شعر قصيدة عواض الشلوي الفكاهية ورد الشاعرة ريوف الشمري
السلام عليكم ورحمة الله وبركاته :
الشاعر عواض العطيشان أوالعطشان الشلوي من اشهر شعراء قبيلة الشلاوى
قال هذه القصيدة قبل حوالي سبعين سنه\ حينما الـ تحق وأنظم في السلك العسكري وحيث انه بدوي وليس متعود ان يامره احد قرر ان يفصل وقال هذه القصيده التي كثير من الناس ما يكررها دون ان يعرفوا من قائلها :
يالله انـك لا تـعـود العسكـريـه =
والزمان اللي على البدلـه حدانـي
لبسونـي لبسـة ماهيـب لـيـه =
درعونـي باللبـوس المشبهانـي
دربونـي مثـل تدريـب المطيـه =
والصعب منـا يعـود مطوعانـي
العريـف المستلـم طبـق عليـه =
والخفارة طولـت والنـوم جانـي
يالله انــك لاتحملـنـا الزريــه =
حيـث حنـا للمعاصـي ماندانـي
يا وجودي وجـد حُمُـراً عيدهيـه =
ساقطاً منها الحقب ويـا البطانـي
فوقهـا قرمـاً بباكـوراً قـويـه =
من وراء العارض يبا دارأشهراني
قطّـر القربـه وقــدم قيهمـيـه =
مع زوال الظهر يوم الشوف دانـي
هسها العرقـوب والديـره رديـه =
لين دم الجوف بالذرعـان حانـي
او وجوده وجد عَرَباً فـوق طيـه =
في لهيب القيض معطيتـن ثمانـي
هملـن اعيالهـن بـارضٍ خليـه =
واصبحـن اعيالهنـه ذيهابـانـي
يوم جـن البيـر ليهـي جاهليـه =
ماعليـهـا لا ورود ولامحـانـي
بركن بالشمس تصهرهـن شويـه =
كل منهن كنه الخـرص العمانـي
لو بغيـت ادلـه الطـاري عليـه =
واستحس القلب والهاجوس جانـي
يوم اشوف الدين مرتجـدن عليـه =
والظهر عريان والجوع ايحدانـي
طالبـاً رزقـاً تحطـه فـي يديـه =
ماعلى بابـه شريـف ولاهدانـي
وردة عليه شاعره وهي الشاعرة
ريووف القاسي الشمري:يا طيب
عينها >>> وهذا ردها ادناه
وسِّـع الملعـب لـقـاف الشمـريـه =
وسّعـه للحـق أنـا بطْلِـق عنـانـي
خلنـي لا تْحِـط قيـدك فـي يـديَّـه =
ولَّعَـتْ ألفـاظ شعـري و المعـانـي
جمـرةٍ كتمانـهـا صـعـبٍ علـيّـه =
كـل شاعـر لا كِتـم شعـره يعانـي
يشتِعل مـن شـان يسْتهـدي بضيّـه =
كلّ طرقـي فـي دروب الليـل عانـي
هزّني شاعـر سمعتَـه فـي عَشيّـه =
عسكريٍ يشتكـي مـرّ الزمااااانِـي
قـال ربـي لا تعـود العسكريـه =
والزمان اللي على البدلـه حدانـي
قلت أكيـد الرجـل واقـع فـي بِليّـه =
أو مصيبـه صكِّتـه بيـن المحـانـي
قـال وشـو درّبونـي كالمطـيّـه =
و اتِضح مقصود شعره لـي وِ بانِـي
طار قلبـي و أثـري الدعـوى كِذَيَّـه =
ما أقـول إلا يـا دانـه دانـي دانـي
استلمهـا جَتْـك نِصـح اخـتٍ لِخيَّـه =
ولا أبي مـن وقتـك إلا لـي ثوانـي
قُمْ وِ صلـي و اردع النفـس الشِقيّـه =
و احمد اللي يرتجيـه إنـسٍ و جـانِي
الله اللـي مـدّ لـك رزق و عطـيّـه =
حـرِّك بحمـده يديـنـك و اللـسـانِي
كان شغل العسكـري متعـب شِويَّـه =
قبلك اللي من التعـب عـضّ البنـانِي
الرجـال اللـي يخوضـون المنـيّـه =
كـلّ صعـبٍ يَحْمِلُـون إلا الـهـوانِي
إسأل الصحـراء وِ صمـت المهمهيّـه =
عـن فعايلهـم وِخِـذْ منهـا البيـانِي
كيف شقّوا بالصخـر مجـرى وِ مَيّـه =
كيـف عاشـوا مِـعْ ذيابتهـا بأمـانِي
صادقوا في مشْيُهـم شمسـه وِ فَيّـه =
وِ عْقِدوا مَـعْ بـرّده و قيظـه رهـانِي
كلّ مـن لـه نفـس صبَّـاره و حَيَّـه =
بـإذن ربـي يقطـف ورود الأمانـي
لا تِشَكّـى أشهـد إن العسكريـه =
غِصـن رزقٍ وارفٍ رطْـبٍ وِ دانـي
كَمِّ بيـتٍ مـن وراهـا شـبِّ ضيِّـه =
يغْرِفـون اللحـم دايـم بالصـوانـي
و كـم راسـب بالفصـول المدرسيّـه =
ما لقـى فـي غيرهـا رزق و مكـانِي
جندي و راتِبْه خمسُ وكـم ميّـه =
مــا يجـحـده غـيـر الـجـبـانِي
اضربوا للعسكـري أحـلا تحيّـه =
لَوْهُ جندي أشهـد إنـه راعِ شـانِي
حَيِّ عَينه لا غَفـتْ عيـن البريّـه =
أسْهَرَه لجـل الوطـن حـبّ و تفانـي
اللي لا صِحْنا رمى روحـه هديّـه =
يوم غيره مـن غـلا روحـه أنانـي
لا تلومـونـي بـحـب العسكـريـه =
لـو أغنـي دَهْـر حُبـه مـا كِفانـي
خيرهـا طَـوّق بَعَـد ربــي يِـديّـه =
رزق ابوي وْ شِغل اخوي بهالزمانِي
و أنـا بنـتٍ لا جحـود ولا غبـيـه =
و احمد اللـي بالرضـا دايـم كسانـي
في ردودي دوم لي بالنصـح نِيّـه =
لا طلب شهـره ولا هـو شـي ثانـي
عِنْـد هـذا البيـت وَقَّفـتْ المطـيّـه =
وِ اكتمل ردي عسى المقصـود بانِـي
………………..
منقول/
وأسف كان فيها غلطات أملائيه من كاتبها السابق
ماهي مني انا فقط ناقل ولاصقها
،
،
وســـــــــلامــتــــكــم ..
