انهاردة انا بكتبلكم موضوع خاص جدا بجد
اولا: لانة عن تجربة من قريب
ثانيا: لانى كان عندى اعتقادات غلط خالص زى بقيت الشعب و كنت بردد نفس الكلام الى الناس بتقولة من غير ما اجرب
موضوعى النهاردة عن ازالة الشعر بالموس بتاع البنات او النسائى
Gillette Venus
بداية القصة:
انى للاسف مش بعرف اشيل الشعر الى تحت فى المنطقة الحساسة و الموضوع دى كان معصبنى جدا بجد لانى علطول بحس انى مش نضيفة حتى لو مستحمية و حاطة برفيومس و شعرى فظيع و بشرتى فيعة كنت ستيل بحس ان عندى مشكلة مش عارفة احلها مشكلتى اولا انى بخاف جدا من تحت من المكان دى و كنت بفكر اخلى الى بتعملى سويت مرة تعملى و خلاص بس حسيت انى مش هقدر اقلع قدامها لبسى بالمنظر دى المهم لانى لسة مش اتجوزت فا كنت حاسة يعنى اية يعنى هفضل بالمنظر دى لحد لما اتجوز و افرضى مثلا مش اتجوزت هفضل طول عمرى مش نظيفة كدة المهم و الحمد للة كنت عايزة اعمل ليزر و اهلى مغلسين عليا اوى لانى هدخلهم فى 30 الف جنية فا قولوى لما اجى اتجوز ما علينا لانى مخنوقة بجد المهم فا و انا كنت فى المنتدى لقيت عضوة بجد ربنا يكرمها كتبة موضوع عن طريقة حلاقة المنطقة دى بالموس و اكنك عاملة سويت المهم الموضوع بصراحة شدنى اوى فاهمين لانى كمان لقيت ردود ناس بيستخدموا و مبسوطين فعلا منة
القرار:
فا لقيت انى مش عندى اى اوبشن تانى غير انى اجربة بنفسى عشان اقدر احكم بنفس فعلا و يبقى قرارى قرار شخصى مش كلام بسمعة و اعد امشى ورا و خلاص و قولت اية اوحش حاجة يعنى هتحصل يعنى و لو مش عاجبنى مش هستخدمة تانى
الشراء:
فا الاول دخلت على السايت بتاعهم و اعدت اعمل ريسرش كويس على النت عموما المهم لاقيت انوع كتير تقريبا 5 انواع من جيليت للنساء بس لما جيت اطلب الصيديلة الراجل قالى مش عندة غيرنوع واحد بس جيلين فينيس فا قولت اوك و جبهالى فعلا و هى ب 54 تقريبا
اول انطباع:
حبيت اوى بجد العلبة و الموس طبعا لونة بينك و بيجيى فى علبة كدة بيتحط فيها من برا و جوة العلبة فى جزء كدة بتشيلى و تربكى فى العلبة من ورا علشان تعلقيها على فى الحمام و جوة العلبة كمان فى شفرة هدية مقفولة فى علبة صغيرة اوى حاستها بتاعت بنات اوى بجد و كمان شكل الموس مختلف خالص عن بتاع الولاد المهم انتوا هتشوفوا الصور
اول مكان استخدامها فى:
تحت او فى النطقة الحساسة انا كنت خايفة اوى اصلا و اعدت اسمى و كدة و كنتخايفة ان الموس دى يوجع لانى بخاف عموما من اى حاجة حادة زى سكينة او كدة المهمة عملت بطريقة البنت الى كانت بتقول عليها فى الموضوع
الطريقة بالظبط:
1- اغسلى المكان الى هتعملى فى كويس ( انا كنت لسة مستحمية )
2- طهرى المكان كويس بحاجة معقمة ( انا استخدمت ديتول وايبس المناديل المبللة يعنى )
3- رطبى الجلد كويس حطى لاما شافنج كريم او جل او زيت بيبى جونسون او زيت زيتون او ممكن كمان بلسم الشعر العادى بس بلاش تحطى دى و انتى بعتملى المنطقة الحساسة و بس ممكن تسيبى الزيت 1 دقيقة او حتى من غير ما تسيبى خالص بس افضل سبيى 1او 3 دقائق
4- بس ابتدى شيلى طريقة البنت الى كانت كاتبة ركزوا معايا كويس
شعرالمنطقة الى قدام دى نازل لتحت عموما يعنى معظمة فا هنعمل اية
1- هنشيل الاول فى اتجاة الشعر يعنى حطى الموس من فوق و خلى ينزل لتحت
