.
آمانتن .. انا سويت 3 طـرق , و كلهم لهم نتـايـج قويـه !
و هـ الـ 3 طرق يكملون بعـض .. لازم تطبقونهم كلهـم
الطريقـه الاولـى *
روحي الحمام عزج الله .. فتحي ماي الحنفيه على أحر شـي
لما يمتلي الحمام كله بخار ,
و سكري الباب عدل و طلعي .. روحي المطبـخ و ييبـي جيس جمعيه
حطي بالجيس : ليمونه كبيره قاصتها نصيـن - ملح - شكـر - قفشتين صغار - سودو كريم - نايلون ,
سكري الجيس و خليه على جنب , و اخذي زيت زيتون و حطيه على ركبـج
عقب ما تخلصين .. مسكي الجيس الي حطيتي فيه الاشياء و روحي الحمام
اول ما تدشين تلقين الحمام كلله ممتلي بخار .. دشي و سكري الباب عدل !
نطري ابو 3 دقايق جذيه , خلي البخار يحوش جسمج شوي ..
و لما تحسين ان البخار حاش جسمج .. طلعي الليمونه المقصوصه نصين ,
مسكي النص الاول و حطي فوقه قفشتين صغار من الشكر و قفشتين صغار من الملح
و فركي فيه ركبتج الاولى حيل حيييييل لما تحسين انها صارت حمره ..
طبعا ما تسكرين الحنفيه .. تخلينها مفتوحه ,
و مسكي النص الثاني اول ما تخلصين من النص الاول ..
و سوي نفس الطريقـه .. حطي بالنص الثاني قفشتين صغار شكر و ملـح ,
عقب , غسلي ريلج بالهوز او المرشه ( لا تغسلين من الحنفيه لان الماي حار )
و اول ما تنظفين ريلج عددل من اللويه الي حطيتيها ,
ييبي ليفتج .. و غسليها بماي الحنفيه الحااار , بس ديري بالج لا يحوش ايدج عشان لا تحتقرين
و لما تتبل الليفه بالماي الحار , فركي فيها ركبتج حييييل
بتحسين ان ركبتج خلاااص صارت طمامه ..
عقب ما تخلصين من تفريك ركبتج بـ الليفه .. سكري ماي الحنفيه ,
و طلعي من الجيس سودو كريم و حطيه على ركبتج و بعدها حطي نايلون فوق ركبتج ..
غسلي ايدج بـ صابون و طلعـي من الحمـام ,
و خلي النايلون عليج ليييي قبل النوم .. قبل لا تنامين شيليه و حطي سودو كريم مره ثانيه ( جدديه )
بعدها حطي نايلون ثاني و نامي ..
اول ما تقعدين بتلقين ركبتج نااااعمه و الجلد الميت طايـح ,
سوي هـ الطريقه لمدة اسبوع و بتشوفين الفرق ^
الاسبوع الي وراه , سوي الطريقه الثانيه ..
الطريقـه الـثـانيـه *
روحي المطبخ , ييبي صحن صغير و قفشه صغيره ( خليهم حقج بس )
ييبي زيت زيتون و شكـر .. و خلطيهم بـ الصحن ,
و مسكي هـ الصحن , و روحي غرفتج .. بسطي ع الارض و حطي تحتج جرايد :p
عشان لا تدمرين روحج و ما تدمرين غرفتـج ,
و شيلي بالقفشه من الزيت و الشكر و حطي بركبتج الاولـى ..
و فركي ركبتج حيييييل لان هـ الطريقه تقشـر الركبـه ,
و سوي نفس الطريقه بركبتج الثانيـه .. و بتلاحظين ركبتـج صارت حمررره
روحي الحمام غسلي ركبتج بماي دافي , بعدها اخذي الليفـه ..
