اليوم يايبه لكم طبق جديد اللي اهو طاجين الدجاج بالزيتون والليمون المقادير اللي بحطها تكفي ل10 اشخاص وتقدرين تضاعفين المقادير او تقللينها
المقادير
- كيس نخي حب
- 4 ملاعق طعام طحين
- 4 ملاعق شاي باببريكا
- عدد 2 دجاجه مقطعه كل وحده 8 قطع
- قالب زبده
- 5 بصلات مقطعه شرايج سميكه
- 6 فصوص ثوم مدقوقه
- 1 ملعقه كبيره كمون حب
- 1/2 ملعقه كبيره كزبره مطحونه
- 1/2 ملعقه كبيره كركم
- 1/2 ملعقه كبيره زعفران
1/2 ملعقه كبيره فلفل احمر حار مطحون
- ملعقه كبيره زنجبيل
- 4 ليمونات مبشورات ونعصرهم ونخلي عصيرهم على جنب
- 1/2 كيلوا زيتون اخضر بشرط ما يكون مر
- شده كزبره خضراء مفرومه
- 6 اكواب ماي
- علبه معجون طماطم
الطريقه
1- اول شي ناخذ النخي ونغسله وننقعه بماي وبملقعه صغيره بيكاربونات الصوديوم مده 24 ساعه طبعا البيكربونات راح نذوبها ببدايه صغيره مع شوي ماي تالي نحطها عالنخي
2- ثاني يوم ناخذ النخي ونغسله بماي بارد وتالي نحطه بجدر ونغطيه بالماي ونخليه عالنار تقريبا ساعه لين يستوي وبهالفتره نسوي الدجاج
3- ناخذ جيس نايلون ونحط فيه لطحين مع الباببريكا ونخض الجيس لين يختلطون مع بعض بعدين نضيف الدجاج ونخض الجيس عدل لين يتخطى الدجاج كله بالخلطه
4- نحط الجدر عالنار وفيه الزبده ونذوبها وعقب ما تذوب نضيف الدجاج
5- نقلب الدجاج لين يصير لونه ذهبي بعدين نشيله ونحطه على جنب
6- بنفس الجدر اللي قلي فيه الدجاج نضيف البصل ونقلبه واذا لا حظتي ان الجدر ناشف ضيفي ربع قالب زبده ما يضر
7- لما البصل يذبل وتلاحظين ان صار شفاف ضيفي الثوم المدقوق عليه وقلبيه
8- بعدين نضيف البهارات اللي اهي الكمون والكزبره المطحونه والكركم والزعفران والفلفل المطحون والزنجبيل ونقلبه لين تطلع ريحة لبهارات
9- اول ما تطلع ريحة لبهارات نضيف عليها الدجاج ونقلبه لمده 5 دقايق
10- عقب خمس دقايق نضيف عليه 6 اكواب ماي والمعجون ونضيف الملح حسب الرغبه ونخليه يغلي لمده نص ساعه
11- اثناء اللي مخلين فيها الدجاج عالجوله ناخذ الطاجين المغربي وننقعه بالماي الحار عشان لا ينبط معانا بالفرن وما يصير فيه شرخ
12- عقب النص ساعه لما يستوي الدجاج نضيف عليه النخي ونقلبه لين يختلط
النخي بالدجاج بعدين نحطه بالطاجين ونغطي الطاجين وندخله الفرن مدة ساعه
طبعا الفرن تبطلونه من فوق وتحت
13- عقب الساعه نطلعه من الفرن ونحط عليه الزيتون الاخضر عصير الليمون وبشر الليمون ونزينه بالكزبره المفرومه ويقدم مع عيش مشخول او خبز ايراني