( هتلاقى كتير طبعا من الشعر اتشال بس لسة فى شعر صغير كتير انا كنت فاكرة بقى ان دى هيبقى المنظر النهائى فا قولت اوك يعنى% 60 نظافة احسن من 0% فاهمنى
2- بعد كدة بقى شيلى بعكس اتجاة نمو الشعر يعنى الموس هيبقى تحت و هتطلعى بى لفوق ( مش قدرى اقولكم واللة انا اتصدمت ازاى يبنات تحفة تحفة بجد واللة شال الشعر كلة واللة اكنى عاملة بسويت انا كنت حاسة انى عايزة ازغرط و مش مصدقة تحفة بجد
3- بعد ما تخلصى تنظفى تانى المكان دى كويس بمياة و صابون او ديتول وايبس
4- تحطى اى كريم فى مضاد حيوى علشان مش يعملك اتهابات و كدة و حتطى لمدة يومين مثلا بعد ما تشيلى الشعر انا بستخدم كريم اسمة فيوسيكورد او فيوسيدين المهم هما الى الاتنين زى بعض تقريبا بس هتاكدة و اقولكم
عيوب الحلاقة بالموس عن تجربتى
العيب الوحيد فعلا انك ممكن بسهولة جدا جدا تعورى نفسك يعنى ساعات و انا بعمل كنت حاسة نفسى بعمل براحة عادى و بعد كدة انزل دم فاهمنى فا اعرف انى لا كنت بعمل جامد فا لازم تعملى اولا فى نور كويس و انتى فايقة كدة و مش مستعجلة و انا اتعورت فى ايديى تقريبا 3 مرات ايدى من جوة فاهمين من الموس فا خلو بالكم بليز
المميزات: بجد لا حصر لها
1- السرعة ( بطريقة خيال بجد يعنى ممكن تعملى رجليكى كلها فى 5 دقائق ) و ممكن تعملى جسمك كلة مثلا فى ربع ساعة
2- التوفير: طبعا كا تكلفة ارخص مليون مرة من الشمع مثلا انا كنت بجيب الواكس ستريبس العلبة ب حاجة و 40 و كانت بتكفى نصف رجل واحدة لحد الركبة فا واللة كنت ساعات بدفع اروند 150 او 200 على رجلى بس و بعد كدة كنت بجيب واحدة فى البيت تعملى سويت بس بصراحة ابتديت احسها عينها وحشة اوى بجد واللة كل ما تجيلى يحصلى بعدها مصبة فى جلدى او شعرى المهم و هى كانت بتاخد تقريبا 50 على الرجلين و الايدين فى المرة الواحدة بس دى غير انى لسة لازم اكلمها و احجز معاد و ساعات الواحد فعلا بيبقى مش طايق و عايز يخلص من الشعر دى علطول
3- مفيش وجع خالص زى السويت و الواكس ( هتتوجعى بس لو عورتى نفسك و بعد كدة جيتى تغسلى المكان بمياة )
يعنى انا كنت عورت نفسى فى ركبتى كنت كل ما استحمة بجد و المياة تجيى عليها احس بجد انى عايزة اصوت من الوجع فا تخيلى بقى لو حضرتك عملتى بيها المنطقة الحساسة من جوةو عورتى نفسك كل لما تيجى تتشطفى هتصوتى فعلا فا خلى بالك براحة خالص بجد
4- النتيجة تحفة انا مش هقولكم زى السويت بالظبط بس يعنى لو السويت 100% يبقى الموس دى 90% او اكتر كمان واللة ياجماعة مش ببالغ
الخرافات حول الموس
1- ان الشعر بيطلع اتقل او بيتقل الشعر
الرد: واللة العظيم لا خاللللللللللللللللللص يعنى كل واحدة على حسب جسمة و شعرة يعنى لو انتى مثلا شعرك تقيل لما الشعر هيبتدى يطلع هيطلع زيوا بالظبط ولا اتقل و لا اخف ( انا ابتديت احس الى ممكن ممكن مش عارفة يعمل كدة هو لو استخدمى موس بتاع الولاد لكن الى مخصوص للبنات مختلف خالص حتى فى شكل الشفرة
انا وانا بعمل سرش عموما عرفت اصلا ان معظم البنات برة بيعملوا بالمس يوم اه و يوم لا او 3 مرات فى الاسبوع او مرة فى الاسبوع فا قرات ان دى ممكن مع الوقت هو الى يسمك الشعرة لكن ياجماعة عدد الشعر مش بيزيد طبعا لان دى حاجة داخلية
2- الشعر بيطلع بسرعة اوى:
الرد: انا لما كنت بسمع كدة كنت فاكرة هيطلع ابقى غولة مثلا فى يوم واللة الستات بيبالغوا بطريقة غبية
المهم لما شلت الشعر من تحت ابتدى يطلع اصلا بعد اربع ايام و بس و لما قرب معاد البيريود التانية لانى بشيل بس بعد ك بيريود و دى الصح كان طلع و مش كلوا كمان يعنى اكنى كنت عاملة سويت عادى
نقطة تانية يمكن الى متجوزين هما دايما الى بيقولة كدة لانهم مش ينفعوا يعدوا قدام جوازهم بشعر حتى لو كان لسة طالع و صغير اوى فاهمنى بس انا بالنسبة ليا دى مش مشكلة لانى مش متجوزة يعنى انا بعمل مرة واحدة بس بعد البيريدو يعنى المهم عندى انى ابقى نضيفة عموما فاهمنى
3- الموس بيغمق :
اولا انا اكتسفت انة عادى تبقى المنطقة التى تحت دى اغمق سنة عن بشرتك و دى عند كل البنات عادى
ثانيا اصلا لاجانب كلهم عايشين بالشافنج يعنى و محدش عمرة اشتكى ان الموس بيغمق فا ابتديت احس ان البنات الى بتقول بيغمق و الكلام دى هى اصلا عندها غامقة المنطقة دى و حتى لو استخدمى سويت غامقة بردوا فاهمنى
نسيت اقولكم المناطق الى شلت فيها :
الرجلين- الايدين- المنطقة الحساسة- البطن
نصائح اخيرة:
1- كل كلامى الى فات ينطبق على الامواس الخاص للنساء ( انا بستخدم جيلين فينس )
2- الى هتعمل تاخد بالها جدا تعور نفسها ربنا يباركلكم ناخد بالنا
3- مش تعملى احسن بالموس و انتى فى الحمام لانى اكتشفت الحمام مش مريح خالص و بعدين الحركة فى مش مريحة و ممكن تتزحلقى مثلا و او تتخنقى من البخار فا تعملى بسرعة و تعورى نفسك
4- لازم تستخدمى مضاد حيوى فى شكل كريم بعد يومين من الاستخدام
5- التاكد من نظافة المكان الى هتشيلى منة لشعر قبل و بعد الحلاقة
انصح بيها مين:
1- الى مشعرة او الشعر عملها عقدة فى حياتها و مش مخليها تمارس حياتها بطريقة طبيعية و تلبس الى هى عايزة
2- الى مشغولة دايما سواء دراسة شغل او جواز او حامل مثلا
3- الى امكانيتها المادية مش تسمح بانها تروح مركز متخصص تعمل سويت او واكسنج
4- للبنات الصغيرين الى عايزين يشيلوا الشعر من غير وجع و ارف
5- للبنات قبل ما تتجوز عايزة حاجة تشيل كويس و فى السريع
ملاحظة: مهمة جدا
رائى دى تجربة شخصية ليا انا و يمكن الى يمشى معايا مش يمشى على بنات تانيين بس انا قولت تجربتى بكل امانة علشان اقدر اساعد اى حد لانى للاسف ولا مرة شوفت موضوع يتكلم بحيادية عن الموس
تانى نقطة رائى مبنى على تجربة لمدة مرتين لجسمى كلة يعنى عملت مرتين فى شهرين بعد كل بيريود و ممكن واللة اعلم رائى يتغير بعد كدة بس دى رائى دلوقتى علية و شايفة انة هايل بجد و انصح كل واحدة يبقى عندها حى لو مش هتستخدمة دايما بس للضرورة
اخر حاجة انا قولتلكم العلبة ب 54 تقريبا و هى عبارة عن موس فى شفرة طبعا و العلبة بتاعتة و معاها فى العلبة شفرة هدية و سئلت عن الشفرات الى بتتباع لوحدها قالى بيبقوا 4 بحاجة و 60 تقريبا
و تقريبا الشفرة الوحدة تستخدميها لحد 5-8 مرات او لحد ما تبقى باهتة كدة تغيرها علطول لانها مش هتشيل الشعر كويس
اسبكم مع الصور بقى
بس كدة انا تعبت اوى من كتر الكتابة بس لانى بحب اقولكم كل التفاصيل مش ارمى كام كلمة و اطلع اجرى زى ما كل البنات بتعمل
ياريت بقى بعد كل التعب الفظيع دى اشوف ردودكم الحلوة
و لو عجبكم موضوعى قيمونى