و بلليها بـ ماي حااااار .. و فركي فيهم ركبـج حيييييل
و اول ما تطلعين نشفي ركبج عدل من الماي , و روحي المطبخ
طلعي ماي ورد و ييبي قطنتين ناعمين .. ترسي القطنتين ماي ورد ,
القطنه الاولى مسحي فيها ركبتج الاولى و القطنه الثانيه لـ الركبه الثانيـه !
خلي ماي الورد شوي يتشـرب على ركبتـج ,
بعدها حطي على ركبـج اثنيناتهـم فازليـن و فوق الفازليـن نايلـون ..
و مثل الطريقه الاولـى .. لا تشيلينه الا قبل النوم , و جدديـه !
بتقعدين تلقين ركبج تلق لق و نااااااعمه ,
خليج على هالطريقه اسبوع كامـل و بتدعين لـي صدقينـي ^
و الاسبوع الي وراه سوي الطريقه الثالثـه ..
الطريـقـه الثـالثـه *
لان انا طماعه , و أبي ركبتي تصيـر احلى و احلـى ..
سويت طريقه واااايد حلوه و سهله ..
طبعا انا كل شهر عندي موعد بـ الجلديه ,
و قلت حق الدكتوره ابي كريمات تبيض ركبتي !
قالتلي اشوف ركبتج .. و رفعت عباتي ووريتها ركبتي
قالتلي ماشالله ما يحتاااج ركبج بيضه و نظيفه
قلتلها زيادة الخير خيرين و بني آدم طمااع لوووول :p
كتبت لي كريمين اخلطهم بـ بعض و احطهم على ركبي يومياً لمدة اسبوع أو اسبوعين على حسب ركبتـج ,
الكريم الاول , لازم وصفه طبيه
اما الكريم الثاني , موجود بالصيدليات ..
الحين بحطلهم صورتهم :
http://www2.0zz0.com/2012/06/15/14/516770290.png
الكريم الكحلي , هاذا للتقشيـر .. وايد وايد واايد حلوو
اما الوردي .. للحساسيه و التبييض
http://www2.0zz0.com/2012/06/15/14/555670922.png
تحطين من الكريم الكحلي شوي على ايـدج ..
و من الكريم الوردي شوي ( بس حاولي يكون اكثر من الكريم الكحلي )
وخلطيهم بطرف اصبعج , جذيه :
http://www2.0zz0.com/2012/06/15/14/837029594.png
بعدها , حطي الكريمين المخلوطين على ركبج ..
و لبسي دراعه قصيره وسيعه .. او بيجامه وسيعه ,
أو حتى تقدرين تلبسين شورت قصيـر .. و تخلينه عليج لمدة ساعه
و معلومه بنات .. ترا هـ الكريمين بسرعه يتشربون ع الركبه ,
بتلاحظين بعد ربع أو نص ساعه ماكو كريم على ركبتج ..
و اول ما يتشربون الكريمين .. مسحيهم بكلينكس ماي دافي
و حطي قطنه متروسه ماي ورد على ركبـج , و بعدها فازليـن
و بـس , بـ جذيه خلص موضـوعـي ..
والله يا بنات بتدعوولي لأن صج الفرق وآيد وآيد كبيـر
و لأن شفت الفرق و النظافه و البياض , قررت اطبقها لـ كوعي
مع انـه كوعي اغمج من لون بشرتي بـ شووي ..
لوووول بس طمعت بـ النتيجـه !
و موت حره يَ ابو سروال و فانيله :p
بس قبل لآ انهي تجربتي , حابه اقولكم شي صغير :
" الترطيييييييييييب "
الترطيب يَ بنـآت , الترطيب ثم الترطيب ثم الترطيب ..
الأهم من كل شي قلته اهو الترطيب ,
الترطييب مهم مهم بشكل مو طبيعي لا تستهينون فيـه ..
ترا والله مو خاسرين شي ! حطو فازلين كل يـوم
أي سؤال او استفسـار انا حـاظـره *
ادعولي الله يحقق الي فـ بالـي ,
ريـمـآس : )
